खोज

बुटवल २३ मंसिर । देशको आर्थिक समृद्धिका लागि रेमिट्यान्स नभई स्थानिय उत्पादनको बजारीकरण आजको आवश्यकता भएको तर्क पेश गर्दै कालिका मानव ज्ञान माबिकी छात्रा करिना खनालले १२ औं संस्करणको एभरेष्ट अन्तर विद्यालयस्तरीय वादविवाद प्रतियोगिताको उपाधि आफनो नाममा गराईन । श्रम निर्यात गरेर कुनै पनि देश समृद्धि भएको ईतिहास नरहेको विकाससिल देशको उदाहरण दिदै उनले स्वदेशमा नै युवालाई रोक्ने गरि कच्चा पदार्थको उत्पादन, खपतसंग बजारीकरणमा जोड दिनुपर्ने बताईन । खनालको प्रस्तुति, खण्डन, तार्कितता, भाषाशैली, उपसंहारका आधारमा विजेता घोषित गरिएको निर्णायक बरिष्ठ साहित्यकार ऋषिराम भुसालले बताए । उपाधिसंगै उनले नगद १५ हजार रुपैया, शिल्ड तथा प्रमाणपत्र हात पारिन् ।

प्रतियोगितामा नवज्योति इङ्लिस बोर्डिङ स्कुल तिलोत्तमाकी विद्यार्थी रक्षा मिश्र द्वितीय भइन् । उनले नगद १० हजार रुपैया, शिल्ड तथा प्रमाणपत्र हात पारिन् । लिटिल फ्लावर्स इङलिस माध्यमिक विद्यालय फर्साटिकरका विद्यार्थी समर्थ फौदार क्षेत्रीले तृतीय स्थान हासिल गरे । उनले नगद ६ हजार रुपैया तथा मणिमुकुन्द माध्यमिक विद्यालय बुटवलका विद्यार्थी एन्जल बेल्वासेले प्रोत्साहन पुरस्कार सहित नगद तीन हजार रुपैया, शिल्ड तथा प्रमाणपत्र हात पारिन् । प्रतियोगितामा रूपन्देही जिल्लाभरीका सामुदायिक र संस्थागत विद्यालयगरी १७ विद्यालयको सहभागिता रहेको थियो ।

कार्यक्रममा विजेता, उपविजेता विद्यार्थीहरुलाई प्रदेश परीक्षा ब्यवस्थापन कार्यालय लुम्विनीका प्रमुख रमाकान्त तिवारी, बुटवल उपमहानगरपालिका वडाध्यक्ष यज्ञप्रसाद पंगेनी, एन प्याब्सन नेपालका केन्द्रीय सचिव कृष्णप्रसाद पौडेल, केन्द्रीय सदस्य विष्णु पौडेल, अभिभावक महासंघका केन्द्रीय सदस्य लोकनाथ ज्ञवाली, नेपाल पत्रकार महासंघका अध्यक्ष रामराज पोखरेल, परिक्षा ब्यवस्थापन कार्यालयका अधिकृत बाबुराम भण्डारी, विद्यालयका प्राचार्य कृष्ण न्यौपाने, सहप्राचार्य भिमसेन गौतम लगायतले प्रतियोगिताका विजयी विद्यार्थीलाई पुरस्कार वितरण गरेका थिए ।