खोज

दाङ, १९ कात्तिक ।

घोराही उपमहानगरपालिकाले पूर्ण सरसफाई युक्त नगर घोषणा गर्नका लागि गल्ने र नगल्ने फोहरमैला बर्गिकृत टोल घोषणाको कार्यक्रम सुरुवात गरेको छ । यसै क्रममा वडा नम्बर १४ को गोर्खा टोललाई आईतबार एक कार्यक्रमका बिच फोहरमैला बर्गिकृत टोल घोषणा गरिएको हो । कार्यक्रममा घोराही उपमहानगरपालिकाका प्रमुख नरुलाल चौधरीले उक्त टोललाई पूर्णरुपमा फोहर वर्गिकरण टोल घोषणा गरेका हुन् । उनले गल्ने र नगल्ने फोहर वर्गीकरण गर्नेकाम निरन्तर हुने बताए । फोहर वर्गीकरण नगर घोषणा गरेर फोहर रहित टोल बनाउने तर्फ सबै लाग्नुपर्छ उनले भने । घरबाटै फोहर वर्गीकरण गरेर ब्यबस्थापन गर्न आग्रह गरे ।

नगरको परिवर्तन टोल विकास बाटै हुने भएकाले यसमा सजग हुन आग्रह गरे । उनले सरसफाई व्यक्तिको स्वास्थ्य, इज्जत, प्रतिष्ठा सँग जोडिएको बिषय भएको बताउनुभयो । विगतका वर्ष देखिनै नगरले गल्ने फोहरबाट ग्याँस उत्पादन थालिएकाले टोलबासीको सहयोगले फोहरको उचित व्यवस्थापन हुनेमा जोड दिए । फोहर संकलनका लागि यस अघि उपमहानगरपालिकाले प्रत्येक घरलाई दुईदुई वटा डष्टविन प्रदान गरेको थियो ।

कार्यक्रममा नगर उपप्रमुख हुमाकुमारी डिसीले सरसफाईले नै व्यक्ति र टोलको सही परिचय दिने बताइन् । उनले सबैको साथसहयोगले नगर स्वच्छ नगर बनाउन सकिने बताइन् । गर्खा टोलले गरेको उदाहरणिय काम पालिकाभरका सबै टोलले सिक्नुपर्ने बताइन् । टोलको सकृयताले नै सामाजिक सुधार र विकास निर्माणका काम सफल तथा दिगो हुने उनको धारणा थियो । घोराही उपमहानगरपालिका प्रमुख प्रशासकिय अधिकृत ऋषिराम केसीले नगरका सबै टोलहरुलाई नमूना टोल बनाउने उद्धेश्यमा सरकार रहेकाले सबैले यसमा सहयोग गर्न आग्रह गरे ।

कार्यक्रममा वातावरण, विपद तथा सरसफाई व्यवस्थापन समितिका संयोजक भानसिंह बुढाले स्वच्छ नगरको सुरुवात गोरखा टोलले गरेको छ यो सबै टोलले सिको गर्नुपर्ने बताए । घोषणा गरेर मात्रै हुदैन यस्लाइ निरन्तरता दिनुपर्ने बताए । नेपाल पत्रकार महासंघ दाङका अध्यक्ष दुर्गालाल केसीले फोहोर मैला ब्यबस्थापनमा नगरले गरेको कामको विषयमा संचारक्षेत्रले सधै सहयोग गरेको बताए । टोल विकास संस्थाका अध्यक्ष पदमप्रसाद पाण्डेको अध्यक्षतामा भएको कार्यक्रमको सहजिकरण सरसफाई व्यवस्थापन शाखाका प्रमुख लक्ष्मण अधिकारीले गरेका थिए । गल्ने र नगल्ने फोहर बर्गिकरणले गोर्खा टोल नमूना टोल बन्न सफल भएको र यो अभियानलाई जिवन्त बनाउन प्रेरणा मिलोस भन्ने उद्धेश्यले नगरले सम्मान पत्र समेत प्रदान गरेको छ । हरितक्रान्ति, आत्मनिर्भरता , सहभागीता र समानता । मानव बिकास, स्वस्थ र स्वस्छ घोराही भन्ने नाराका साथ घोराही उपमहानगरपालिका –१४ मा रहेको गोरखा टोलालाई पूर्ण सरसफाइ टोल घोषणा गरिएको हो । घोराही उपमहानगरपालिकाका १९ वटै वडामा टोलविकास गठन गरिएको छ । जसमा १८ सय टोल रहेका छन् । १४ नम्वर वडामा ४२ टोल रहेका छन् । गोरखा टोलमा ८४ घर धुरी रहेका छन् ।