खोज

बुटवल, १९ कार्तिक । बहिरा तथा सुस्तश्रवण संघ रुपन्देहीको विशेष साधारण सभा तथा अधिवेसन बुटवलमा सम्पन्न भएको छ । साधारण सभामा बोल्दै बुटवल उपमहानगरपालिकाका प्रमुख खेलराज पाण्डेयले अपांगता अधिकारको लागि स्थानिय सरकार सधै सकारात्मक रहेको बताए । उनले यस आर्थिक बर्षमा अपांगता भएका व्यक्तिहरुको सेवाको लागि सहजता ल्याउने गरी पालिकामा दोषासे सहितको अपांगता हेल्प डेक्स स्थापना गर्ने प्रतिवद्धता जनाए । ‘कार्यपालिका बैठकबाट निर्णय गराएर हामी हेल्प डेक्स स्थापना गर्ने छौं ।’— उनले भने ।
अपांगता अधिकारको लागि तालिम, गोष्ठी लगायतका विभिन्न आयमुलक तथा सेवामुलक तालिमसंगै अपांगता भएका व्यक्तिहरुको लागि समाजमा पुर्नस्थापनाका कार्यक्रम चलाउने बताए ।

कार्यक्रममा राष्ट्रिय अपांग महासंघ नेपालका केन्द्रीय कोषाध्यक्ष कुमार रेग्मीले अपांगता अधिकारको लागि सबै जना एक जुट हुनुपर्ने बताए । कार्यक्रममा राष्ट्रिय अपांग महासंघ नेपालका संघीय अनुसासन आयोगका संयोजक देवी बहादुर पोखरेलले अपांगता अधिकारको लागि सबै तहका सरकारले विशेष योजना बनाएर अगाडी बढ्न आग्रह गरे ।

कार्यक्रममा बुटवलउपमहानगरपालिका वडा नम्बर ८ का अध्यक्ष यज्ञ प्रसाद पंगेनीले अपांगता भएका व्यक्तिहरुको लागि वडा वडामा बजेट विनियोजन गरिएपनि समन्वय अभावमा उपयोग र प्रभावकारी नभएको भन्दै आगामी दिनहरुमा सरोकारवाला संस्थाहरुसंग सहकार्य गरिने बताए ।

कार्यक्रममा राष्ट्रिय अपांग महासंघ नेपालका केन्द्रीय सदस्य मदन बोहोरा, लुम्बिनी प्रदेश सचिव सन्तोष पन्थी, सडक डिभिजन बुटवलका प्रमुख महेश्वर लम्साल, संस्थाका सल्लाहकार पिताम्बर लम्साल लगायतले संस्थागत रुपमा आफुहरु अधिकारको लागि आवाज उठाउदा सुनुवाई भएको बताए ।

कार्यक्रममा अध्यक्ष कासीराम न्यौपानेले संस्थाको वार्षिक प्रतिवेदन र महासचिव नसिव खड्काले आर्थिक प्रतिवेदन प्रगतिबारे जानकारी गराएका थिए ।