खोज

बुटवल (बुटवल टुडे), २५ मंसिर– रूपन्देही उद्योग संघले आइतवार बुटवलमा अयोजना गरेको मोतिपुर औद्योगिक क्षेत्रको निर्माण र सेजको संचालनको अवस्था विषयक अन्तरक्रिया कार्यक्रम गरेको छ । कार्यक्रममा विषयवस्तु राख्दै संघका अध्यक्ष दिलिप सापकोटाले औद्योगिक विकास गर्ने कुरामा राजनीतिक विवाद नगरेर अगाडी बढ्न आग्रह गरे ।

यस क्षेत्रमा नयाँ औद्योगिक क्षेत्रको निकै जरुरी भएको र त्यसको समाधानका लागि अगाडी बढाइएको मोतीपुर औद्योगिक क्षेत्रको निमार्णमा देखिएको अवरोधलाई समाधान गर्न औद्योगिक क्षेत्र व्यवस्थापन लिमिटेडलाई अनुरोध गरेका थिए । उनले बु्टवल धागोको व्यवस्थापन र भैरहवा स्थित सेज संचालनका लागि सम्बन्धित निकायहरूको ध्यानाकर्षण हुनुपर्नेमा जोड दिए । त्यस अवसरमा नयाँ औद्योगिक क्षेत्रको स्थापना, औद्योगिक वातावरण र अर्थतन्त्रलाई चलायमान बनाउनका लागि ठोस निति र विधि बनाउदै अगाडी बढ्न उद्योगीहरूले राज्यसँग आग्रह गरेका छन् । उनीहरूले लामो समयसम्म नयाँ औद्योगिक क्षेत्रहरू निमार्ण नहुदा र भएका औद्योगिक क्षेत्रहरूको सहि व्यवस्थापन नहँुदा जग्गा अभावमा उद्योगहरूले समस्या झेल्नु परेको बताएका छन् ।

अन्तरक्रिया कार्यक्रममा सहभागी उद्योगी व्यवसायीहरूले राज्यले ठोस औद्योगिक विकासका लागि नीतिगत निर्णयहरू कार्यान्वयनमा जोड दिनुपर्ने सुझाव दिएका थिए । उनीहरूले लामो समयसम्म पनि नयाँ औद्योगिक क्षेत्रहरू स्थापना गर्न नसक्नु औद्योगिक विकासको लागि राम्रो संकेत नभएको बताउँदै मोतिपुर औद्योगिक क्षेत्रको निर्माण कार्य तत्काल अगाडी बढाउन र बन्द धागो कारखानाले उपभोग गरिरहेको जग्गा एवं भवनको सदुपयोग गर्ने तर्फ ध्यान दिन आग्रह गरेका थिए ।
कार्यक्रममा औद्योगिक क्षेत्र व्यवस्थापन लिमिटेडका केन्द्रीय अध्यक्ष बाबुराम पन्तले आफु नेत्तृत्वमा आएसँगै मोतिपुर औद्योगिक क्षेत्रको निर्माण, बन्द बुटवल धागो कारखाना संचालन एवं जग्गाको प्रयोग तथा सेज र औद्योगिक क्षेत्रवीच मर्जरको कामलाई प्राथमिकतामा राखेको बताए ।

अध्यक्ष पन्तले बुटवल धागोलाई पुनः संचालनमा ल्याउन वा त्यसको स्थानमा नयाँ उद्योग संचालन गर्ने विषयलाई आफुले सम्बन्धित निकायमा स्पष्टसँग कुरा राखेको बताउँदै खाली रहेको जग्गाको सदुपयोग गर्ने कुरामा छिट्टै निर्णय गरेर अगाडी बढ्ने प्रतिवद्धता जनाए । उनले मोतीपुर औद्योगिक क्षेत्रको नाममा रहेको सबै जग्गामा विवादका कारण सिमाङ्कन गरी एकैपटक काम अगाडी बढाउन नसकिने कुरामा आफुहरू स्पष्ट भएको उल्लेख गर्दै विकल्पमा रहेको कम विवादित २७० विघा जग्गामा औद्योगिक क्षेत्र निर्माणको काम अगाडी बढाउने सोंचका साथ सहमति गरी काम अगाडी बढाएको जानकारी गराए ।

कार्यक्रममा उठेका जिज्ञाशाहरूको जवाफ दिदै अध्यक्ष पन्तले सरकारले संचालनमा ल्याएका सेज संचालनमा कठिनाईहरू देखिएको हँुदा त्यसलाई औद्योगिक क्षेत्रसँग मर्जको प्रस्ताव अगाडी बढाएको र सेजमा देखिएका समस्या समाधान गरी उद्योग मैत्री वतावरण निर्माण गर्नेतर्फ औद्योगिक क्षेत्र व्यवस्थापन लिमिटेड अगाडी बढेको जनकारी गराए ।
रूपन्देही उद्योग संघका पूर्व अध्यक्ष डम्मरदेव अर्याल, बाबुराम बोहोरा, गणेश प्रसाद अधिकारी, निवर्तमान अध्यक्ष माधव प्रसाद पौडेल, उद्योगी भुपाल कुमार श्रेष्ठ, बुटवल उद्योग वाणिज्य संघका अध्यक्ष हरि प्रसाद अर्याल, पूर्व अध्यक्ष नवराज श्रेष्ठ, बुटवल औद्योगिक क्षेत्र उद्योग संघका उपाध्यक्ष उपेन्द्र अग्रवाल, पञ्चकन्या ग्रुपका महाप्रवन्धक देवेन्द्र शाहु, रत्नहरि गौतम लगायत बोलेका थिए ।