खोज

दाङ, १६ कात्तिक ।

तुलसीपुर उपमहानगरपालिकाले प्लाष्टिकजन्य माला गुच्छा बिक्री वितरणमा रोका लगाएको छ । असोज महिनामै सूचना प्रकाशित गरेर बिक्री वितरणमा रोक लगाएपनि व्यवसायीहरुले बिक्री वितरण गर्दै आएपछि पालिकाले नियन्त्रणमा ल्याएको छ ।

तुलसीपुर उपमहानगरपालिका उपभोक्ता हित संरक्षण शाखाका प्रमुख रेखा शर्माले बुधबार दश वटा पसलबाट प्लास्टिकका माला,गुच्छा नियन्त्रणमा ल्याएको बताइन् । उनले असोज २३ गते नै नेपाल सरकारकले वातावरण संरक्षण ऐन २०७६को दफा १५ को उपदफा (६)ले दिएको अधिकार प्रयोग गरी नियन्त्रणमा लिइएको बताइन् ।

तुलसीपुर उपमहानगरपालिका क्षेत्रभित्र मात्रै १५ जनाले व्यवसायीकरुपमा पुष्प व्यवसाय गर्दै आएका छन् भने संस्थागतरुपमा पढ्दै कमाउँदै अभियानअन्तर्गत मेट्रो कलेज, गोरखा मोडेल कलेज,गुरुजजुर मावि र अमर मावि उरहरीका विद्यार्थीहरुले पुष्प खेती गरेका छन् ।

जिल्लाका तुलसीपुर उपमहानगरपालिका,लमही नगरपालिका, राप्ती गाउँपालिकाले प्लास्टिकजन्य पुष्प गुच्छा बिक्री वितरण नगर्न सूचना जारी गर्दै आएका छन् ।

तुलसीपुर उपमहानगरपालिकाका नगरप्रमुख टीकाराम खड्काले व्यावसायीक रुपमा पुष्प खेती गर्दै आएका व्यवसायीहरुको प्रवर्धन गर्नका लागि बजारका चार क्षेत्र बसपार्क,तुलसी मार्ट,तरकारी फलफूल बिक्री केन्द्र र अरनिको मैदान क्षेत्र निर्धारण गरेको बताउनुभयो । त्यस्तै पालिकाले पुष्प व्यवसाय प्रवर्धनका लागि डिजिटल प्रसार प्रचार, र पालिकाका कार्यक्रमहरुमा पुष्पका माला प्रयोग गर्दै आएको बताए ।

तुलसीपुर उद्योग वाणिज्य संघका अध्यक्ष रामप्रसाद चालिसेले प्लास्टिकजन्य पुष्प गुच्छा बिक्री वितरणमा रोक लगाउनु सकारात्मक काम भएको र यसले पुष्प व्यवसायीका लागि ठुलो राहत मिलेको बताए ।

पुष्प व्यवसाय गर्दै आएका बुद्धिराज पौडेलले तुलसीपुर क्षेत्रका लागि चाडपर्वहरुमा एक सय ६० क्विन्टल पुष्पले पर्याप्त हुने बताए । यस वर्ष तुलसीपुर उपमहानगरपालिका क्षेत्रमा मात्रै ६ सय क्विन्टल बढी पुष्प उत्पादन भएको छ । उनले उत्पादन गरेको पुष्प काठमाडौँ, नेपालगञ्ज, महेन्द्रनगर,सल्यान, बुटवल, नेपालगञ्ज पठाउँदै आएको बताए ।

तिहार पर्वलाई लक्षित गर्दै पुष्प विकास केन्द्रले भारतीय सयपत्री माला आयातमा रोक लगाएपछि यस क्षेत्रका किसान उत्साहित बनेका छन् । पुष्प व्यवसायी गणेश भण्डारीले भारतीय सयपत्री आयातमा रोक लगाएपछि आफूले उत्पादन गरेको पुष्प बिक्री वितरणमा सहज हुने बताए ।