खोज

नवलपुर, ८ मंसिर ।

नवलपरासी पूर्वको एक विद्यालयले सैद्धान्तिक शिक्षा संगसंगै प्रयोगात्मक शिक्षालाई समेत जोड दिन थालेपछि अहिले विद्यार्थीहरु विद्यालयमा गुन्द्री बुनेर प्रयोगात्मक अभ्यास गर्न थालेका छन् ।

कावासोती नगरपालिका वडा नं. १२ मा रहेको नेपाल राष्ट्रिय आधारभूत विद्यालयले पहिलो पटक जिल्लामै विद्यार्थीलाई गुन्द्री बुन्ने पेशामा समेत अब्बल बनाउन अहिले विद्याालयले पराल खरिद गरी गुन्द्री बुन्न थालेको विद्याालयकी शिक्षिका मना शर्मा अधिकारीले बताईन् ।

विद्यालयका विद्यार्थीहरुले अहिले विद्यालयमा सैद्धान्तिक शिक्षा संगसंगै प्रयोगात्मक शिक्षालाई पनि अघि बढाएपछि विद्यार्थीले गुन्द्री बुनेर बिक्री गर्ने आम्दानी मध्ये विद्यार्थीलाई समेत केही रकम दिने र बाँकी विद्यालयको खातामा आम्दानी बाँध्ने बिद्यालयले नीति नै बनाएको प्रधानाध्यापक दधिराम परियारले बताए ।

अहिले समाजमा गुन्द्री लोप हुन थालेको छ । लोप हुन लागेको गुन्द्री बुन्ने पेशामा फर्काउन सके मात्र पनि यसको ब्यापार बढ्ने र संगसंगै प्रयोगात्मक शिक्षामा पनि दख्खल बनाउन सकियो भने भबिष्यमा यस्ता काम गरेर पनि आर्थिक जीविकोपार्जन गर्न मद्दत पुग्ने विश्वास विद्यालयले गरेको शिक्षिका अधिकारीको भनाई छ ।

विद्यालयले गत कात्तिक महिनामा पराल खरिद गरेको र अहिले त्यो पराल सुकाएर विद्यार्थीलाई एक पिरियड प्रत्येक कक्षामा अध्ययनरत छात्रालाई सहभागी गराएर गुन्द्री बुन्ने कार्यमा सरिक बनाउने गरेको प्रधानाध्यापक परियारले बताए ।

लोप हुन लागेको यो पेशातर्फ आकर्षण बढाउन र विद्यार्थीलाई संैद्धान्तिक शिक्षासंगै प्रयोगात्मक शिक्षातर्फ अभिप्रेरित गर्न विद्यालयले गरेका यस्ता कार्यले राम्रो सन्देश जाने कावासोती नगरपालिकाका प्रमुख बिष्णुप्रसाद भुसालले बताए ।

कावासोतीको यो विद्यालयले गरेका उदाहरणीय कामले यहाँका विद्यार्थीसंगै अभिभावक समेत खुुशी भएको कावासोतीका पूर्व शिक्षक गोपाल बस्ताकोटीले बताए ।