खोज

नवलपुर, ३० मंसिर ।

जीवनको उत्तराद्र्धमा गाउँमा बिजुली पुगेपछि नवलपरासी पूर्वको पहाडी भेग बुलिङटार गाउँपालिका वडा नं. २ डाँडाझेरी मथारका दलसिंह ठाडा मगर खुशीले दङ्ग परेका छन् ।

उमेरले उनी ८६ बर्ष पुगे । मर्ने बेलामा गाउँमा बिजुुली पुुगेपछि उनी मात्रै होईन गाउँका बुढाबुढी, युवा युवतीदेखि बालबालिका यतिबेला सबै खुुशी साट्न ब्यस्त छन् । बुलिङटार गाउँपालिका वडा नं. २ का पुर्व वडाध्यक्ष एवं स्थानीय प्रेमबहादुर थापा मगर गाउँमा बिजुली पुगेपछि स्थानीय सबै खुसी भएको बताउँछन् ।

अहिले सम्म पहाडी गाउँपालिकाका धेरै वडाका जनता अँध्यारोमा बस्न बाध्य थिए । तर अहिले धेरै प्रयासका बाबजुद गाउँमा बिजुली पुगेकोमा त्यहाँका जनताले खुशी ब्यक्त गरेको स्थानीय समाजसेवी राजेन्द्र राजभाटले बताए ।

मट्टितेलको टुकी बालेर बस्ने गाउँका जनताले जीवनमै बिजुली पुग्छ त्यो पनि राष्टिय प्रसारणको भन्ने कुरा कहिल्यै कल्पना गरेका थिएनन् । तर बिजुली बलेको देख्दा यहाँका स्थानीयले खुशी ब्यक्त मात्रै गरेका छैनन् उनीहरुले सरकारप्रति कृतज्ञता प्रकट गरेको डाँडाझेरीका दानबहादुर बकावल मगरले बताए ।

कावासोती वितरण केन्द्रबाट वितरण गरिएको विद्युत बुलिङटार गाउँपालिका वडा नं. २ मा एक हप्तादेखि बाल्न शुरु गरिएपछि अहिले बत्ती जडान, मिटर जडानमा स्थानीय ब्यस्त हुन थालेको ८० बर्षीय हरिमाया रानाभाटले बताइन् ।

अहिले डाँडाझेरीका एक सय २० घरमा राष्ट्रिय प्रसारणको बिजुली बालिएको छ र यो क्रम चलिरहेको छ, सकेसम्म वडाका सबै गाउँ र टोलमा यसैबर्ष बिजुली बालिने कावासोती विद्युुत प्राधिकरणले जनाएको छ । अहिले सालको रुख कटान आदेश नहुँदा केही समस्या आएको र बिजुली छिटो बाल्न समस्या पारेको प्राधिकरणले जनाएको छ ।

पहाडी क्षेत्रमा रहेका दुई गाउँपालिका बुलिङटार र बौँदीकालीमा यसैबर्ष सबै वडामा राष्ट्रिय विद्युतीकरण पुर्याउने उद्देश्यका साथ काम अगाडि बढेको र बोझापोखरीमा रहेको ट्रान्समिटरमा विजुली जडान गरी बिजुली बालिएको प्राधिकरणले जनाएको छ ।

जिल्लाको बुलिङटार गाउँपालिकाको वडा नं. २ मा पहिलोपटक बिजुुली पुुगेकोमा गण्डकी प्रदेश सरकारका कृषि तथा भुमि ब्यवस्था मन्त्री महेन्द्रध्वज जीसीले गण्डकी सरकार सबै क्षेत्रमा उज्यालो पुर्याउन लागिपरेको बताए ।

उनले राजनीतिक रुपमा पूर्वाग्राही बनेर कसैले पनि विकासलाई रोक्न नहुने र यसरी पूर्वाग्राही भईयो भने विकास पनि नहुने हुँदा कसैलाई पनि बिकासमा अबरोध नगर्न अनुरोध समेत गरे ।

स्थानीयहरुले अहिले गाउँमा बिजुली बत्ती पुगेपछि खुशी साट्दै सरकारले जनताको मर्म बुझेको भन्दै सरकारप्रति कृतज्ञता प्रकट गरेको बुलिङटार गाउँपालिकाका उपाध्यक्ष डिलमायाँ रानामगरले बताईन् ।

बुलिङटार गाउँपालिकामा बस्न योग्य हेर्न लायक, समृद्ध बुलिङटार निर्माणलाई प्राथमिकता दिंदै विद्यमान उर्जा संकटलाई समाधान गर्दै यसैबर्ष भित्र करिब दुई हजार भन्दा बढी घरधुरीमा मिटर बक्स लगेर राष्ट्रिय प्रसारण लाइन जोड्निे गरी अघि बढिएको र दुई बर्ष भित्रमा पहाडी दुई पालिका उज्यालो पालिकाका रुपमा घोषणा गर्ने गरी अघि बढिएको गाउँपालिकाका अध्यक्ष दिपेन्द्र सुनारीले बताए ।