खोज

सुर्खेत, २ मंसिर ।

चिसो बढेसँगै भुकम्पपीडितहरु बिरामी पर्न थालेका छन् । त्रिपालमुनि कष्टकर जिवन बिताइरहेका जाजरकोट र पश्चिम रुकुमका पीडितहरु बिरामी पर्न थालेका हुन् । अहिले उनीहरु विभिन्न सरुवा रोगको शिकार हुन पुगेका छन् ।

भुकम्पले घर तहसनस भएपछि त्रिपालमा बस्दै आएकी देउमा रानाले चिसो बढ्न लागेसँगै बालवालिकाहरु बिरामी पर्न थालेको बताइन् । बालवालिकाहरुमा रुघाखोकी तथा ज्वरोको समस्या देखिन थालेको उनले बताईन् । अहिले बालबालिकामा आँखा पाक्ने रोग समेत देखा पर्न थालेको स्थानीय कलिमान रानाले बताए । ‘त्रिपालमुनिको बसाईका कारण बच्चाहरुलाई चिसो लागेको छ’ उनले भने, ‘धेरैजसो बालवालिकाहरुलाई रुघाखोकी लागेको छ । कतिलाई त निमोनिया पनि देखिएको छ ।’

बालवालिकासँगै गर्भवती र सुत्केरी आमाहरु पनि अहिले विभिन्न रोगको शिकार बन्दै आएका छन् । त्रिपालमुनि बस्दै आएकी १८ दिनकी सुत्केरी विमला तिरुवा पनि कष्टकर दिन गुजार गर्दै आएकी छन् । चिसो र आवश्यक स्याहार सुसार नहुँदा आमाका साथै बच्चा पनि बिरामी रहेका छन् । त्रिपालको चिसोले आमा र नवजात शिशु दुवैका मुख, आँखा, हातखुट्टा सुनिएको छ ।

भेरी नगरपालिका–१ पुष्पा सिंहको एक महिना अघि बनाएको घर भूकम्पले भत्किएपछि त्रिपालमा बस्दै आएकी छन् । दुई महिनाको छोरासहित बस्दै आएकी उनको दैनिकी पनि समस्याले गाजेको छ । छोरीलाई आँखा पाक्ने रोगले हैरान बनाएको उनले बताइन् । ‘हामीसँग न त खाने अन्न छ न जीउ ढाक्ने कपडा नै । के खाएर बाँच्ने’ उनले भनिन्, ‘चिसो र भोकले मर्ने बेला भयो, बालवालिकाहरु पनि बिरामी पर्न थालेका छन् ।’

त्रिपालमा बसेका धेरै सुत्केरी र बालबालिकामा रुघाखोकी, ज्वरो, निमोनियालगायत समस्या देखिन थालेको नलगाड नगरपालिका–१ पालीकी कल्पना विक बताउँछिन् । उनले सुत्केरी, गर्भवती र बालबालिकालाई पोषिलो खानेकुराको अभाव भएका कारण पनि थप समस्यामा रहेको बताइन् ।

जाजरकोटका अधिकांश नागरिकहरु त्रिपालभित्र छन् । शौचालय नहुँदा बस्ती नजिक खुला ठाउँलाई नै शौचको रुपमा प्रयोग गर्न गर्न थालिएको छ ।

स्वास्थ्य सेवा कार्यालय जाजरकोटका निमित्त स्वास्थ्य सेवा व्यवस्थापक डा.प्रतीक्षा भारतीले चिसोले धेरै बालबालिका बिरामी पर्न थालेको बताउँछिन् । उपचारका लागि अस्पताल आउने धेरैजसो बालवालिका तथा वृद्धवृद्धाहरुमा रुघाखोकी तथा ज्वरो देखिएको बताइन् । उनले अस्पतालमा बिरमीको चाप बढेका कारण उपचारको व्यवस्था मिलाउन सम्बन्धित पालिका र स्वास्थ्य संस्थालाई आग्रह गरिएको बताइन् ।