खोज

बुटवल, २८ कार्तिक। रुपन्देहीमा रहेका नेवा समुदायका संघसंस्थाहरुले नेपालीहरुको मौलिक संवत् नेपाल संवत् ११४४ संयुक्त रुपमा मनाएका छन । नेवा सेवा समिति, भिमसेन नेवा समाज, तिलोत्तमा नेवा मैजु खल, भिन्धो नेवा समाज रानीगंजा, नेवा पुच तामनगर, नेवा पुच नेवा विकास परिषद, नेवा देय दबु बुटवल नगर समिति, नेवा संस्कृत संरक्षण समिति, नेवा समाज बुटवल १–२, गणेश नेवा समाज, नेवा समाज अर्घाखाँची रुपन्देही, नेवा मिसा दबु बुटवल नगर समिति, भिमसेन नेवा समाज देविनगर, भिन्धो नेवा पुच, नेवा पुच दिपनगर सहितको सदस्यहरुले बिहान संयुक्त रयाली तथा औपचारिक शुभकामना आदानप्रदान कार्यक्रम गरि मनाएका हुन ।

समितिको सचिवालय माझगाउबाट कुमारी, घोडाजात्रा, पंचकन्या, नेवारी भेषभुषा, झाकीसहित निकालिएको रयाली मिलनचोक, मिलनचोक, कालिकानगर, होराईजन चोक, देविनगर हुँदै पुनः माझगाउ पुगेर समापन भएको थियो ।

औपचारिक कार्यक्रमको उद्घाटन गर्दै पुर्वमन्त्री तथा प्रदेश सभा सदस्य भोजप्रसाद श्रेष्ठले नेपालीहरुको मौलिक सम्वत नेपाल सम्वतको बारेमा सबैलाई बताउने र चिनाउने गरि लाग्नुपर्ने सुझाव दिए । नेपाल राज्यको अन्तरराष्ट्रिय मन्चमा आफनो पहिचान बनाउने गरि संयुक्त राज्य संघको सदस्यता प्राप्त गरेको ईतिहासमा नया सम्वत भएको कुरा राज्यले स्वीकार गरेको तर यसलाई राष्ट्रिय भाषाको रुपमा स्थापित गर्ने अभियानमा सरकार आलटान गरिरहेको उनले दुखेसो गरे । नेपाल संम्वतको ऐतिहासिक पक्षलाई हेरेर यो नेपालको मौलिक सम्वत भएको भन्दै यसलाई स्थापित गर्न पहल गर्नुपर्ने सुझाव दिए । ‘यो राष्ट्रिय सम्वत हो, यो आयातित सम्वत होईन ।’—उनले भने । यो दिवसलाई पर्वको रुपमा मनाउदै ऐतिहासिक पक्षको बारेमा खोज र ज्ञान लिन जरुरी रहेको उनले बताए । समाजमा सबै नेपाली जातजाती मिलेर बस्नुपर्ने भन्दै उनले सबै खाले संस्कृतिको आफनो पहिचान र महत्व हुने बताए । ऐतिहासिक पक्षलाई गुमराह गर्ने काम, अलमल गर्ने परिपार्टीका कारण स्पष्ट रुपमा दिशानिर्देशन गर्न नसकिएको उनले बताए । ‘हाम्रो सास्कृतिक पहिचानलाई नेवार समुदायले मात्र नभई सबै समुदायलाई नेपाल सम्वतको बारेमा जानकार हुनुपर्दछ ।’—उनले भने । आफनो मौलिक सम्वतप्रति माया हुनुपर्दछ । राष्ट्रिय सम्वतप्रति गर्व हुनुपर्दछ । हामी सबैको सम्वत नेपाल सम्वत भएको उनले बताए । प्रेरणा जाग्ने हिसाबबाट भावी पुस्तालाई सिक्नेसिकाउने प्रवृतिबाट योजना र कार्यक्रम बनाएर सबै समुदायहरु लाग्नुपर्ने बताए ।

कार्यक्रममा वडा नं ११ का वडाअध्यक्ष रामचन्द्र क्षेत्रीले नेपाललाई विश्व सामु चिनाउन नेवार समुदायको कला, संस्कृति, संस्कार महत्वपूर्ण पाटो बन्ने बताए ।

कार्यक्रममा समितिका सल्लाहकार रामलाल श्रेष्ठले पछिल्लो समय जातिय संगठनहरु संगठित हुने क्रम बढेको बताए । जातीय संगठनका कुरा जनयुद्ध आन्दोलन ताका शुरु भएको उनले बताए । यसअघि सबै जातजातीहरु मिलेर बसेको भन्दै उनले अन्य धेरै जातजातीहरु संगठित भएपनि जातीय राज्यका समेत आन्दोलन शुरु हुदा यस क्षेत्रका नेवारहरु धेरै पछि संगठित हुन थालेका बताए । भाषा, लिपि र संस्कृति पहिचान भएको भन्दै यसलाई जोगाउने कुरामा जोड दिनुपर्ने सुझाव दिए ।

कार्यक्रममा नेवा समाज अर्घाखाँची रुपन्देहीका अध्यक्ष बाबुराम श्रेष्ठ,नेवार देय दबुका अध्यक्ष गोपाल श्रेष्ठ, समितिका उपाध्यक्ष डिल्ली कुमार श्रेष्ठ, सचिव शारदा श्रेष्ठले नेवार समुदायको पहिचान एकता र गुठी भएको भन्दै यसलाई बचाउदै लाग्नुपर्नेमा जोड दिए ।
कार्यक्रममा समितिका अध्यक्ष चिरञ्जीवी श्रेष्ठले नेपाल सम्वतको बारे आम नागरिकमा सचेतना जगाउन जरुरी रहेको भन्दै सबै जातीहरुलाई समेटेर कार्यक्रम गर्ने गरि आफु लाग्ने बताए । कला, संस्कृतिबाट पर्यटन विकासमा टेवा पुग्ने उनले दाबी गरे ।

भिडियो सामग्री