खोज

बुटवल, ११ मंसिर ।

तिलोत्तमा उद्योग बाणिज्य संघको आयोजना तिलोत्तमामा जारी तेस्रो राष्ट्रिय औद्योगिक व्यापार मेला तथा कृषि एवम् पर्यटन प्रवर्द्धन महोत्सव सकिन लाग्दा पनि अधिकांश स्टल खाली रहेका छन् । मेला स्थलमा व्यापार व्यवसायीहरुले चाँसो नदिँदा मेलाका अधिकांश स्टल खाली रहेका हुन् । कतिपय स्टलमा भने विद्यार्थीहरुले क्रिकेट समेत खेल्ने गरेको पाइएको छ ।

मेला स्थलमा राखिएको स्टल खाली भएपछि विद्यार्थीहरुले क्रिकेट खेल्दै गरेको दृश्य सोमबार देखिएको थियो । सोमबार दिउँसो मेलास्थलमा बुटवल टुडे कर्मी जाँदा मेला स्थलमा राखिएको स्टलमा विद्यार्थीहरुले ब्याट बल समाएर क्रिकेट खेल्दै गरेका थिए ।

मेला आयोजना तिलोत्तमा उद्योग बाणिज्य संघले यो मेला थप ५ दिन थपेको जनाएको छ । तर दर्शकहरुको संख्या भने दिन प्रतिदिन नै कम हँुदै गएका हुन । पुर्व घोषित योजना अनुसार मंसिर १२ गते मेला समापन हुने भनिएको भएपनि अध्यक्ष गुणानिधी भण्डारीले मेला ५ दिन थपिएको बताएका हुन् ।

मेला स्थलमा आयोजना गरिएको पत्रकार सम्मेलनमा उनले मेला ५ दिनको लागि थपीएको बताए । मेला स्थलमा राखिएका स्टल खालीको विषयमा भने उनले पुर्ववत रुपमा अनुमान गरिएअनुसार स्टलधनीहरु नआएको बताए । उनले कतिपयले पहिला बुकिङ्ग गरेको भएपनि उपस्थिति नभएको बताएका थिए ।

 तिलोत्तमा नगरपालिकाले २०७९ चैत ७ गते सूचना प्रकाशन गरी नगरपालिका भित्र सुर्ती र गुट्खाजन्य कुनै पनि पद्धार्थ विक्री गर्न नपाईने उल्लेख गरेको थियो । सूचना अनुुसार नगरपालिकाभित्र गुट्खा बिक्री गरे ५० हजारसम्म जरिवाना हुने उल्लेख गरिएको भएपनि तिलोत्तमा नगरपालिकामा जारी महोत्सवमा भने खुलेयाम रुपमा पान, गुट्का विक्रि भैरहेको छ ।

मुख्य सचिवालयको केही मिटर दुरीमा रहेको वाल उद्यान अगाडि नै पान पसल राखेर गुट्का, पान विक्रि भैरहेको पाइएको छ ।

बनारसी पामन भण्डार नामबाट त्यहाँ सुर्तीजन्य पान विक्री भैरहेको हो । यो विषयमा तिलोत्तमा नगरपालिका र मेला आयोजक संस्था समेत मौन बसेको छ ।

रमाईलाको नाममा अवैध जुवाः मेला स्थलमा कुनै पनि जुवा वा सर्कसजन्य गतिविधि गर्न पाईदैन । तर तिलोत्तमा नगरमा आयोजित महोत्सवमा गिलास फोड्ने सर्कस समेत बनाइएको छ । जहाँ ५ रुपैयाँमा ५ वटा बल लिएर त्यसलाई सबै बल फोड्न सकेमा १०० रुपैयाँ पाउने गरी अवैध खेल खेलाइएको छ । मेला स्थलको मुख्य चौरको नजिकै यस्तो प्रकृतिको खेल खेलाइएको हो । जसलाई एक प्रकारको जुवा नै भन्ने गरिन्छ ।

मेलामा औद्योगिक प्रविधि, रेष्टुरेन्ट, कृषि, हस्तकला, गार्मेन्ट, बेकरी तथा कन्फेक्सनरी, छालाजुत्ता, खाद्यान्न, आइटी लगायत बिभिन्न प्रकृतिका २५४ स्टलहरू रहेको आयोजकको दावी रहेपनि अधिकांश स्टल खाली रहेका छन् ।

मेलाको अवलोकनको लागि ८० रुपैयाँ टिकट शुल्क निर्धारण गरिएको छ भने विद्यार्थीलाई ५० प्रतिशत छुट र ७० वर्ष भन्दा माथिका जेष्ठ नागरिकलाई निःशुल्क प्रवेशको व्यवस्था रहेको महासचिव राजकुमार पाण्डेय बताए । मेलाको टिकट समेत महंगो भएको मेला स्थलमा जाने दर्शककले गुनासो गर्दै आएका छन् ।