खोज

बुटवल, २५ मंसिर । क्रिश्चियन धर्मावलम्बी अप्नाउदै आएका समुदायले सोमबार बुटवलमा रक्तदान कार्यक्रम गरेका छन । परमेश्वरको जीवित मण्डली बेर्शेवा प्रार्थना भवन बुटवल ३ गोलपार्कमा आवद्ध समुदायका रक्तदाताहरुले वार्षिक नियमित कार्यक्रम अन्तरगत दोस्रो पटक रक्तदान गरेका हुन । धर्मसंस्कृतिसंगै सामाजिक सेवामा अग्रसर रहेर आफुहरुले वार्षिक रुपमा कार्यक्रम गर्दै आएको बेर्शेवा प्रार्थना भवनका सचिव दिलिप राईले बताए । ‘किनकि प्राणीको प्राण (जीवन) रगतमा हुन्छ ।’ भन्ने मान्यतालाई आत्मसात गर्दै नियमित रक्तदान गर्दै आएको उनले बताए ।

कार्यक्रमको बुटवल उपमहानगरपालिका वडा नं ३ का वडाअध्यक्ष बिष्णु ढकालले उद्घाटन गर्दै रगत दान सबैभन्दा पुण्य कार्य भएको बताए । हरेक जात र धर्मको रगत सबै बिरामीलाई चल्ने भन्दै यो काममा अझ धेरै प्रतिस्पर्धा गर्न जरुरी रहेको उनले बताए । आधुनिकतासंगै विश्वभरमा नयानया रोगहरु भित्रिरहेको बेला रगतकै कारण अकाल मृत्यु हुनबाट रोक्न सकिने हुदा यस्ता कार्यक्रमलाई निरन्तरता दिनुपर्ने उनको दाबी छ । रक्तदानको बारे समाजमा चेतना पुग्ने गरि टोलटोलमा आयोजना गरेर कार्यक्रमलाई प्रभावकारी बनाउन सकिने उनले सुझाव दिए ।
कार्यक्रममा बेर्शेवा प्रार्थना भवनका अध्यक्ष आईबी रानाले रक्तदान कार्यक्रमलाई विशेष प्राथमिकतामा राखेर युवा पिढीलाई प्रोत्साहन गर्दै आएको बताए ।

कार्यक्रममा संस्थालाई निरन्तर सहयोग गर्ने दाताहरु भुवन बराल, सम्मा परियारलाई सम्मान गरिएको थियो ।
नेपाल रक्तसंभार केन्द्र, रक्तसंचार केन्द्र बुटवलको आयोजनामा भएको कार्यक्रममा ३२ युनिट रगत संकलन भएको संस्थाका सदस्य ध्रुव कुमार रणपालले बताए ।

क्रिश्चियन धर्मावलम्बीहरुको यो समाज बिसं २०४२ सालदेखि स्थापना भएको हो । बुटवल बमघाटमा साढे ६ सय जना घरधुरीहरुका सदस्यहरु यसमा आवद्ध छन । यी धर्मावलम्बीहरु शनिबार बिहान यही प्रार्थना भवनमा पाठ गर्छन । बिस २०६५ मा विधिवत दर्ता भएको संस्था सामाजिक कार्यमा समेत अग्रसर रहेको एल्डर डिकन ईन्द्र बहादुर रानाले बताए ।
आर्थिक रुपमा कमजोर भएका परिवारलाई सहयोग समेत गर्दै आएको छ ।