खोज

जाजरकोटको बारेकोट गाउँपालिका वडा नम्बर १ रामिडाँडालाई केन्द्रविन्दु बनाएर शुक्रबार राति गएको ६ दशमलव ४ म्याग्निच्युडको भूकम्पले ठूलो जनधनका साथै ठूलो मानवीय क्षति गरेको छ । शनिवार साँझसम्म जाजरकोट र रुकुमपश्चिममा मृतकको संख्या एकसय ३६ माथि पुगिसकेको छ । राति ११ बजेर ४७ मिनेटमा जाजरकोट केन्द्रबिन्दु भएर सो भूकम्प गएकोले अधिकांश सुतेकै अवस्थामा रहेकोले ठूलो मानवीय क्षति भएको हो । शुक्रवार रातीको भुकम्पले देशलाई शोकमा डुबाएको छ । दुई जिल्लामा गरि यति ठूलो मानवीय क्षति हुनु र अबौंको धनमाल नोक्सान हुनु भनेको राष्ट्रिय शोकको अवस्था हो । सरकारले मानवीय सहयोग र उद्धार तथा राहतका लागि आह्वान गरेको छ । भारत, अमेरिका लगायतका ठूला देशहरूले नेपाललाई आवश्यक सहयो गर्ने प्रतिवद्धता जनाएका छन । अहिले भुकम्पमा प्रभावित घाईतेहरूको उपचारलाई प्राथकिता दिनु सवैभन्दा ठूलो कुरा हो । तसर्थ घाईतेहरूको उद्धार र उपचारमा सम्बद्ध सवैको ध्यान जानु जरुरी छ । नेपाल सरकारको सवै फोर्स दुई जिल्लामा तैनाथ भएको छ । सरकारले घाईतेहरूको उद्धार, राहत र उपचारमा कुनै कसर बाँकी राखेको छैन । प्रधानमन्त्री पुष्पकमल दाहाल प्रचण्ड बिहानै प्रभावित क्षेत्रमा पुगेर सम्वन्धित निकायलाई निर्देशन दिनुभएको छ । प्रधानमन्त्रीको निर्देशन अनुसार अहिले भुकम्प प्रभावित क्षेत्रमा सिंगो राज्य परिचालित भएको छ । भुकम्पमा परी सयौं घाईते भएका छन । कोही घरभित्र पुरिएको अवस्थामा छन । तिनको उद्धारमा नेपाली सेना, सशस्त्र, नेपाल प्रहरी, स्थानीय जनता कर्मचारी लगायत सवैको सकृय सहभागिता छ । रगतको अभाव हुन नदिनेगरि आकस्मिक रक्तदान गरिएको छ । हेलीकोप्टरको माध्यमबाट आवश्यक सामानको ब्यवस्था गरिएको छ । भुकम्प प्रभावितको लागि सिंगो राज्य एक भएको छ ।

भूकम्पबाट पीडितहरूको उद्धार, राहत र घाइतेको शीघ्र उपचारको व्यवस्थापन कार्यलाई तीव्रता दिन राष्ट्रपति रामचन्द्र पौडेलले प्रधानमन्त्रीको ध्यानाकर्षण गराउनु भएको छ । भूकम्पबाट कर्णाली प्रदेशको जाजरकोट, रुकुमपश्चिम लगायतका जिल्लामा भएको धनजनको क्षतिको बारेमा जानकारी लिनुहुँदै राष्ट्रपतिले पीडितको, राहत तथा घाइतेहरूको शीघ्र उपचारमा तीव्रता दिन आग्रह गर्नुभएको छ । राष्ट्रप्रमुखबाट राष्ट्रिय बिपत्तीको अवसरमा गर्नुभएको आह्वान सराहनीय छ । यसैगरी विभिन्न राजनैतिक दलका नेता, कार्यकर्ता र संघ संस्थाहरूले समेत भुकम्प प्रभावितहरूको राहत र उपचारमा सहयोगको आह्वान गरेका छन । राष्ट्रिय विपत्तीको बेला सवै नेपाली एक हुनु महत्वपूर्ण बिषय हो ।

भूकम्पबाट भएको मानवीय र भाौतिक क्षतिले सिंगो देश शोकाकुल भएको छ । यस घडीमा मानवीय भावले उद्धार, राहत घाइतेको उपचारमा सरकार तथा सबै राजनीतिक, दल, जनप्रतिनिधि र आम नागरिक जुट्नु आवश्यक छ । हालसम्म जाजरकोट र रुकूम पश्चिममा जिल्लामा गरी कम्तीमा १३६ जनाको मृत्यु भएको र कैयौं घाइते भएको जनाइएको छ । त्यसका साथै नेताहरूले समेत भूकम्पबाट भएको मानवीय र भाौतिक क्षतिले आफूहरू मर्माहत भएको बताउँदै विपद्को यस घडीमा मानवीय भावले उद्धार, राहत र घाइतेको उपचारमा जुटन सरकार तथा सबै राजनीतिक, दल, जनप्रतिनिधि र आम नागरिक एकताबद्ध हुनु जरुरी छ । भूकम्प यति शक्तिशाली थियो कि त्यसको धक्का काठमाडौँका साथै देशैभरजसो महसुस भएको थियो । भुकम्पमा परि खासगरि पुराना घरहरू धेरै भत्किएको र मानिसको उद्दारका लागि नेपाल प्रहरी, सशस्त्र प्रहरीको टोली लगायत रेडक्रस लगायतका संघ संस्था लागिरहेका छन । अव राष्ट्रिय शोक र बिपत्तीको यो घडीमा घाईतेहरूको उपचार, राहत, उद्धार, सहयोग र उनीहरूको पुनस्र्थापनाको खाँचो छ । सिंगो देश यो अभियानमा सहभागी बन्नुपर्दछ । साथै यस्तो बेला राहत संकलनमा देखिने दोहोरो मापदण्ड हटाउँदै सरकारले एकद्वार नीति लागू गरोस् । भुकम्प पीडितका नाममा आएको सहयोग रकम कुनैपनि अवस्थामा दुरूपयोग नहोस् ।