खोज

दाङ, २४ कात्तिक ।

दाङमा व्यावसायिक फूल खेती फस्टाउँदै गएको छ । तिहार नजिकै आइसेकाले अहिले फूल टिपेर माला बनाउन व्यवसायीलाई भ्याइनभ्याइ भएको छ । गढवा गाउँपालिका –४ हडैयाका विरेन्द्र शाहले विगत चार वर्षदेखि व्यावसायिक रुपमा नर्सरीमा फूलका बिरुवा उत्पादन गर्ने गरेका छन् । बिएस फलफूल नर्सरी कृषि फर्मको नामबाट व्यवसाय संचालन गरेका छन् ।

उनको नर्सरीमा विभिन्न प्रजातीका फूलको बिरुवा रहेका छन् । बीएससी एजी तेस्रो वर्षमा अध्ययनरत शाह आफ्नै भूमिमा केही गर्नुपर्छ भनेर कृषिमा जोडिएको बताउँछन् । जिल्लामै नमूना खेती बनाउने उद्देश्यले व्यावसायिक खेतीमा जोडिएको उनको भनाई छ । नर्सरीबाट उत्पादन भएका बिरुवा बिक्री गर्ने गरेकोमा गत वर्ष देखि सयपत्री फूल खेती थालेको उनले बताए । अहिले उनको नर्सरीमा सयपत्री फूल ढकमक्क फूलेका छन् ।

तिहार लक्षित सयपत्री फूल प्रशस्त फूलेकाले बिक्रीका लागि बजारको खोजीमा रहेको उनले बताए । खेती गरेका सबै फूल बिक्री हुन पाए पाँच लाख आम्दानी हुने उनको आसा छ । आफूसंग पढेका साथीहरु विदेशी भूमिमा गएपनि आफूले यहीं केही गर्नुपर्छ भन्न्ो उद्देश्यले कृषिको विद्यार्थी भएकाले कृषिलाई कर्म बनाएको उनले बताए । घरपरिवारको साथ सहयोगले व्यावसायलाई अगाडि बढाउन सजिलो भएको शाहले बताए ।

दाङको गढवा, राप्ती, लमही, घोराही र तुलसीपुर विगत चार वर्षदेखि व्यावसायिक फूल खेती गरेर मनग्य आम्दानी हुने गरेको छ । एक सिजनमा मात्रै पाँच देखि १५ लाखसम्म आम्दानी हुने गरेको व्यवसायीको भनाई छ ।

स्थानीय सरकारले सहजीकरण गरेमा आफूले उत्पादन गरेका वस्तु बिक्री गर्न सहज हुने उनको भनाई छ । बजारमा छ्याप्छाप्ती पलाष्टिकका माला भित्रिएका छन् । किसानले उत्पादन गरेका वस्तुलाई स्थानीय तहले बिक्री वितरणको लागि पहल गरेमा किसानलाई सजिलो हुने उनको भनाई छ । स्थानीय तहले पहूँचका आधारमा कृषि यन्त्र वितरण गरेकाले सहुलियतमा वितरण गर्ने कृषि यन्त्र पाउन नसकेको उनले गुनासो गरे । अहिलेसम्म कुनै पनि निकायबाट सहयोग नपाएको उनको भनाई छ । पालिकामा खुलेका विभिन्न अनुदानमा फर्म भरेपनि आफूलाई नपरेको उनको गुनासो छ । वास्तविक किसानले नपाउने र पहूँचवाला र कृषि कर्मभन्दा बाहिरको मानिसले पाउँदा नराम्रो लाग्ने उनको भनाई छ । पढाई खर्चसंगै व्यवसायको लागि पनि वजेटको जोहो गर्नुपर्ने बाध्यता रहेको उनले बताए ।