खोज

बुटवल, २० मंसिर । पुषको पहिलो हप्ता बुटवल मण्डपमा लाग्ने मेला रुपन्देहीकै पहिचानको रुपमा रहेको छ । यो वर्ष रुपन्देही ब्यापार संघले मेला आयोजना गर्दै छ । ‘स्वरोजगार आत्मनिर्भरता हाम्रो आधार, शहरदेखि गाउसम्म ब्यापार बिस्तार’ नारासहित पुस ५ देखि १८ गतेसम्म आयोजना गरिने मेलाको तयारीको बारेमा बुधबार मेलास्थलमा पत्रकार सम्मेलन गरिएको छ ।

लुम्बिनी एक्स्पो २०८० अन्तराष्ट्रिय व्यापार मेला नाम अनुसार नै आर्कषक, नबिनतम प्रविधि र ज्ञान दिने गरि स्टलहरु राख्न सहभागी पत्रकारहरुले आयोजकलाई सुझाव दिए । लुम्बिनी एक्स्पोमा नाम अनुसार नै नया ज्ञान हुने र सृजनसिल बनाउन उनिहरुले आग्रह गरे ।
कार्यक्रममा संघका अध्यक्ष कृष्ण प्रसाद घिमिरेले यसपटक नया स्थाई संरचनामा गरिने मेलाको रौनक थप्ने दाबी गरे । मेला तयारीका लागि ४५ वटा विभिन्न उपसमिति निर्माण गरि आवश्यक तयारीमा जुटेको उनले बताए । मायादेवी मन्दिरको स्वरुपमा मुल गेट निर्माण गरिने उनले बताए । मेलामा विभिन्न जातजाति र संस्कृति जगेर्ना गर्ने गरि झाकी प्रर्दशन, मेला अवधिमा कला, संस्कृति झल्किने नृत्य, आईडल लगायत कार्यक्रमहरु हुने उनले बताए । मेलामा दैनिक उपभोग्य बस्तु तथा सेवा, साना तथा घरेलु उद्योग, जडिबुटी तथा कृषि उत्पादन, औधोगिक मेशिनरी तथा उपकरण, हस्तकलाका उत्पादन, अटोमोबाईल, ईलेक्ट्रोनिक्स एण्ड ईलोक्ट्रिकल्स, मोबाईल सुचना प्रविधि, टेक्सटाईल, गार्मेन्ट्स तथा फुटबेयर, फर्निचर तथा फर्निसिङ लगायतका स्टलहरु रहने उनले बताए ।

कार्यक्रममा नेपाल पत्रकार महासंघ रुपन्देहीका अध्यक्ष रामराज पोखरेलले मेलाको नाममा बढेको विकृतिलाई रोक्ने गरि अभियान थाल्न सुझाव दिए । बुटवल बजारको चहलपहल बढाउने गरि योजना ल्याउनुपर्ने भन्दै मेलामा सामान बेच्नेभन्दा पनि गुणस्तरीय र उत्पादन चिनाउने गरि स्टलहरु लगाउनुपर्ने उनले बताए ।

मेलामा ५ सय स्टल, १० लाख दर्शकले अवलोकन गर्ने र ५० करोड रुपैया बराबर कारोबार हुने लक्ष्य रहेको संघका महासचिव दया भण्डारीले बताए ।

कार्यक्रममा पुर्व अध्यक्ष टंकप्रसाद पोखरेल, मोतिलाल पाण्डे, निवर्तमान अध्यक्ष यमलाल लोहनी, सचिव तथा प्रचार संयोजक फर्सुराम पोखरेलले नया प्रविधि र उपकरण चिनाउनेमात्र नभई अन्तरक्रिया कार्यक्रमहरु समेत गरिने बताए ।