खोज

बुटवल, २१ कात्तिक ।

अस्पतालमा उपचारार्थ बिरामीहरुलाई रगत अभाव हुन नदिने उद्देश्यका साथ बुटवलमा रक्तदान कार्यक्रम गरिएको छ । होटल तथा रेष्टुरेन्ट ब्यवसायी संघ रुपन्देहीको आयोजनामा मंगलबार बुटवलमा वृहत रक्तदान कार्यक्रम गरिएको हो ।

एक समारोहका बिच होटल ब्यवसायी संघ लुम्बिनी प्रदेशका वरिष्ठ उपाध्यक्ष महेन्द्र श्रेष्ठले रक्तदातालाई ब्लड ब्याग हस्तान्तरण गरी कार्यक्रमको उद्घाटन गरेका थिए । त्यस अवसरमा उनले देशमा विभिन्न महामारीकै कारण आर्थिक, मानसिक पीडा भोग्नुपरेको बेला पनि सामाजिक कार्यमा आफुहरु संस्थागत रुपमा अघि बढेको बताए । रक्तदान सबैभन्दा महादानको कार्य भएको भन्दै रक्तदान अभियानमा युवाहरुको सहभागिता बढ्नु सकारात्मक भएको उनले बताए । शरीरमा ३ महिनामा खेर जाने रक्तदान दान गरेर अरुको जीवन बचाउन सकिने हुँदा पनि नियमित रक्तदान गर्नु महान काम भएको उनले बताए ।

कार्यक्रममा संघका अध्यक्ष लेखनाथ भण्डारीले चाडपर्व लक्षित रक्तदान कार्यक्रम गरेको बताए । दैवीप्रकोप, मौसम परिवर्तनसंग बिरामीको चाप बढ्दा रगतको माग दैनिक एक सय बढी पोईन्ट माग हुने, रक्तदान कार्यक्रम कम हुँदा समस्या उत्पन्न भएको बेला रक्तदान कार्यक्रम गरी थोरै भएपनि सहयोग गरेको बताए ।

कार्यक्रममा मानव अधिकार तथा शान्ति समाज रुपन्देहीका सभापति कृष्ण प्रसाद भट्टराई, संस्थाका सल्लाहकार चिरञ्जीवी शर्मा, नेपाल नियमित रक्तदाता संघ केन्द्रीय समितिका सदस्य बुद्धि ज्ञवाली, संघका महासचिव अर्जुन थापाले रक्तदान अभियानलाई सबैको साथ र सहयोग जरुरी रहेको बताए ।

नेपाल रेडक्रस सोसाइटी, रक्त संचार सेवा केन्द्र बुटवलको प्राविधिक सहयोगमा भएको रक्तदान कार्यक्रममा ५३ युनिट रगत संकलन भएको संयोजक केशवराज पाण्डेले बताए ।