खोज

सुर्खेत, २३ कात्तिक ।

जाजरकोटको नलगाड नगरपालिका–६ की १९ वर्षीया जमुना बुढा मगर भूकम्पले घर भत्किदा घाइते भइन् । उनलाई उद्दार गरेर नेपाली सेनाको हेलिकप्टरबाट बिहान नेपालगन्जको भेरी अस्पताल पु¥याइयो । अस्पतालमा उनले आठ महिनाको मृत बच्चालाई जन्म दिइन् । पहिलो सन्तान गुमाउनु मात्र होइन पति पनि गुमाउनु पर्दा अझ समस्यामा छन् ।

रुकुम पश्चिमको आठबिसकोट नगरपालिका–११ की ३४ वर्षीया बिना केसी पनि गर्भवती छन् । यस समयमा उनको आराम र पोषिलो खाना पाउनुपर्ने हो । तर, चिसो भुईमा त्रिपालभित्र कष्टकर जीवन गुजरा चलाउँदै आएकी छन् उनी ।

गर्भवती मात्र होइन दुधे बच्चा र आमाहरु पनि यस समयमा समस्यामा छन् । पोषिलो खानाको अभावमा बच्चालाई राम्रोसँग दुध नआएको सोहीगाउँकी मनिसा खत्री बताउँछिन् ।

‘चिसोले गर्दा बच्चालाई खोकी लागिरहन्छ, शरीर सुनिन्छ’, उनले भनिन्, ‘आफुलाई त जसोतसो भइहाल्थ्यो बच्चालाई बचाउनै समस्या छ ।’

गएको शुक्रबार मध्यराति ११ः४७ मा जाजरकोट केन्द्रबिन्दु भएर गएको भूकम्पबाट जाजरकोट र पश्चिम रुकुमका नागरिकहरु मारमा परेका छन् । प्रभावित जिल्लाका गर्भवती, सुत्केरी महिला र बालवालिकाहरु यतिबेला कष्टकर जिवन बिताइरहेका छन् ।

जाजरकोटका भुकम्पपीडितमध्ये महिला र बालवालिका बढी जोखिमममा देखिएका छन् । जसमा गर्भवती तथा सुत्केरी महिलाहरुलाई अझ बढी समस्या छ । चिसो यामसँगै त्रिपालमुनि कष्टकर रात काट्न बाध्य छन् उनीहरु ।
यी दुई जिल्लामा भूकम्पमा परी मृत्यु हुनेमा बालबालिका र महिलाको संख्या धेरै रहेको छ । एक सय ५३ मृतकमध्ये ७८ जना बालबालिका रहेका छन् । प्रहरीको तथ्यांक अनुसार जाजरकोटमा ५६ महिला र ४५ पुरुष, रुकुम पश्चिममा २७ महिला र २५ पुरुषको मृत्यु भएको छ ।