खोज

नेपालगञ्ज, १६ कार्तिक । नेपालगन्जमा संचालन हुँदै आएको धारा नेपालगन्ज म्याराथनको नवौँ संस्करणको तयारी अन्तिम चरणमा पुगेको छ । मंसिर ९ गते शनिबार हुने नवौं धारा नेपालगन्ज म्याराथनमा यसवर्ष पनि अन्तर्राष्ट्रिय मापदण्ड अपनाएर सञ्चालन गरिने आयोजक क्रियटिभ ह्याण्ड्सले जनाएको छ ।

क्रियटिभ ह्याण्ड्सले बिहिबार नेपालगन्जमा पत्रकार सम्मेलन गर्दै म्याराथनको तयारी अन्तिम चरणमा पुगेको जानकारी दिएको छ । पत्रकार सम्मेलनमा बोल्दै क्रियटिभ ह्याण्ड्सका संस्थापक अध्यक्ष टीएस ठकुरीले म्याराथनमा नगद पुरस्कारसम्बन्धि विस्तृत जानकारी चाँडै गराइने बताए । नेपालगञ्ज म्याराथनलाई थप आकर्षक बनाउन बिभिन्न क्षेत्रका दर्जन बढि सफल ब्यक्तित्वहरुको उपस्थितिमा एकदिने कनक्लेभ आयोजना गरिने उनले बताए । यस्तै म्याराथनको रिपोर्टिङका बिषयमा सञ्चारकर्मीहरुसँग पनि एक दिने अभिमुखीकरण कार्यक्रम गरिने अध्यक्ष ठाकुरीले बताए ।

क्रियटिभ स्याण्ड्सको आयोजना एवं क्रियटिभगन्ज मिडिया एण्ड इभेन्ट म्यानेजमेन्टको व्यवस्थापन रहेको नवौ धारा नेपालगन्ज म्याराथनका लागि २०६० भदौ १ गतेदेखि नै खेलाडी दर्ता खुला राखिएको ठकुरीले बताए ।

पत्रकार सम्मेलनमा बोल्दै लुम्बिनी प्रदेश खेलकुद परिषदका सदस्य सचिव जयप्रकाश भट्टराईले धारा नेपालगन्ज म्याराथनले खेलजगतमा नयाँ आयाम ल्याएको बताए । उनले नेपालगन्ज म्याराथन प्रदेश खेलकुदको एक सम्पत्ति बनेको उल्लेख गर्दै यस्को प्रवर्धन र विकासको लागि प्रदेशले वार्षीक क्यालेण्डरमा समावेश गर्ने प्रतिबद्धता ब्यक्त गरे । उनले भने ’नेपालगञ्ज म्याथन लुम्बिनी प्रदेशको गौरवको प्रतियोगिता हो, यसलाई प्रदेश सरकारले अब अपनत्व लिन्छ ।’ गत बर्षदेखि सुरु भएको लुम्बिनी म्याथन र नेपालगञ्ज म्याथन प्रतियोगितालाई प्रदेश सरकारले अपनत्व लिने बताउँदै सदस्य सचिव भट्टले पहिलो प्राथमिकतामा नेपालगञ्ज रहेको दाबी गरे । प्रदेश सरकारले गर्नुपर्ने कार्य नेपालगन्जमा एक संस्थाले गरिरहेको बताउँदै उनले त्यसकालागि म्याराथनका संस्थापक टीएस ठकुरी प्रति उच्च सम्मान प्रकट गरे ।

आयोजकका अनुसार यसवर्ष अघिल्लो वर्षमा चार विधा थप गरि विभिन्न १४ वटा विधामा प्रतिस्पर्धा समावेश गरिएको छ । स्कूलस्तरीयमा बाह्य जिल्ला र स्कूलस्तरीय दौडमा पनि कक्षा ६ देखि ८ तथा ९ देखि १२ सम्मको अलग–अलग स्पर्धा गराइनेछ । जसमा विभिन्न बिद्यालयबाट अति बिपन्न परिवारका ३ सय बिद्यार्थीहरुको लागि अमेरिकाको भर्जिनियामा बसोबास गर्ने नेपालीहरुले सहयोग गर्ने आयोजकले जनाएको छ ।
प्रतियोगितामा पुरुषतर्फ म्याराथन ४२.१९५ किमी, महिलातर्फ हाफ म्याराथन २१ किमी, १० किमी पुरुष र महिला खुल्ला, ५ किमी स्कुलस्तरीय छात्र एवं छात्रा, किड्स रन ८ देखि १२ वर्ष उमेर समुह, ५ किमी कर्पोरेट रन ५ किमी ट्राइसाइकल र ५ किमी वाकाथन समावेश गरिएको छ । स्कुलस्तरीय दौडलाई बाँके जिल्ला तथा वाह्य जिल्ला गरी अलग अलग स्पर्धा गराइ पुरस्कृत गरिनेछ । त्यसैगरी, बाँके जिल्लाका हकमा कक्षा ६ देखि ८ तथा ९ देखि १२ सम्मको अलग अलग दौड (५ किमी) सञ्चालन गरिनेछ ।

नेपालगन्ज म्याराथन एसोसियसन अफ इन्टरनेसनल म्याराथन एण्ड डिस्टेन्स रेश एम्स वाट मान्यताप्राप्त दौड प्रतियोगिता हो । जापानको ओशाकामा भएको २३ औ सभामा नेपालगन्ज म्याराथनका संस्थापक टीएस ठकुरीले भाग लिएका थिए । यसले भविष्यमा अन्तर्राष्ट्रिय सम्बन्ध विस्तार हुने अपेक्षा गरिएको छ। एम्सको प्रमाणीकरण रुटमार्फत नेपालगन्ज म्याराथनले नेपालकै पुरानो सहर नेपालगन्ज र उदीयमान सहर कोहलपुरलाई जोड्ने काम गरेको आयोजकको दाबी छ ।

नेपाल सरकार र तत्कालीन विद्रोही नेकपा माओवादीबीच दशक लामो सशस्त्र द्वन्द्व विधिवत अन्त्य गर्नेगरी भएको विस्तृत शान्ति सम्झौता ५ मंसिर २०६३ को स्मरणमा नौ वर्षदेखि निरन्तर नेपालगन्ज स्याराथन आयोजना हुँदैआएको छ । सोही सम्झौतामार्फत मुलुकले शान्ति, विकास र समृद्धिको बाटोको यात्रा तय गरेको स्मरण गर्दै हरेक वर्ष ५ मंसिरमा नेपालगन्जको बीपी चौक र कोहलपुर चौराहामा क्रियटिभ ह्याण्ड्सले दीप प्रज्वलन समेत गर्दै आएको छ । पत्रकार सम्मेलनमा म्याराथनका मुख्य प्रायोजक केएल दुगड ग्रुपका प्रबन्ध निर्देशक प्रदिप छाजेड, अर्का प्रायोजक चम्पालाल बोथरा लगायतको उपस्थिती रहेको थियो ।