खोज

जाजरकोट भुकम्प प्रभावितहरू भुकम्प गएको करिब तीनसाता हुँदापनि त्रिपाल र टहरामै बस्न बाध्य भएका छन । सरकारको फितलो समन्वयका कारण १० जना भुकम्प पीडितको चिसोकै कारण ज्यान गएको छ । प्रभावितहरूले जाडोको बेलामा पनि टहरा र त्रिपालमै दिनरात बिताउनु परेको भन्दै सरकारप्रति तीब्र असन्तुष्टी जनाएका छन । सरकारले एकद्वार प्रणालीमार्फत राहत संकलन र बितरणको काम गर्ने भनेपनि राहत वितरणमा राजनीति हावी भएको देखिएको छ । सरकारको ढिलासुस्ती र गैरजिम्मेवारीले भुकम्प पीडितहरूले सास्ती पाएका छन । अझैपनि अधिकांश भूकम्प प्रभावितहरू अझै टहरामै बस्न बाध्य छन् । जाडो मौसम शुरू भैसकेको छ । यो वर्ष अति प्रभावित क्षेत्रका भूकम्पपीडितहरू जाडोमा कठ्याग्रिनु पर्ने निश्चितजस्तै छ । सरकारबाट दिने भनिएको अनुदान रकम समयमै उपलब्ध हुन सकेको छैन । विभिन्न राजनैतिक दलका कार्यकर्ताहरूले भुकम्प प्रभावित क्षेत्रमा पुनर्निर्माणको काममा संलग्न हुने भनिएपनि प्रभावकारी काम हुन सकेको छैन । राजनीतिक दल तथा नेताहरूले भूकम्पपीडितहरूलाई सपना बाँड्दै छन् । तर भूकम्पपीडितको अवस्था भने जस्ताको त्यस्तै छ । यो जाडोमा पनि भूकम्पपीडितहरूले जाडोमै टहरामा कठ्याङ्ग्रिनुपर्ने निश्चित छ । नेपाली कांग्रेस र नेकपा एमालेले भुकम्प प्रभावित क्षेत्रमा आफ्ना नेता तथा कार्यकर्तालाई खटाएका छन । त्यहाँ अहिले पुनर्निर्माणको भन्दा पनि चिसोबाट बचाउन नागरिकलाई न्यानोका आवश्यकता छ । त्यसतर्फ सरकार र राजनैतिक दलहरूले बढी चिन्ता गर्नुपर्ने छ । अर्कोतर्फ विदेशबाट भुकम्प पीडितका लागि आएको सहायता सामाग्री बितरणमा समेत मनोमानी भएको र अनियमितता देखिएको छ । सरकारले समन्वय गर्ने भनेको छ तर समन्वयकारी भूमिका निर्वाह गर्न सकेको छैन । कतै भुकम्प पीडितका नाममा आएको सहयोग र सहायता सामाग्री दुरूपयोग हुने चिन्ता बढेको छ ।

भुकम्प प्रभावित क्षेत्रमा तत्काल गर्नुपर्ने काम भनेको स्थानीय जनतालाई चिसोबाट बचाउनु हो । त्यहाँ अहिलेपनि सयौं स्थानीय भुकम्प प्रभावित विरामी परेका छन । सुत्केरीले पोषण पाएका छैनन, उनीहरूको नाबालक बालबालिकाहरूका लागि औषधीको समेत ब्यवस्था छैन । चिसोले हुने दम, निमोनिया लगायतका रोगका कारण थला परेको अवस्था छ । त्यसतर्फ सरकारको ध्यान जानु जरुरी छ । विशेषज्ञ चिकित्सकको खाँचो देखिएको छ । अर्कोतर्फ सरकारले राहत सामाग्री उपलब्ध गराएपनि साँझ विहानको छाक टार्न र पकाउने सामाग्रीको अभाव भएको भन्दै पीडितहरूले गुनासो गरेका छन । त्यसतर्फ सरकारको ध्यान पुगेको छैन । तत्कालका लागि त्यहाँ अझैपनि राहतलाई प्रभावकारी बनाउनु जरुरी छ । त्यसपछि बल्ल पुनर्निर्माणको कामलाई गति दिनुपर्दछ । तसर्थ सरकारले भुकम्प पीडितहरूलाई त्रिपाल र टहरामा बसिरहेकाहरूलाई सुरक्षित बनाउनु जरुरी छ । अधिकांश घर भत्किएकोले तत्कालै सवै घर बनिसक्ने अवस्था नभएको अवस्थामा अन्तर्राष्ट्रिय मापदण्डका सामूहिक बासस्थानको व्यवस्था गर्नु जरुरी छ । त्यसतर्फ सरकारको ध्यान जाओस् । चिसो बढ्दै गएकोले भुकम्प पीडितहरूलाई चिसोबाट बचाउने र उपचार सेवा प्रभावकारी बनाउनेतर्फ कमी नहोस् ।