खोज

काठमाडौं ७ मंसिर ।

नेपाल कम्युनिष्ट पार्टी एमालेको भातृ संंगठनहरु युवा संघ नेपाल, अखिल नेपाल राष्ट्रिय स्वतन्त्र विद्यार्थी युनियन तथा मेडिकल ब्यवसायी दुर्गा प्रसाई नेतृत्वले बिहीबार काठमाडौंका दुई छुट्टाछुट्टै स्थानमा कार्यक्रम सम्पन्न गरेका छन् ।

काठमाडौको तिनकुनेमा युवा संघ, अनेरास्ववियुले तथा बल्खुमा प्रसाई समूहले कार्यक्रम गरेका हुन् । युवा–विद्यार्थी विशेष कार्यक्रम नाम दिईएको युवा संघ र अनेरास्ववियुले आयोजना गरेको सरकार विरुद्धको कार्यक्रम शान्तिपूर्ण रुपमा सम्पन्न भएको छ । त्यस्तै, राष्ट्र, राष्ट्रियता, धर्म, संस्कृति र नागरिक बचाउ अभियानको नेतृत्व गर्दै बल्खुमा भएको कार्यक्रम तनावग्रस्त भएको थियो ।

कार्यक्रमको सुरुवातमा कलंकीबाट तिनकुने जाँदै गरेका युवा संघको मोटरसाईकल र्यालीमाथि प्रसाई समूहले ढुंगा हानेपछि भएको झडपका कारण केहीबेर स्थिति तनावग्रस्त भएको हो । केहीबेर कार्यक्रम स्थल शान्त भएपनि आन्दोलनकारीले पटक पटक सरकारले निषेध गरेको क्षेत्रको घेरा तोडेर अगाडि बढ्न खोजेपछि प्रहरीले पानीको फोहोरासंगै अश्रु ग्याँस पनि प्रहार गरेको थियो । केहीबेर ढुंगा हानाहान हुनुका साथै प्रहरीले आन्दोलनकारीलाई र आन्दोलनकारीले प्रहरीलाई लखेटा लखेट गरेको दृश्य देखिन्थ्यो ।

आन्दोलनकारी र प्रहरीको झडपमा केही आन्दोलनकारी घाईते भएको प्रसाई समूहले बताएको छ । काठमाडांैका विभिन्न स्थानबाट नेपालको झण्डा बोकेर आएका आन्दोलनकारीले हाम्रो राजा हाम्रो देश, प्राण भन्दा प्यारो छ, हिन्दुराज्य कायम गर साथै गणतन्त्र मुर्दावाद जस्ता नारा लगाएका थिए ।

प्रसाईको आन्दोलनमा सहभागी मकवानपुरका मनोज थापाले भ्रष्टाचारी राजनीतिक दलका नेताका कारण जनता आजित भएकाले राजाको विकल्प नभएको बताए । उनले भ्रष्टाचार अन्त्य गर्न, विकृति, विसंगती निर्मुल पार्न, हिन्दु राज्य कायम गर्न देशमा संवैधानिक राजाको आवश्यक देखिएकाले प्रसाई नेतृत्वको अभियानलाई साथ दिएको बताए । त्यस्तै कार्यक्रम स्थलमा भेटिएका गोदावरीका सुमन श्रेष्ठले पनि अभियान शुरु भैसकेको बताउँदै डडेलो लाग्न शुरु भैसकेको छ । फैलिन बेर लाग्दैन, त्यसैले यो आन्दोलनलाई सानो नठान्न चेतावनी समेत दिए ।

उता, तिनकुनेमा युवा विद्यार्थीले महंगी, भ्रष्टाचार, अनियमितता, अराजकता, सामाजिक र धार्मिक सहिष्णुता र सद्भाव भड्काउने आपराधिक गतिविधि विरुद्ध भन्दै यवा संघले शान्तिपूर्ण रुपमा सरकारको विरोध गर्दै कार्यक्रम गरेको हो । कोणसभा गर्नुअघि काठमाडौं उपत्यकाका विभिन्न स्थानबाट युवा–विद्यार्थीको विशाल र्याली समेत निकालिएको थियो । उनीहरुले पार्टीको झण्डा, युवा संघ र अनेरास्ववियुको झण्डा र राष्ट्रिय झण्डासहित सरकारका बेथिती विरुद्ध नारा लगाएका थिए ।

युवा संघले अयोजना गरेको कार्यक्रममा बोल्दै एमाले नेता महेश बस्नेतले महँगी, भ्रष्टाचार र अनिमियतता विरुद्ध कार्यक्रम भएको बताए । उनले प्रचण्ड सरकारको आयु छोटो भएको भन्दै सरकार विरुद्धको कार्यक्रम निशेधाज्ञासम्म नपुगोस् भनेर आग्रह गरे । नेता बस्नेतले दुर्गा प्रसाई जस्ता मान्छे ज्ञानेन्द्र शाहको साथ पाएर एमालेको विरोध गरेर रमाई रहेको आरोप समेत लगाए ।

कार्यक्रममा सहभागी युवा संघका विजय अधिकारीले युवा र विद्यार्थीको कार्यक्रम सरकार विरुद्ध भएको प्रष्ट पारे । उनले भने, “हाम्रो कार्यक्रम जनताको पक्षमा, जनजीविकाको पक्षमा, बेथिती, भ्रष्टाचार, तस्करी र महंगीको विरुद्धमा हो । उनले युवा संघको कार्यक्रम धेरै पहिले आज दिन गर्ने तय भएको बताउँदै भने दुर्गा प्रसाईले कार्यक्रम जुधाएका हुन । युवा संघको कार्यक्रम पहिले नै तय भएको थियो । दुवै पक्षको प्रदर्शनलाई मध्यनजर गर्दै प्रहरीले विशेष सुरक्षा योजना लागु गरेको थियो ।