खोज

सुर्खेत, २८ कात्तिक ।

गुर्भाकोट नगरपालिका–१४ का हिराबहादुर घर्तीमगरले गतवर्षदेखि सयपत्री फूल खेती गर्न थालेका छन् । उनले अहिले ३० कठ्ठा जग्गामा फूलखेती गरेका छन् । विशेषगरी तिहारलाई लक्षित गरेर उनले सयपत्री र मखमली फूल खेती गरेका हुन् । मगरको कर्णाली ड्रागन फ्रुट फार्मले अघिल्लो वर्ष पनि फूल खेती सञ्चालन गरेको थियो । गतवर्ष पाँचकठ्ठा जग्गामा फूल खेती गरेका उनले अहिले भने यसलाई विस्तार गरी ३० कट्ठामा खेती गर्दै आएका छन् । ‘एक सिजनमा सात क्वीन्टल फूल बिक्री गर्दै आएका छौ’ उनले भने, ‘फूल खेतीबाट राम्रो आम्दानी हुँदै आएको छ ।’ यसपाली अव तिहारका समयमा फार्मबाट करिव ५० क्विन्टल फूल उत्पादन भएको उनले बताए ।

‘बजारमा पलाष्टिकका फूलहरु देखेर यहाँ पनि फूल खेतीको सम्भावना छ भनेर सुरुवात गरेको हुँ’ उनले भने, ‘पलाष्टिकका मालाको सट्टा गाउँमै उत्पादन भएका फूलको माला लगाउँदा राम्रो पनि देखिन्छ ।’

वीरेन्द्रनगर नगरपालिका–३ स्थित खुसी कृषि तथा पशुपन्छी फार्मले पनि चार कठ्ठा जग्गामा नौ सय बिरुवा सयपत्री फूल उत्पादन गरेको छ । चाडपर्व, विवाह, समारोहमा फूलको माग देखेपछि व्यावसायिक उत्पादन थालिएको फार्म सञ्चालक रमा खड्काले बताइन् ।

सुर्खेतमा फूल व्यवसायको राम्रो सम्भावना भएको उनको अनुभव छ । तिहारका लागि एक क्विन्टल सयपत्री व्यापार भएको उनले बताइन् ।

वीरेन्द्रनगर नगरपालिका–८ कि निर्मला ढकाल तिहार भित्रिएसँगै सयपत्री फूलको कारोवारमा व्यस्त छिन् । उनी अमर सहिद प्रहरी परिवारकी सदस्य हुन् । फूल खेतीले उनलाई जीविकोपार्जनमा सहयोग पुगेको छ । त्यति मात्र होइन उनलाई पीडा भुल्ने माध्यम पनि बनेको छ फूलखेती ।

ढकाल सहित १५ जनाको सहिद परिवारले २२ कठ्ठा क्षेत्रफलमा पुष्प खेती सुरु गरेका छन् । उनीहरूले वीरेन्द्रनगर नगरपालिका–५ चिसापानीमा रहेको प्रदेश प्रहरीको सरकारी जग्गामा फूल खेती गरेका छन् । परिवार गुमाएको पीडा भुल्ने, जीविका चलाउन आयआर्जन गर्ने तथा तिहारमा बाहिरबाट आयात गरिने फूललाई विस्थापित गर्ने उद्देश्यले फूलखेती गरेको ढकाल बताउँछिन् ।

सुर्खेतका अमर सहिद प्रहरी परिवारले फूलखेतीबाट यस वर्षदेखि आम्दानी गर्ने प्रदेश प्रहरी प्रमुख डीआईजी भीमप्रसाद ढकालले बताए । फूलखेती कार्यक्रममा कर्णाली प्रदेश प्रहरी कार्यालय सुर्खेतले आवश्यक सहयोग तथा सहजीकरण गरिरहेको छ । सुर्खेतका कृषकहरुले फूलखेती सुरुवात गरेसँगै यहाँका पालिकाहरुले स्थानीय स्तरमा उत्पादन हुने फूलहरु प्रयोग गर्न आग्रह समेत गरेका छन् ।