खोज

सल्यान, ४ मंसिर ।

सल्यान छत्रेश्वरी–२ को दहखोला स्थित चमेरे गुफा क्षेत्रमा सार्वजनिक शौचालय निर्माण कार्य सुरु भएको छ । पछिल्लो समय आन्तरिक पर्यटकहरुको चहलपहल बढ्दै जान थालेपछि रुपान्तरण युवा क्लवले शौचालयको आवश्यकता महसुस गरी निर्माण कार्य सुरु गरेको हो । जस्ता पाताको छाना लगाएर प्रयोग गर्न मिल्ने शौचालय निर्माण कार्य सुरु भएको जनाउँदै क्लवका अध्यक्ष विशाल पुन मगरले करिव ८० हजार रुपैयाँमा निर्माण कार्य सम्पन्न गर्ने लक्ष्य रहेको बताए ।

उनका अनुसार क्लवले सार्वजनिक शौचालय निर्माणका लागि आफ्नो कोषमा रहेको २० हजार रुपैयाँ लगानी गर्नेछ । अन्य रकम संकलनको लागि जुटेको क्लवलाई शौचालय निर्माणको लागि गैरआवासीय नेपाली संघ, राष्ट्रि«य समन्वय परिषद् माल्टाका सल्लाहकार हरि विसीबाट २५ हजार रुपैयाँ सहयोग घोषणा भएको क्लवका अध्यक्ष पुनमगरले जानकारी दिए । यही मंसिर महिना सम्म शौचालय निर्माण सक्ने गरी आफुहरु लागि परेको उनको भनाई छ ।

शौचालय शिलान्यास गर्दै छत्रेश्वरी २ का वडा अध्यक्ष प्रेम नेपालीले सामाजिक काममा क्लव र युवाहरुको सक्रियता महत्वपूर्ण रहेको भन्दै शौचालय निर्माणका लागि आफुले पनि सक्दो सहयोगको प्रतिवद्धता जनाएका थिए । २०७८ सालमा स्थापना भएको रुपान्तरण युवा क्लवले विभिन्न सामाजिक काममा सक्रिया देखाउँदै आएको छ ।

केही दिन अघि मात्रै क्लवका सदस्यहरुले स्थानीय मोटरबाटो मर्मत सम्भारमा दुई दिन श्रमदान गरेका थिए । ओझेलमा परेको चमेरे गुफाको प्रचारप्रसार र संरक्षण तथा विकासको लागि सबैको सहयोगको अपेक्षा गरिएको क्लवका अध्यक्ष पुन मगरले जनाए । प्राकृतिक रुपले मनोरम उक्त क्षेत्रमा विभिन्न स्थानबाट पिकनिकका लागि पनि मानिसहरु आउने गरेका छन् ।