खोज

भैरहवा, ६ मंसिर ।

उद्योग वाणिज्य तथा आपूर्ती मन्त्री रमेश रिजालले घरेलु तथा साना उद्योगलाई सरकारले प्रवद्र्धन गर्ने बताएका छन् ।

राष्ट्रिय उत्पादनको वृद्धि गरी पर्यटन प्रवद्र्धन गरौँ राष्ट्रिय उत्पादनको प्रयोग गरी राष्ट्रिय अर्थतन्त्रमा आत्मनिर्भर बनौँ भन्ने मूल नाराका साथ भैरहवामा मंसिर ६ गते देखि १८ गते सम्मका लागि सुरुवात भएको छैठौँ लुम्बिनी प्रादेशिक महोत्सव २०८० लाई सम्बोधन गर्दै मन्त्री रिजालले औद्योगिक विकासमा टेवा पुर्याउने हेतुले मझौला, घरेलु तथा साना उद्योग प्रवद्र्धन गर्ने नीतिको मस्यौदा तयार गरिसकेको र सरोकारवालासंग छलफल गरी नीतिलाई अन्तिम रुप दिने तयारी भएको बताएका छन् । कृषि क्षेत्रको प्रवद्र्धनका लागि सेज सञ्चालन गर्ने प्रतिबद्धता समेत उनले गरे ।

नयाँ औद्योगिक मस्यौदा तयार पार्ने कामको सुरुवात भइसकेको बताउँदै उनले आफ्नै मुलुकमा उत्पादन हुने वस्तुहरुको आयात भएको, कृषिमा आत्मनिर्भर बनाउन आवश्यक नीति बनाई कार्यान्वयन गर्ने समेत प्रतिवद्धता ब्यक्त गरे । खुला सीमाका कारण हुने अवैध तस्करी रोकथामका लागि मन्त्रालयको तर्फबाट आबश्यक पहले लिने उनले प्रतिबद्धता ब्यक्त गरे ।

संघीय मामिला तथा तथा सामान्य प्रशासन मन्त्री अनिता देवी शाहले भगवान गौतमबुद्धको जन्मस्थलमा रहेको गौतमबुद्ध अन्तर्राष्ट्रिय विमानस्थल पूर्णरुपमा चलेपछि यस क्षेत्र चलायमान हुने बताइन् । नेपाल च्याम्बर अफ कमर्शका केन्द्रीय अध्यक्ष राजेन्द्र मल्लले लुम्बिनीबाट भारतको दिल्ली र चीनमा अन्तर्राष्ट्रिय उडान भएपछि करोडौँ पर्यटक भित्रिने र नेपालमा लाखौँले रोजगार पाउने बताए ।

लुम्बिनी प्रदेशका गृहमन्त्री सन्तोष पाण्डेयले पर्यटनको माध्यमबाट देशले आर्थिक समृद्धि ल्याउने बताए । सबै क्षेत्रले पर्यटकलाई सम्मान ब्यवहार गर्दै जानुपर्ने सबैको कर्तब्य भएको उनले बताए । भारतको नौतनवाका विधायक ऋषि त्रिपाठीले नेपाल–भारत छिमेकी देश भएको र साँस्कृतिक र भावनात्मक सम्बन्ध रहेको उनको तर्क थियो । कार्यक्रममा सिद्धार्थनगर नगरपालिकाका नगर प्रमुख इस्तीयाक अहमद खाँन, चेम्बर अफ कमर्शका लुम्बनी प्रदेश अध्यक्ष टंक पोखरेल, सिद्धार्थ उद्योग वाणिज्य संघका अध्यक्ष ठाकुर कुमार श्रेष्ठ, ब्यापार संगठनका पूर्व अध्यक्ष तथा सल्लाहकार नारायण प्रसाद भण्डारी, उद्योग ब्यापार संगठन रुपन्देहीका अध्यक्ष दर्पण श्रेष्ठ, उद्योगी वसन्त रोक्काले राष्ट्रिय उत्पादनलाई प्रवद्र्धन गर्नुपर्ने धारणा राखेका थिए ।