खोज

प्रदीप ज्ञवाली
सैनामैना, २२ मंसिर ।

रुपन्देहीको सैनामैना नगरपालिका वडा नं. ६ कलौनीमा रहेको सहिद नारायण पोखरेल रामपुर क्याम्पसमा नाटक मञ्चन कार्यक्रम सम्पन्न भएको छ । क्याम्पसमा रहेको साहित्यिक क्लवको आयोजनामा कार्यक्रम भएको हो ।

युवावर्गलाई राजनीतिको नाउँमा मुर्दावाद र जिन्दाबादको दोसाँधमा उभ्याएर बेरोजगार बनाएको र युवा विदेशीन बाध्य पारिएको चित्रलाई दर्शाउदै देश र राजनीति शीर्षकमा नाटक मञ्चन गरिएको हो ।

सत्तालाइ चुनौती दिदै उज्जवल मार्ग देखाउने हेतले राज्यको नीति लागू गरी राजनीतिको वास्तविक अर्थ बुझाउनुपर्नेछ भन्ने नाटकको सार रहेको थियो ।

उक्त नाटकको लेखन अञ्जली घिमिरेले गरेकी हुन । लेखीका घिमिरेकै परिकल्पना र निर्देशनमा रहेको नाटक देश र राजनीति हेरिरहँदा दर्शक पनि निकै गम्भीर मुद्रामा देखिन्थे ।

नाटक मार्फत देशको वास्तविक अवस्थालाई देखाउने प्रयास गरिएको थियो । घटना, पात्र र परिवेश मार्फत हालसम्म भइरहेको सत्ताको हानथापलाई नाटक मार्फत देखाउँदा नाटक रुचिकर बनेको लेखिका एवम निर्देशक घिमिरे बताउँछिन् ।

आफ्नो शक्ति अनि स्वार्थको लागि हुने आपसी टकराव, संघर्ष र लुछाचुँडी र यसको युवामा पर्ने प्रभाव यसको विषयवस्तु नाटकमा रहेको थियो ।

नाटकमा देशमा भइरहेका गतिविधिलाई दर्शकले नजिकबाट बुझ्न पाएको आयोजकले बताएका छन् ।

देश बिर्सिएका कैयौ युवावर्गलाइ स्वदेश फर्किएर कर्मठशील बनेर आफ्नै देशमा मिहिनेत अनि संघर्ष गर्नुपर्छ भन्ने उद्देश्यलाइ आत्मसात गर्दै कार्यक्रमको आयोजना पनि गरिएको हो । जहिल्यै देश बिग्रियो वा देशको जिम्मेवारी बोकेका अभिभावकहरु भ्रष्ट भए भन्ने गुनासोलाई पुनः दोहोर्याउन नपरोस् भन्ने हेतुले प्रदर्शन गरिएको हो ।

अस्तव्यस्त जनजीवनलाई नियाल्दा चिसो पसेको छ देशप्रेमी हुँ भन्नेहरुको हृदयमा देशका लागि प्रस्फुटित हुन नसकेका लाखौ भावनाहरु नाटकद्वारा मन्चन गरी देशप्रेमको वास्तविक अर्थ बुझाउन सफल भएको यस नाटकको लेखिका घिमिरे बताउँछिन् ।

कार्यक्रममा मन्तव्य राख्दै क्याम्पसका प्रमुख हेमबहादुर थापाले क्याम्पसमा रहेका विद्यार्थीहरुको प्रतिभा र क्षमतालाई क्याम्पसले सधै उचित स्थान दिने बताए । विद्यार्थीको प्रतिभा उजागर गर्न आफुहरु लागि परिरहेको उनले बताए ।

साहित्यिक क्लबका संरक्षक यदुलाल पन्तको अध्यक्षतामा भएको कार्यक्रममाा क्याम्पस प्रमुख हेमबहादुर थापा, साहित्यिक क्लवका प्रमुख अञ्जली घिमिरे (सुप्रियाञ्जली), सुशिला गौतमलगायतले नाटकले वर्तमान परिवेशलाई उजागर गरेको बताएका थिए ।