खोज

बर्दघाट, १५ कात्तिक ।

टि ट्वान्टी विश्वकप क्रिकेट एशिया छनौट प्रतियोगिताको अन्तिम लिग म्याच नेपाल र ओमनविच बिहीबार हुँदैछ । त्रिवि क्रिकेट ग्राउण्डमा विहान ९ बजे सुरु हुने खेलमा नेपाल र ओमन समूहको शीर्षस्थानको लागि भिड्दैछन् ।

नेपाल र ओमन टि ट्वान्टी अन्तर्राष्ट्रिय क्रिकेटमा यसअघि ४ पटक आमने सामने भएका छन् । हालसम्म यी दुइ देशविच सम्पन्न ४ अन्तर्राष्ट्रिय खेलमध्ये नेपाल ओमनमाथि हावी हुँदै आएको छ । नेपालले ३ जित हात पार्दा ओमनले १ जित मात्र हात पारेको छ । २०१९ मा ओमनमा भएको नेपाल, आयरल्याण्ड, युएइ, हङकङ र ओमान सम्मिलित पेन्टाङगुलर सिरिजमा नेपाल ओमनसँग ६ विकेटले पराजित भएको थियो ।

सन २०२२ मा सम्पन्न नेपाल, युएइ, आयरल्याण्ड र ओमन सम्मिलित क्वाडरेङ्गुलर सिरिजको खेलमा नेपालले ओमनलाई ६ विकेटले पराजित गर्दै ओमनमाथि पहिलो जित निकालेको थियो । नेपाल र ओमन सन २०२२ मा पनि विश्वकप क्वालिफायर्स खेलमा आमने सामने भएका थिए । क्वालिफायर्सको पहिलो खेलमा ओमनलाई नेपालले ३६ रनले पराजित गरेको थियो ।

ओमनसँग नेपालले अन्तिम खेल २०२२ मा विश्वकप क्वालिफायर्सको दोश्रो खेल खेलेको थियो जसमा नेपालले ९ विकेटको फराकिलो अन्तरले ओमानलाई पाखा लगाएको थियो । ओमान र नेपाल पुनः विश्वकप क्वालिफायर्समा आमनेसामने भएका छन् । पछिल्लो ५ खेललाई विश्लेषण गर्दा नेपालले केही दिनअघि नेपालमा सम्पन्न नेपाल, हङकङ र युएइ सम्मिलित ट्राइसिरिजमा २ जित एक हार र विश्वकप छनौटमा लगातार २ खेल जित्दै ४ जित र १ हार ब्यहोरेको छ भने ओमानले गत सेप्टेम्बरमा सम्पन्न गल्फ क्रिकेट टि ट्वान्टी च्याम्पीयनसिपका ३ खेल र विश्वकप छनौटका २ खेल गरी लगातार ५ जित आफ्नो पक्षमा पारेको छ ।

जारी प्रतियोगितामा समूह ए मा रहेका नेपाल, ओमन, मलेसिया र सिँगापुरविच २—२ खेल सम्पन्न भइसकेका छन । जसमा नेपाल र ओमन दुबै टोलीले २—२ खेल आफ्नो पक्षमा पार्दै समान ४—४ अँक बटुल्दै एक खेल खेल्नुअघि नै सेमीफाइनलमा आफ्नो स्थान पक्का गरिसकेका छन । समान ४ अँक भएता पनि ओमान १.३५० नेट रनरेटका साथ शीर्षस्थानमा रहेको छ भने नेपाल १.३२२ नेट रनरेटका साथ दोश्रो स्थानमा रहेको छ । बिहीबार हुने खेलमा विजेताले समूहमा शीर्षस्थान ओगट्दै सेमिफाइनलमा समूह वि को उप विजेता (युएइ, हङकङ वा बहराइन मध्ये एकसँग सेमीफाइनल खेल्ने छ । अँक तालिकाको समीकरण अनुसार समुह ए को विजेता समुह वि को उपविजेता सँग र समुह ए को उप विजेता समुह वि को विजेतासँग सेमीफाइनलमा भिड्नेछन । एशिया छनौट प्रतियोगिताका फाइनल प्रवेशी टोलीले सन २०२४ मा वेष्ट इन्डिज र अमेरिकाले सँयुक्त रुपमा आयोजना गर्ने टि ट्वान्टी विश्वकपमा प्रवेश पाउनेछन् ।