सामग्री खोज्नुहोस्

बुटवल, २४ कात्तिक । उमेरले बुढ्यौली लागे पछि शल्यक्रिया जोखिम मानिन्छ । अझ त्यसमा पनि उच्च रक्तचापको समेत औषधि सेवन गर्दै आएकी ९५ वर्षीय वृद्धाको चौराह अस्पताल प्रालिमा खुट्टाको सफल शल्यक्रिया गरिएको छ ।

सन्धिखर्क नगरपालिका वडा नं. १ अर्घाखाँचीकी ९५ वर्षकी खिमा कुमारी श्रेष्ठ घरमा साँझपख खाना खाएर हात चुठ्न लाग्दा लडिन् । परिवारका सबै अत्तालिए । हातखुट्टा राम्ररी चलाएकी उनी दाहिने खुटामा केही दुखाई मात्र भएको परिवारको सदस्यलाई बताईन् । मर्केको आशंकामा उपचार गरेपनि केही दिनपछि भने खुट्टा सुन्निने र दुखाई बढ्यो ।

उनलाई नजिकको क्लिनिकमा लगेर एक्सरे गरेर हेरियो । नातिनी बुहारी कृष्णा श्रेष्ठले एक्सरे गरेर हेर्दा हिपको हडीमा समस्या देखिएको बताईन् । उपचारका लागि काठमाडौ लैजाने गरी टिकट समेत लिए । बुटवलमा बसोबास गर्ने नाती र नातिनी बुहारीले बुटवलको चौराह अस्पतालको बारेमा सुनेका थिए । सोही क्रममा चिकित्सकसंग सल्लाह गर्दा डा मदन ज्ञवालीले बुटवलमै उपचार सम्भव हुने बताए ।

१९ गते अस्पतालमा भर्ना गरिएकी उनको भोलिपल्ट आवश्यक तयारीसहित शल्यक्रिया गरियो । उनको दाहिने खुटाको फिमर आई टि फयाक्चरको सफल उपचार भएको हो । डा मदन ज्ञवालीको नेतृत्वमा अपरेसन सफल भयो । पाँच दिनको उपचारपछि शुक्रबार उनलाई डिस्चार्ज गरिएको छ । ‘अजीलाई अहिले ठिक भएको छ’—उनकी नातिनी बुहारी कृष्णाले भनिन् । चोटभन्दा पनि उमेरका हिसाबमा जोखिम मानिएको शल्यक्रिया सफलतापूर्वक भएको उपचारमा संलग्न चिकित्सक ज्ञवाली बताउँछन् ।

यता छोरा ठाकुर प्रसाद श्रेष्ठले काठमाडौं लैजानका लागि २१ हजार रुपैयाँ प्लेन टिकट नै काटेर पनि संयोगले चिकित्सकसंग भेटेर बुटवलमा नै उपचार सम्भव भएको बताए । बुटवलमा गुणस्तरीय सेवा पाएको उनले बताए । हरेक उपचारलाई काठमाडौ जानुपर्ने बाध्यतालाई चिर्नेगरी बुटवलमा बिशिष्टिकृत सेवालाई जोड दिदै जानुपर्ने उनको सुझाव छ ।

अस्पतालका जनसम्पर्क अधिकारी जनक कुँवरले चौराह अस्पतालको सेवालाई न्यूरो ट्रमा सेन्टरका रुपमा विकास गर्दै गएको बताए । यो क्षेत्र र आसपासका विभिन्न जिल्लामा हुने सडक दुर्घटनाका घाईतेहरुको सफल उपचार गर्न आफुहरु सफल भएको बताए ।

दैनिकजसो १० देखि १५ जना दुर्घटनाका बिरामी अस्पतालमा आउने र सेवा लिने गरेको उनले बताए । अस्पतालमा विशेषज्ञ र अनुभवी चिकित्सकहरुको सेवा दिंदा सेवाग्राही सन्तुष्ट रहेको उनले बताए । अस्पतालले उनको उपचारमा सहुलियत उपलब्ध गराएको उनले बताए । यसैबिच अस्पताल ब्यवस्थापनले उनको केक काटेर दीर्घायू र सुस्वस्थ्यको कामनासहित बिदाई गरेका छन् ।

भिडियो सामग्री