सामग्री खोज्नुहोस्

बुटवल, १९ कात्तिक ।

शुक्रबार राति ११ः४७ बजे जाजरकोटको रामिडाँडा केन्द्रविन्दु बनाएर भूकम्प गयो । राष्ट्रिय भूकम्प मापन केन्द्रका अनुसार मध्यरातमा ६.४ म्याग्नेच्युडको भूकम्प गएको हो ।

सो भूकम्पमा परी हालसम्म १५७ जनाको मृत्यु भएको छ । भूकम्पले धेरै घरहरुमा क्षति पुगेको छ । सुतिरहेका बेला घटना भएकाले घाइते र मृत्यु हुने बालबालिका धेरै परेका छन् । हाल सरकारी निकाय र सुरक्षा निकायहरु प्रभावित क्षेत्रमा राहत र उद्धार कार्यमा जुटिरहेका छन् । प्रधानमन्त्री पुष्पकमल दाहाल प्रचण्ड स्वयंम् भूकम्प प्रभावित क्षेत्रमा पुगेर फर्किएका छन् ।

पश्चिम नेपाल भूकम्पका कारण जोखिमयुक्त मानिँदै आएको क्षेत्र हो । गोरखाको बारपाकलाई केन्द्रविन्दु बनाएर २०७२ वैशाख १२ मा आएको भूकम्पले पश्चिम नेपालमा त्यति प्रभाव पारेको थिएन । त्यसयताका भने पश्चिम नेपालमा पटक–पटक भूकम्प र परकम्प गइरहेको थियो । धक्का बारम्बार आइरहेको अवस्थामा त्यहाँ ठूलो भूकम्प जान सक्ने चेतावनी दिइँदै आइएको थियो ।

शुक्रबार राति गएको भूकम्पले भने पश्चिम जाजरकोट र रुकुम पश्चिममा ठूलो क्षति गरेको छ । भूकम्प मापन केन्द्रका अनुसार जाजरकोटलाई केन्द्रविन्दु बनाएर रातियता पटक–पटक परकम्प गइरहेको छ ।

६.४ म्याग्नेच्युडको भूकम्पपछि मध्यराति १२ः८ बजे ४.५ म्याग्नेच्युडको धक्का मापन भएको छ । यस्तै, मध्यराति १२ः२९ बजे ४.२ म्याग्नेच्युड, १२ः३५ बजे ४.३ म्याग्नेच्युडको भूकम्प गयो ।

यस्तै, शनिबार बिहान ४ः१६ बजे ४.६ म्याग्नेच्युडको परकम्प मापन भएको भूकम्प मापन केन्द्रले जनाएको छ । ४ म्याग्नेच्युडभन्दा कमका परकम्प पनि लगातार गइरहेको छ ।

यसअघि मध्य नेपालको धादिङलाई केन्द्रविन्दु बनाएर कात्तिक ७ गते ६.१ म्याग्नेच्युडको भूकम्प गएको थियो ।

असोज १६ गते बझाङलाई केन्द्रविन्दु बनाएर ६.३ म्याग्नेच्युडको भूकम्प गएको थियो । त्यसबेला धेरै मानवीय र भौतिक क्षति भएको थिएन । सो भूकम्पमा एक जनाको मृत्यु भएको थियो भने १ सय ५० भन्दा बढी घरमा क्षति पुगेको थियो । यद्यपि, सो भूकम्प पश्चात पश्चिम नेपालको बझाङलाई केन्द्रविन्दु बनाएर आश्विन र कात्तिकमा पटक–पटक भूकम्प गएको थियो ।

हुन त यो वर्षको सुरुवातबाट नै पश्चिम नेपालमा भूकम्पको धक्का गइरहेको थियो । बाजुरा केन्द्रविन्दु बनाएर वैशाख १० गते ४.१ म्याग्नेच्युड र वैशाख १४ गते ४.९ म्याग्नेच्युडको भूकम्प गएको थियो ।

यस्तै, वैशाख १५ गते नै बाजुरामा ५.९ म्याग्नेच्युड र ४.१ म्याग्नेच्युडको भूकम्प गएको थियो । वैशाख १५ गतेको भूकम्पमा परी एक जनाको मृत्यु भएको थियो भने केही घरमा क्षति पुगेको थियो ।

पश्चिम नेपालमा यो वर्ष ४ म्याग्नेच्युडमाथिका भूकम्प :

पश्चिम नेपालमा शताब्दीयता ठूलो भूकम्प नगएकाले जुनसुकै बेला ठूलो घटना हुन सक्ने चेतावनी भूकम्पविदहरुले दिँदै आएका थिए । भूकम्पको जोखिम क्षेत्रमा रहेर लामो समयसम्म भूकम्प नजाँदा त्यसले महाभूकम्प उत्पन्न गर्न सक्ने शक्ति सञ्चित गर्ने उनीहरुले बताउँदै आएका थिए ।