खोज

बुटवल,१८ मंसिर । मानव अधिकारबादी नेता कृष्ण पहाडीले लोकतन्त्र रक्षाका लागि बेलैमा सचेत रहन दलहरुलाई आग्रह गरेका छन् । लोकतन्त्र रक्षाका लागि दलहरु नलाग्ने हो भने लोकतन्त्र गुम्ने र उनीहरुलाई इतिहासले क्षमा नगर्ने उनको भनाई छ । मानव अधिकार तथा शान्ति समाज रुपन्देहीद्वारा बुटवलमा आयोजित लोकतन्त्रको प्राण ः सुशासन र सद्भाव बिषयक नागरिक संवाद कार्यक्रमलाइ सम्बोधन गर्दै उनले लोकतन्त्र बचाँँउन साझा संकल्प गर्नुपर्ने उल्लेख गरे ।
‘‘बेला छदै उपचार गरौँ,अराकताबादी खेती नगरौँ,धर्म र जातीको मुद्धामा दाइले भाइलाइ मार्छ’–पहाडीले भने –‘मुलुकमा सुशासन नभए लोकतन्त्र टिक्न सक्दैन ।’ संघीयताले मुलुकलाइ तोड्ने नभइ जोड्ने काम गर्नुपर्ने धारणा राख्दै उनले नेपालका दलहरु सर्पको मुखको भ्यागुताजस्तो भएको टीप्पणी गरे । ‘संघीयताको दोष छैन,दोष त भ्रष्टाचार हो,कुसंस्कार हो ’ उनले भने –‘सिंहदरबारको अधिकारसंगै भ्रष्टाचार पनि प्रत्यायोजन भयो,मुलुकमा सुशासन नभए लोकतन्त्र टीक्दैन ।’
दलहरु सत्ता केन्द्रित मात्रै हुदाँ परिवर्तनमाथि प्रश्न उठ्न थालेको उनको भनाइ छ ।
फरक प्रसंगमा पहाडीले क्रान्तिको दुहाईले भ्रष्टाचारमा उन्मुक्ति दिन नसकिने भन्दै प्रधानमन्त्री पुष्पकमल दाहाल प्रचण्डले सडक आन्दोलन गर्छु भनेर धम्क्याउनु गलत भएको बताए । माओबादीका नेता मुछिएका काण्डहरु बाहिर आउदा प्रधानमन्त्री मौन रहनु लज्जाजनक भएको तर्क गरे ।

मानव अधिकार तथा शान्ति समाजका केन्द्रय सभापति रामकृष्ण बरालले शान्ति समाजले बिभिन्न मुद्धामा अभियान चलाइरहेको उल्लेख गरे ।जनताका एजेण्डालाइ केन्द्रमा राखिएको उनको तर्क छ ।

सो अवसरमा समाजको अवधारणापत्र प्रस्तुत गर्दै निवर्तमान केन्द्रिय सभापति तथा सल्लाहकार गोबिन्द खनालले लोकतन्त्र रक्षाका लागि नागरिक संकल्प आवश्यक रहेको बताए । खनालले लोकतन्त्रको रक्षाका लागि सुशासनको प्रत्याभूति र सद्भाव प्रवद्र्धन आजको आवश्यकता रहेको उल्लेख गरे ।

कार्यक्रममा नेकपा माओबादी केन्द्रका नगर अध्यक्ष महेन्द्र भुसालले जनयुद्धकै कारण देशमा सामन्तको अन्त्य भएको दाबी गरे। उनले दलहरुको बिकल्प दलहरु नै भएको उनको भनाइ छ ।

नेपाली कांग्रेस क्षेत्र न २ का सभापति प्रजापाल गिरीले दलहरु बलियो बन्ने तर जनता कमजोर बन्ने परिस्थिती बनाउन नहुने बताए । लोकतन्त्र र संघीयताको बिकृत पक्षलाइ समाधान गर्नुपर्ने उनको धारणा छ ।

कार्यक्रममा पत्रकार डा बालकृष्ण चापागाइले यतिबेला मुलुकमा ग्रहण लागेको भन्दै शान्ति समाजले मूर्त एजेण्डा बनाउनुपर्ने बताए । लेखक ऋषि आजादले लोकतन्त्रबादी शक्तिहरु एकजुट बनेमा राजतन्त्र नफकर्ने ठोकुवा गरे । उनले चुनावमा एमालेले राजाबादी शक्ति बोक्दा र कांग्रेसले माओबादीलाइ बोक्दा अहिलेको परिस्थती आएको तर्क गरे।

सहकारी अभियान्ता बसन्तप्रसाद ढकाल,बुटवल उद्योग बाणिज्य संघका उद्योग उपाध्यक्ष सुरज भट्टराइ,पत्रकार महासंघ रुपन्देहीका अध्यक्ष रामराज पोखरेल ,तुल्सीराम बञ्जाडे,फार्मेसी संघका गणेशप्रसाद सेढाइ,नागरिक समाजका उपाध्यक्ष रामकृष्ण हमाल,प्रगतिशिल पत्रकार संघ नेपालका केन्द्रिय अध्यक्ष श्यामलाल पोखरेल,महिला अधिकारकर्मी रिता सेन ओली,रामु भुसाल,जेष्ठ नागरिक दण्डपाणी पौडेल,हरि कंडेल लगायतले बोल्दै लोकतन्त्र बचाँउन सबै एक ठाउमा उभिनुपर्ने धारणा राखे ।

सो अवसरमा मानव अधिकार तथा शान्ति समाज रुपन्देहीका सभापति खिमप्रसाद भट्टराई कृष्ण, उपसभापति कपिल ज्ञवाली, सचिव कृष्ण पाण्डेले पनि आफ्ना धारणा राखेका थिए ।