खोज

कपिलवस्तु, २९ कात्तिक ।

कपिलवस्तु नगरपालिका वडा नम्बर २ लम्तियाका अजिज खानले यस बर्ष पनि भाई टिका लगाए । मुस्लिम धर्मावलम्बी उनले कपिलवस्तु नगरपालिका वडा नं. ३ क्याम्पसटोल स्थित धर्मदिदी यशोदा राना सँग भाई टिका लगाएका हुन । उनले यसरी दसै, भाई टिका र रक्षाबन्धन बाँध्न थालेको १२ बर्ष भयो । अजिजले तिहारमा मात्रै होईन दसैमा पनि यशोदाको परिवारमा आमा हुममाया रानाको हातबाट टिका लगाएका थिए । उनी सहित यशोदाका भाई केशव र कपिलवस्तु नगरपालिका १ का सन्दिप गुप्ता तथा दुर्गेश गुप्तालाई यशोदाले यस बर्ष रक्षा बन्धन र भाईटिका लगाईन् । अजिजले दाजुहरु नारायण, केशव, दुर्गेश र सन्दिप सगै भाई टिका लगाउछन । यस बर्ष दाजु नारायण बिदेश भएकाले चार जनाले मात्र भाई टिका लगाए ।

आफु कपिलवस्तु बहुमुखी क्याम्पस पढदा बुवा लालबहादुर राना क्याम्पसमा कार्यरत थिए । केही बर्ष अघि स्वर्गीय भएका लाल बहादुरले अजिजलाई छोरा जस्तै माया गर्थे । उनी त्यही समय देखि नै राना परिवारको सदस्य सरह बन्न पुगे । २०६९ सालदेखि अजिजले रक्षाबन्धन, दसै र भाईटिकामा परिवारकै सदस्य सरह नै राना परिवार सहभागिता जनाउँदै आएका छन् । यसअघि ३ बर्ष दाजु नारायण र भाई केशव वैदेशिक रोजगारीमा हँुदा यशोदाले अजिजलाई नै रक्षाबन्धन र भाईटिका लगाएकी थिईन् । अजिजको घरमा बुवा आमा, चार दाजु भाई र चार दिदी बहिनी छन् । अजिजको परिवारले मनाउने चाडहरु ईद, बकरइदमा दिदी यशोदा सहित उनका परिवारका सदस्य समेत सहभागी हुने गरेका छन् ।

अजिजले यसरी आफु सामाजिक सदभावमा जोडिनुको श्रेय बुवा सत्तारलाई दिन्छन् । अजिजका बुवा सत्तार मुसलमानलाई पनि लम्तिया गाँउकै ईन्द्रा गुप्ताले रक्षा बन्धन बाध्ने गरेकी छन् । बुवा सत्तार वैदेशिक रोजगारीमा कतार गएर धेरै वर्ष उता बसेपछि ईन्द्राले अजिजका चार दाजु भाईलाई नै रक्षा बन्धन बाँध्न थालिन् । भारतमा विवाहित भए पनि आफ्ना ३ दाजुभाई र अजिजका बुवा सत्तारलाई रक्षा बन्धन बाँध्न हरेक बर्ष ईन्द्रा नेपाल आउने गरेकी छन् । प्रेरणाको श्रोत बुवा नै भएको अजिज बताउँछन् । समाजलाई एकतामा बाँध्न र एक अर्काको चाड पर्वलाई सम्मान गर्न बलियो उदाहरण बनेको उनको अनुभुती छ । “धर्म भन्दा माथि सम्बन्ध हुन्छ । मेरो चाड पर्वमा उहाँहरु आउनु हुन्छ । म रक्षा बन्धन, दसै र भाई टिका लगाउन जान्छु” अजिजले भने । यशोधरा गाउँपालिका वडा नम्बर ३ वसन्तपुरको श्रीकृष्ण धार्मिक माविका निमावि तहका शिक्षक समेत रहेका उनले आफुहरुले दिने उदाहरण आफ्ना विद्यार्थीले पनि सिको गर्ने बताउँछन् । दिदी यशोदासँग हरेक वर्ष भाई टिका लगाउँदा खुसी लाग्ने गरेको यशोदाका अर्का भाई दुर्गेशले बताए ।

यता भाईहरु अजिज, सन्दिप र दुर्गेशलाई रक्षाबन्धन, दसै र भाईटिका लगाउन पाउँदा साह्रै खुसी लाग्ने गरेको यशोदाले बताईन् । “हामी सबै परिवारका सदस्य हौं । दाजुभाईहरु सँगै हाँसीखुसी चाडपर्व मनाउँदा धेरै नै खुसी लाग्ने गरेको छ” यशोदाले भनिन् । सामाजिक सद्भाव कायम गर्न तथा एक अर्काको पर्वको सम्मान गर्नका लागि यो बिषय गतिलो उदाहरण बन्न सक्ने देखिन्छ ।