खोज

बुटवल,३० मंंसिर । बुटवलको न्यू होराइजन माविले विद्यालयस्तरीय लोक दोहोरी प्रतियोगिता सम्पन्न गरेको छ । संस्थागत विद्यालयको आयोजनामा अन्तरविद्यालय दोहोरी गीत प्रतियोगिता रुपन्देहीमै पहिलोपटक भएको हो । प्रतियोगिता उद्घाटन गर्दै राष्ट्रिय लोकदोहोरी गीत प्रतिष्ठानका केन्द्रीय सल्लाहकार खिमबहादुर हमालले नेपालको मौलिक कला र संस्कृतिको रुपमा रहेको लोक दोहोरीको संरक्षण,विकास र प्रवद्र्धनका लागि विद्यालय स्तरमा यस्ता प्रतियोगिता हुनु सराहनीय भएको भन्दै यसलाई निरन्तरता दिन र प्रदेशस्तरीय बनाउन सुझाव दिए । उनले लोक दोहोरी मनोरन्जन मात्र नभई यसले विद्यार्थीको वौद्धिक क्षमता र नेतृत्व क्षमता पनि विकास गर्ने बताए । हमालले बुटवल उद्योग बाणिज्य संघले आगामी फागुनमा बुटवलमा गर्ने कृषि मेलामा पनि राम्रो पुरस्कार राशीसहित विद्यालयस्तरीय लोक दोहोरी प्रतियोगिता हुने भएकाले त्यसमा पनि भाग लिन विद्यालयहरुलाई आग्रह गरे ।
विद्यालय व्यवस्थापन समितिका अध्यक्ष ज्ञानेन्द्र कसजूले विद्यालयले विद्यार्थीको शैक्षिक गुणस्तरसंगै विभिन्न विधामा पनि उत्कृष्टता हासिल गराउन अतिरिक्त क्रियाकलापहरुलाई उत्तिकै प्राथमिकता दिने गरेको बताए । प्राचार्य लोकनाथ उपाध्यायले न्यू होराइजनले संस्थागत र सामुदायिक विद्यालयबीच सम्बन्ध प्रगाढ बनाउने र विद्यार्थीको वौद्धिक प्रतिभा प्रष्फुटन गराउन जिल्लास्तरीय हुंदै प्रदेशस्तरीय हाजिरीजवाफ प्रतियोगितालाई निरन्तरता दिंदै आएको र अब लोक दोहोरी प्रतियोगितालाई पनि निरन्तरता दिने बताए ।
प्रतियोगितामा शान्ति नमूना मावि मणिग्राम प्रथम, नवीन औद्योगिक मावि बुटवल दोस्रो, बुद्ध पब्लिक हाइस्कूल देवदह तेस्रो र न्यू होराइजन मावि बुटवल सान्त्वना भएका विद्यालयका शिक्षक विष्णुप्रसाद बस्यालले जानकारी दिए ।

जिल्लाका सामुदायिक र संस्थागत गरी १० विद्यालयले भाग लिएको प्रतियोगिताका विजयी विद्यालयले क्रमशः १२ हजार,९ हजार,६ हजार र ३ हजार नगद पुरस्कार पाएका प्रतियोगिताका संयोजक गणेश भण्डारीले जानकारी दिए । कार्यक्रममा निर्णायकहरु लक्ष्मण खड्का,दामोदर बस्याल र सीता राना तथा गायक नारायण लेकाली,विष्णु कंडेल,गायिका कल्पना कुसुम लगायतले दोहोरी गीत,भजन र नृत्यमार्फत माहोल तताएका थिए । चर्चित गायक गायिका र प्रतियोगी विद्यार्थीको प्रस्तुतिमा दर्शक दिर्घामा बसेका विद्यार्थीहरुले दिनभर भरपूर मनोरन्जन लिंदै रमाएका थिए ।