खोज

आजभन्दा २५ वर्षअगाडि २०५५ सालमा यस क्षेत्रमै महिला तथा प्रसूति सेवा सम्बन्धि विशिष्टीकृत सेवाको अभाव रहेको र बालबालिकालाई लक्षित स्वास्थ्य संस्था नभएको अवस्थामा यस अस्पतालको स्थापना हुनु ऐतिहासिक निर्णय थियो । यस अस्पतालको सञ्चालन, विकास र सम्बद्र्धनमा बुटवल उपमहानगरपालिका, आम्दा नेपाल र बुटवल उद्योग वाणिज्य संघ, रूपन्देहीको समान उत्तरदायित्व र जिम्मेवारी रहेको छ । नेपालले सार्वजनिक–निजी साझेदारी अवधारणा अपनाउनु भन्दा पहिल्यै नमूनाको रूपमा यस अस्पतालको स्थापना भई सञ्चालनको २५औं वर्ष सफलतापूर्वक पूरा गरेको छ । अब हामीले यस अस्पताललाई एकसाथ दुई क्षेत्रमा अगाडि बढाउँदैछौं । अस्पतालको सेवालाई थप स्तरीय बनाउँदै स्वास्थ्य सेवाका साथसाथै जनशक्ति उत्पादन गर्नेतर्फ पनि हामीहरू अगाडि बढेका छौं । यस अस्पतालको स्तरवृद्धि गरी महिला र बालबालिकाका लागि सुविधासम्पन्न विशिष्टीकृत अस्पताल बनाइनेछ ।

१ सय शैयामा थप २ सय शैया थप गरी ३ सय शैयामा पु¥याउँदैछौं । यसले यो क्षेत्रमै महिला तथा बालबालिकाको स्वास्थ्य उपचारमा सहजता ल्याउनेछ । अर्को हामीलाई चाहिने जनशक्ति हामी यहीँ उत्पादन गर्दैछौं । आम्दा स्वास्थ्य विज्ञान प्रतिष्ठानअन्तरगत यसै शैक्षिक सत्रदेखि प्रमाणपत्र तह नर्सिङ, सामान्य चिकित्सा (एचए) र डिप्लोमा इन फार्मेसी गरी तीनवटा शैक्षिक कार्यक्रम सञ्चालन गरेका छौं । अहिले भर्नाको प्रक्रिया शुरु भएको छ । यसले हामीलाई आवश्यक जनशक्ति उत्पादन गर्नमा महत्वपूर्ण भूमिका निर्वाह गर्नेछ ।

वर्तमानमा १ सय शैयाको क्षमतामा सञ्चालित यस अस्पतालले बिरामीहरूको चाप र आवश्यकतालाई मध्यनजर गर्दै यसलाई ३ सय शैयाको अस्पतालमा स्तरोन्नति गर्नका लागि गत जेठ २०८० मा नेपालबाट ६ सदस्यीय टोलीले जापानमै पुगेर थप २०० शैया थप हुने गरी समझदारी गरेअनुसार अस्पताल भवनको निर्माण हुँदैछ । यसमा आम्दा इन्टरनेशनलले सबैभन्दा बढी दायित्व बहन गर्ने भएको छ । अस्पतालका लागि पुस्तकालय निर्माण गर्दैछौं । म बुटवल उपमहानगरपालिकामा नगरप्रमुख निर्वाचित भएदेखि नै यस अस्पतालमा आमा सुरक्षा कार्यक्रम सञ्चालन गरी राज्यले प्रदान गरेको सुविधा उपलब्ध गराउने प्रयास गरेको थिएँ । बुटवल उपमहानगरपालिकाको अनुदानमा यसै वर्षभित्र आमा सुरक्षा कार्यक्रम सञ्चालन हुनेछ । यसले बुटवलबासीलाई मात्रै नभई यस क्षेत्रकै प्रसुति सेवा लिनेको संख्या वृद्धि हुनेछ । अस्पतालको सेवालाई अझै स्तरीय बनाउन र अस्पताल प्रशासनलाई चुस्त दुरुस्त राख्नका लागि पनि केही प्रयासहरू भइरहेका छन् । यो अस्पताल बुटवल र बुटवलबासीको चाहनाअनुसार बुटवल उपमहानगरपालिका, आम्दा इन्टरनेशनल, आम्दा नेपाल र बुटवल उद्योग वाणिज्य संघको समझदारीमा निरन्तर स्वास्थ्य सेवा र शैक्षिक जनशक्ति उत्पादनमा अगाडि बढ्नेछ ।

