खोज

बुटवल,२८ कात्तिक । तिलोत्तमा–६ मा सञ्चालित रामचन्द्र मैनादेवी अनाथ आश्रममा मंसिर १ गतेदेखि श्रीमद् भागवत धनधान्याञ्चल महायज्ञ हुने भएको छ । आश्रमलाई दीगोरुपमा चलाउन स्थापना गरिएको अक्षयकोषको रकम एक करोड पु¥याउने लक्ष्य सहित महायज्ञ सञ्चालन गर्न लागिएको हो । अनाथ आश्रमको अक्षयकोषमा अहिले ५२ लाख रुपैयां संकलन भएको छ ।

तर यसको ब्याजले आश्रम लाई दीगोरुपमा सञ्चालन गर्न वजेट अपुग भएकाले महायज्ञ गर्न लागिएको आश्रमकी सञ्चालिका मैनादेवी भण्डारीले बताइन् । अक्षयकोषको रकम एक करोड पुगेको खण्डमा आश्रममा कम्तीमा दुई जना कर्मचारी राखेर आश्रमलाई थप व्यवस्थित रुपले सञ्चालन गर्ने योजना रहेको उनले बताइन् ।

कर्मचारीलाई तलब दिन रकम अभाव भएकाले हालसम्म मैनादेवी र उनको परिवारले आश्रम सञ्चालनका लागि सबै काम बिहानदेखि रातिसम्म खटेर आफै गर्नुपरेको छ । ‘अब उमेर र स्वास्थ्यले पनि दिनभरि खटेर काम गर्न सक्ने अवस्था छैन त्यसैले कम्तीमा दुईजना कर्मचारी राख्नैपर्ने अपरिहार्य छ,र कर्मचारीलाई तलब दिन अक्षयकोष कम्तीमा एक करोड हुनुपर्छ – मैनादेवीले भनिन् । आश्रमममा २५ जना अनाथ बालक राख्न सकिने भौतिक पुर्वाधार भएपनि कर्मचारी राख्न नसक्दा अहिले १२ जना मात्र राखिएको उनले बताइन् ।
मंसिर १ गते बिहान बाजागाजासहित वृहत कलश यात्रा गरिने र कलश यात्रापछि तिलोत्तमाका मेयर रामकृष्ण खांणले महायज्ञ उद्घाटन गर्ने कार्यक्रम रहेको मैनादेवीले जानकारी दिइन् ।

मंसिर ८ गतेसम्म महायज्ञमा प्रेमसुदन शाष्त्री प्रमुख कथावाचक र निशान्त अधिकारी उपवाचक सहित ११ जना पण्डितहरुले संगीतमय कथावाचन गर्ने तथा ७ जना कलाकारको टोलीले झांकी र लिला सहित गीत र नृत्यमार्फत मनोरन्जन दिलाउने छन् । महायज्ञ सम्पन्न गर्न सनातनी युवा मञ्च तिलोत्तमाले आश्रमसंग सहकार्य गरेको छ । महायज्ञमा रात्रीकालिन झांकी र नृत्य विशेष आकर्षक बनाउने तयारी भएको मैनादेवीको भनाई छ ।

२०५३ सालमा अनाथ तथा असहाय महिला कल्याण समाजको नामबाट जिल्ला प्रशासन र समाज कल्याण परिषदमा दर्ता भएको आश्रम चलाउन आर्थिक स्रोत नभएपछि मैनादेवीले शुरुका वर्षहरुमा मुट्ठीदान संकलन गरेर चलाइन् । पछि विभिन्न संघसंस्थाको र दाताहरुको सहयोग पनि हुन थालेपछि सहज भएपनि दीगोरुपमा चलाउन अक्षयकोषको ब्याजबाट हुने आम्दानी नै उपयुक्त र भरपर्दो स्रोत हुने भएकाले यसपटक महायज्ञ गर्न थालेको मैनादेवीले खुलाइन् ।
आश्रम सञ्चालन गर्न झण्डै ३० वर्ष निरन्तर खटेकी मैनादेवीलाई उनका श्रीमान् रामचन्द्रले पनि उत्तिकै साथ दिएका छन् । श्रीमान् रामचन्द्रले १५ धुर जग्गा आश्रमको नाममा पास गरिदिएका छन् । त्यही जग्गामा आश्रम भवन बनेको छ । अनाथ असहाय बालबालिकालाई पालन पोषण र शिक्षा दिक्षा दिने पवित्र र महान कार्यमा समर्पित मैनादेवीले एक हप्तासम्म चल्ने महायज्ञमा उपस्थित भई गच्छे अनुसार दान र सहयोग गरिदिन सबैमा अनुरोध गरेकी छन् ।