खोज

बुटवल,२८ मंसिर । उद्योग ब्यापार संघ बुटवलको पांचौं वार्षिक साधारणसभा तथा तेस्रो अधिवेशनको तयारी अन्तिम चरणमा पुगेको छ । पुस २ गते बुटवलमा हुने अधिवेशनका लागि आवश्यक तयारीका अधिकांश कामहरु पूरा भएका संघले जनाएको छ । अधिवेशनको पुर्व सन्ध्यामा संघको २९ औं वैठक, सचिवालय र सल्लाहकारसहितको वैठक बसी अध्यक्ष, महासचिव र कोषाध्यक्षको प्रतिवेदनबारे छलफल गरी पारित भएको महासचिव पदम जीसीले जानकारी दिए । अधिवेशन सम्पन्न गर्न कोषाध्यक्ष अन्जु पाण्डेको संयोजकत्वमा रजिष्ट्रेसन उपसमिति, सहकोषाध्यक्ष नम्रता थापाको संयोजकत्वमा किटब्याग व्यवस्थापन उपसमिति,सचिव यमलाल मरासिनीको संयोजकत्वमा खाना व्यवस्थापन उपसमिति, न्याजुद्दिन मियाको संयोजकत्वमा मञ्च व्यवस्थापन उपसमिति र दामोदर घिमिरेको संयोजकत्वमा निर्वाचन उपसमिति गठन गरिएको महासचिव जीसीले बताए ।
वैठकमा संघका अध्यक्ष गोबिन्दराज गैरेले साधारणसभा तथा अधिवेशनको तयारी पूरा भएको र नयां नेतृत्व सहमतिमा चयन हुने गरी नेतृत्वका आकांक्षीहरुबीच समझदारी बनेको जानकारी गराए । सहमतिबाट नेतृत्व चयन हुंदा संस्थामा एकताको सन्देश जाने उल्लेख गर्दै अधिवेशन लगत्तै आफू निवर्तमान अध्यक्षका रुपमा सचिवालय भवन निर्माण समितिको संयोजक बनेर भवनको काममा लाग्ने गैरेले बताए । संघका संस्थापक अध्यक्ष एवं नेपाल उद्योग ब्यापार महासंघका महासचिव खिमनारायण पराजुलीले आफूहरुको संस्था बुटवलका अन्य ३ वटा व्यवसायिक संस्था भन्दा कान्छो भए पनि सामाजिक र संस्थागत काममा पुराना संस्थाकै हाराहारीमा रहेकाले उच्च मनोबलका साथ अघि बढ्न पदाधिकारी र सदस्यहरुलाई आग्रह गरे । राजनीतिक आस्था र विचार भन्दा माथि उठेर साना,मझौलादेखि ठूला उद्योगी व्यवसायीका हक हित र समस्या उठान गरी सबैको साझा संस्था बनेकाले संघप्रति आकर्षण बढ्दै गएको र केन्द्रीय तहमा हस्तक्षेपकारी भूमिका खेल्न सफल भएको बताए । वैठकमा उद्योग उपाध्यक्ष विष्णुप्रसाद पाण्डे,बाणिज्य उपाध्यक्ष लोकनाथ पन्थी,कोषाध्यक्ष अन्जु पाण्डे,सचिव यमलाल मरासिनी,सहकोषाध्यक्ष नम्रता थापा,कार्यसमिति सदस्य भरत केसी,जनेश पन्थी लगायतले आआफ्ना धारणा राख्दै अधिवेशनमा धेरै भन्दा धेरै सदस्य उपस्थित गराउने र नयां सदस्यता बृद्धिलाई प्राथमिकता दिएर अघि बढ्नुपर्नेमा जोड दिएका थिए ।