स्थानीय सरकारका रूपमा बुटवल उपमहानगरपालिकाले पनि यस अस्पताललाई यस क्षेत्रको गरिमाका रूपमा लिएको छ । यस अस्पताललाई महिला तथा बालबालिकाको विशिष्टीकृत अस्पताल र आवश्यक जनशक्ति उत्पादन गर्ने केन्द्रका रूपमा अगाडि बढाएका छौं ।
स्थापनाको २५ वर्ष पूरा गरेको यस अवसरमा म यो अस्पताल स्थापनाको अगुवाई गर्ने तत्कालीन बुटवल नगरपालिकाका मेयर स्व. सूर्य प्रसाद प्रधान, आम्दा इन्टरनेशनलका अध्यक्ष डा. शिगेरू सुगानामी तथा बुटवल उद्योग वाणिज्य संघका तत्कालीन अध्यक्षप्रति सम्मान तथा आभार प्रकट गर्दछु । यस्तै, अस्पताललाई ३ सय शैयामा स्तरोन्नति गर्नका लागि प्रतिबद्ध भई २०७९ असोज १० मा बुटवलमा र गत जेठ २०८०मा जापानमा भएको बैठकमा हस्ताक्षर गर्नुहुने आम्दा इन्टरनेशनलका अध्यक्ष डा. शिगेरू सुगानामीलाई आभार प्रकट गर्दछु । स्थापनाको प्रारम्भिक चरणको प्रयासबाट यो अवस्थासम्म ल्याइपु¥याउनका लागि सधै सकारात्मक भूमिका निर्वाह गर्ने आम्दा नेपालका अध्यक्षहरू तथा पदाधिकारीहरू, बुटवलका समाजसेवीहरू, जनप्रतिनिधिहरू, यहाँका बासिन्दा र सबै अगुवाहरू प्रति सम्मान प्रकट गर्दछु । यो अस्पताललाई महिला र बालबालिकाको स्वास्थ्य उपचारमा अनवरत खटिनुहुने स्वास्थ्यकर्मीहरूप्रति सम्मान प्रकट गर्दछु । अस्पताललाई हालै प्रमाणपत्र तह नर्सिंङ, सामान्य चिकित्सा र डिप्लोमा इन फार्मेसी गरी तीन वटा शैक्षिक कार्यक्रम स्वीकृति दिएकोमा नेपाल सरकार चिकित्सा सेवा आयोग र सीटीइभीटीलाई धन्यवाद व्यक्त गर्दछु ।

अस्पतालको २५औं वार्षिकोत्सवका अवसरमा स्थापनाकालीन कार्यसमिति पदाधिकारीहरू, नेपाली तथा जापानी चिकित्सक, स्वास्थ्यकर्मी एवं कर्मचारीहरू, यस अस्पताललाई माया गरी संरक्षण प्रदान गर्ने बुटवल–७ का जनप्रतिनिधि एवं समुदायबासीहरूप्रति कृतज्ञता व्यक्त गर्दछु ।
अन्त्यमा, यो अस्पताललाई अझै उत्कृष्ट बनाउनका लागि सबैक्षेत्रको साथ र सहयोग आवश्यक छ । अस्पतालको सेवाको गुणस्तर र दायरा आगामी दिनमा अझ परिष्कृत गर्दै यसले लुम्बिनी क्षेत्रमा मात्र नभई राष्ट्रिय स्तरमै पहिचान प्राप्त गर्नेमा सबैको सकारात्मक सहयोगको अपेक्षा गर्दछु ।

(सिद्धार्थ बाल तथा महिला अस्पतालको २५ वर्ष पूरा गरेको अवसरमा आम्दा नेपाल, सिद्धार्थ बाल तथा महिला अस्पतालका अध्यक्ष तथा स्थानीय व्यवस्थापन समिति, बुटवल उपमहानगरपालिकाका प्रमुख खेलराज पाण्डेयको विशेष शुभकामना सन्देश)