खोज

स्वस्तिक श्रेष्ठ
बुटवल, २५ मंसिर ।

बुटवलका सामुदायिक विद्यालयहरुलाई एकीकृत विकासको मोडलमा लैजानुपर्ने सरोकारवालाहरुले बताएका छन् । एक विद्यालय एक विषय अध्यापनको अभियानलाई स्थानीय सरकारले अघि बढाउनुपर्ने उनीहरुको सुझाव छ ।

बुटवलको पुरानो मध्येको एक उजिर सिह माध्यमिक विद्यालयको हिरक जयन्ती समारोहको अवसरमा विद्यालयमा गरिएको कार्यक्रममा बोल्ने वक्ताहरुले बुटवलको सबै सामुदायिक विद्यालयहरुलाई एकीकृत गरी विषय केन्द्रित शैक्षिक अभियान थाल्नुपर्ने सुझाव दिए ।

सामुदायिक विद्यालयहरुलाई विज्ञान, ब्यवस्थापन, प्राविधिक, शिक्षा, आईटी लगायत गरी फरकफरक विषयको अध्यापन गराउने गरी फरकफरक भूमिका प्रदान गर्नुपर्ने उनीहरुले बताए ।

हिरक महोत्सवको अवसरमा विविध सप्ताहब्यापी कार्यक्रम गरी मनाउन लागेको विद्यालयका प्रधानाध्यापक पदमराज ज्ञवालीले बताए । ‘संविधान दिवसको अवसरमा कर्नेल उजिर सिहको अर्धकदको मुर्ति स्थापनासंगै शुरु भएको छ’– उनले भने । मंगलबार बृहत् रक्तदान, जिल्ला स्तरीय भलिबल प्रतियोगिता, टोल विकास संस्थास्तरीय हाजिरीजवाफ प्रतियोगिता, साहित्यिक कार्यक्रम, खेलकुद प्रतियोगिता, नगरस्तरीय विद्यालय बक्तृत्व कला प्रतियोगिता, सास्कृतिक कार्यक्रम, नगरस्तरीय विद्यालय सांस्कृतिक प्रतियोगिता हुने उनले बताए ।

यसैगरी मूल समारोह पुस ७ गते हुने उनले बताए । विद्यालय स्थापना भएको ६० वर्ष पूरा गरेको अवसरमा हीरक जयन्ती समारोह २०८० मनाउने तयारीमा रहेको बेला भएको हो । कार्यक्रममा विद्यालय ब्यवस्थापन समितिका अध्यक्ष विमल बहादुर शाक्यले वि.स २०२० सालमा स्थापना भएको विद्यालय पछिल्लो समय भौतिक र शैक्षिक सुधार गरेको बताए ।

विद्यालयका शिक्षक, अभिभावक, जग्गादाता, समाजसेवी, विद्यार्थीहरुको सहयोगबाट नै उपलब्धि हासिल गरेको भन्दै उनले हिरक महोत्सवको अवसरमा सम्मान कार्यक्रमलाई प्राथमिकतामा राखिएको बताए । शैक्षिक विकास हुने क्रम स्थापनाकालमा शिक्षकहरु न्यून रहेको बेला प्राथमिक पाठशाला नं २ तिलोत्तमा आफू पहिलो पटक अध्ययन गराएको स्मरण गर्दै धेरै कठिनाई र चुनौती पार गर्दै वर्तमान समयमा शैक्षिक विकास भएको बताए ।

तत्कालीन समयमा १ नम्बर कालिका, ३ नं ज्ञानोदय र ४ नं सरस्वती आधारभुत विद्यालय रहेको उनले बताए । विद्यालयबाट प्रकाशन गर्न लागेको मुखपत्र उजिर सिह संग्रह–२ धेरै उपयोगी हुनेमा आशावादी रहेको उनले बताए । बुटवल क्षेत्रको विद्यालयको एकैदिन शैक्षिक मेलाका रुपमा मनाउन स्थानिय पालिकाको पहल जरुरी रहेको उनले बताए ।

बुटवलका सामुदायिक विद्यालयहरुलाई विषयगत पठनपाठनको ब्यवस्था, पाठ्यक्रम परिमार्जन लगायत गर्न जरुरी रहेको उनले बताए । कार्यक्रममा बुटवल उपमहानगरपालिका वडा नं २ का वडा सदस्य गौतमलाल शाक्य, प्रमुख सल्लाहकार टेक बहादुर थापा, शिक्षक अभिभावक संघका सभापति सुहाबहादुर नेपाली, विद्यालयका शिक्षक याम प्रसाद श्रेष्ठले बुटवलको शैक्षिक सुधारका योजनाहरु बारे प्रकाश पारे । विद्यालयमा हाल १ हजार १ सय ६६ जना विद्यार्थीहरु अध्ययनरत छन् ।