खोज

काठमाडौं,२२ मंसिर । नेपाली कांग्रेसका महामन्त्री गगन थापाले एनसेलको सेयर स्वामित्व खरिद बिक्रीमा नेपालको राजनीतिक र प्रशासनिक नेतृत्वको साँठगाँठ भएको आशंका गरेका छन् । शुक्रबार प्रतिनिधिसभाको राज्य व्यवस्था समितिमा बोल्दै उनले एनसेलको स्वामित्व खरिद बिक्री रातारात नभएको बताए ।

एनसेलको सन्दर्भमा जे कुरा भएको छ, रातारात भएको होइन, राजनीतिक नेतृत्व र प्रशासनिक नेतृत्वको ठूलो साठगाँठ, ठूलो भरथेग, ठूलो भरोसा नभई यो कुरा नभएको थापाले दावीका साथ भने ।

गत हप्ता मलेसियाली कम्पनी आजियटाले एनसेलको आफ्नो भागमा रहेको सेयर गैरआवासीय नेपाली सतीशलाल आचार्यको कम्पनी स्पेक्ट्रलाइट युके लिमिटेडलाई ५ करोड डलरमा बिक्री गरेको सार्वजनिक भएको थियो । उक्त कारोबार आकस्मिक र अविश्वसनीय रहेको भन्दै प्रश्न उठिरहेको छ ।

एनसेलको बिक्री छानबिन गर्न सरकारले समिति पनि गठन गरिसकेको छ । शुक्रबार राज्य व्यवस्था समितिको बैठकमा कांग्रेस महामन्त्री थापाले कर अधिकृतले गर्न सक्ने छानबिनमा सरकारले समिति नै बनाएको भन्दै समितिले ढाकछोप गर्नतिर जान सक्ने आशंका गरे ।

सरकारले एनसेल बिक्री कुनै मन्त्रालयको विषय होइन, समिति बनाएर हेर्छु भनेको भन्दै समितिले ठीक ढंगले काम गर्छ कि गर्दैन हेर्नुपर्ने बताएका हुन् ।

एनसेल बिक्री प्रकरणमा संसदीय समिति कसैको प्रभावमा पर्दैन भन्ने विश्वास हुने गरी काम गर्नुपर्ने पनि महामन्त्री थापाले बताए ।

एनसेलको लगानीकर्ता आजियटाले जाँदाजाँदै नेपालमा लगानीको वातावरण नभएको भनी दिएको वक्तव्यको पनि उनले विरोध जनाए । नेपालमा धेरै मुनाफा कमाउने, राज्यका माथिल्लो ओहोदाका व्यक्तिहरुसँग बाक्लो उठबस गर्ने तर वैदेशिक लगानी गर्ने ठाउँ होइन भनेको भन्दै थापाले विरोध जनाएका हुन् ।