खोज

बुटवल, २ पुस ।

चर्को बैंक ब्याज दरले उद्योग व्यवसाय संकटमा परेकाले व्याजदर छिटो एक अंकमा झार्नुपर्ने र व्यवसायीमैत्री नीति बनाउनपर्ने व्यवसायीहरूले माग गरेका छन् । दुई अंकको बैंक व्याजदरले व्यवसायीहरू संकटमा परेको भन्दै व्यवसायीका माग तत्काल सम्बोधन गरी व्यवसायमैत्री वातावरण बनाउन उनीहरूले आग्रह गरे ।

उद्योग व्यापार संघ बुटवलको पाँचौ वार्षिक साधारणसभा तथा तेस्रो अधिवेशनमा बोल्दै रुपन्देहीका व्यवसायीहरूले उद्योग व्यापार बिना देशको विकास सम्भव नहुनेमा जोड दिदै साना र मझौला व्यवसायीलाई सुहाउँदो व्याजदर र तीन तहकै सरकारको नीति बन्न आवश्यक बताएका हुन् ।

कार्यक्रममा बुटवल उपमहानगरपालिकाका नगरप्रमुख खेलराज पाण्डेयले आर्थिक कारणले मुलुक संकटमा परेको बताउँदै बैंकहरुले सम्झौतापछि व्याजदर बढाउँदै जाँदा आर्थिक क्षेत्रमा समस्या बढेको बताए । पाण्डेयले करको दर नभई दायरा बढाउने गरी पालिका अघि बढेको बताए । ‘कर्जा सम्झौताको बेलामा उल्लेख भए भन्दा दोब्बर ब्याज लिदा आर्थिक क्षेत्रमा समस्या भयो’ उनले भने, ‘समस्या देखाउन भन्दा आफ्नो ठाउँमा सबै जिम्मेवार र इमान्दार बनौं ।’ बुटवल बजार क्षेत्रको सडक विस्तारको डिजाइन परिवर्तन गरी व्यवसायीमैत्री सडक बनाउनुपर्ने उनले बताए ।

उद्योग व्यापार संघ बुटवलका संस्थापक अध्यक्ष एवम् नेपाल उद्योग व्यापार महासंघ केन्द्रीय महासचिव खिमनारायण पराजुलीले अबको व्यवसायीको लडाइँ राष्ट्र बैंक, अर्थ मन्त्रालय र बैंकर्स एशोसिएशनसँग रहेको बताए । बैंकर र व्यवसायी एउटै घराना हुँदा उनीहरूको दोहोरो भूमिकामा हुँदा साना मझौला व्यवसायी समस्यामा परेको पराजुलीले बताए ।

बुटवल उद्योग वाणिज्य संघका अध्यक्ष हरिप्रसाद अर्यालले कर राजस्वका दर घटाउनुपर्ने बताए । प्रदेश सरकारको एकीकृत सम्पत्ति कर कानुनका कारण कर राजस्व अत्यधिक धेरै रहेको उनको भनाइ छ । ‘बैंक व्याज दर लिंदा ८ प्रतिशत र तिर्दा १६ प्रतिशत हुँदा बैंकहरू मात्र मोटाउने परिपाटी अन्त्य हुनुपर्छ’, अर्यालले भने ।

संघका अध्यक्ष गोविन्दराज गैरेले उद्योग व्यापारको विकास विना देशको आर्थिक विकास हुन नसक्ने बताउदै बैंकको व्याजदर घटाउन र बुटवलको सडक डिजाइन परिवर्तन गरी व्यवसायीमैत्री बनाउन आग्रह गरे । उनले संघको दुई तले सचिवालय भवन बनाउन उपमहानगरपालिकाले जग्गा उपलब्ध गराएकोमा धन्यवाद दिँदै दुई वर्षभित्र भवन बनाइसक्ने बताए ।

कार्यक्रममा बुटवलकी उपमेयर सावित्रा अर्याल, पत्रकार महासंघ रुपन्देहीका अध्यक्ष रामराज पोखरेल, कांग्रेस नगर उपसभापति ज्योति भण्डारी, नेपाल उद्योग व्यापार महासंघ केन्द्रीय वाणिज्य उपाध्यक्ष बाबुराम पोखरेल, संघका उद्योग उपाध्यक्ष बिष्णु प्रसाद पाण्डे, महासचिव पदम जिसी, कोषाध्यक्ष अन्जु पाण्डे, माओवादी केन्द्र बुटवलका अध्यक्ष महेन्द्र भुसाल, नेकपा एमाले बुटवल उपाध्यक्ष शोभाखर पोखरेलले युवा जनशक्ति विदेश पलायन हुनबाट रोकेर स्वदेशमै काम गर्ने वातावरण र स्पष्ट योजना बनाउन तीनै तहका सरकारको ध्यान नगएको बताए । अधिवेशनले २४ सदस्यीय नयाँ नेतृत्व पनि चयन गर्ने महासचिव पदम जिसीले बताए ।