खोज

बुटवल, १४ कात्तिक ।

संयुक्त राषट्रसंघका महासचिव एन्टनियो गुटेरेसले लुम्विनी आएर संसारभर भइरहेका द्वन्द्व अन्त्यका लागि विश्व शान्तिको कामना गरेका छन् । बुद्ध जन्मस्थल लुम्बिनिस्थित मायादेवी मन्दिर दर्शन पछि बोल्दै गुटेरसले संसारभर भइरहेका द्वन्द्व अन्त्यका लागि शान्तिको कामना गरेका हुन् ।

गुटरेसले इजरायल, प्यालेस्टाइन, सुडान लगायतका देशमा भएको द्वन्द्व अन्त्य गर्न आव्हान समेत गरे । बुद्ध जन्मस्थल लुम्बिनी आउन पाउँदा खुसी व्यक्त गर्दै उनले बुद्धको पञ्चशीलको दर्शन र संयुक्त राष्ट्र संघको मिशन मिल्दोजुल्दो भएको उल्लेख गरे ।

‘शान्ति र मानवता अपरिहार्य बिषय हो मानवियता मर्न दिनु हुन्न’, उनले भने , ‘बुद्धका सन्देश, पन्चशीलको सिद्धान्त र संयुक्त राष्ट्रसंघको मिसन मिल्दोजुल्दो छ । यो शान्तिको मुहानबाट सबैले सिकौँ, लुम्बिनी घुमौ ।’

बुद्ध जन्मस्थल लुम्बिनी आउन पाउँदा अत्यन्तै खुसी लागेको बताउँदै उनले जलवायु परिवर्तनले पारेको असरप्रति चिन्ता व्यक्त गरेका छन् । इजरायल, प्यालेस्टाइन, सुडानलगायतका देशमा भएको द्वन्द्व अन्त्य गर्न उनले आव्हान गरे ।

गुटेरेसले जलबायु परिवर्तनको असर रोक्न सामूहिक पहलको आवश्यकता औँल्याए । मंगलबार बिहान विशेष विमानबाट गौतमबुद्ध अन्तर्राष्ट्रिय विमानस्थल हुँदै लुम्बिनी आइपुगेका गुटेरेसले शान्ति दीपमा दिप प्रज्ज्वलन, मायादेवी मन्दिरमा पुगेर दर्शन र बृक्षरोपण गरेका छन् । शान्ति दीपबाट मायादेवी मन्दिरसम्म उनी पैदल हिँडेका थिए ।

महासचिव गुटेरेस लुम्बिनी विकास कोषको स्वागत समारोहमा सहभगी भए । लुम्बिनी विकास कोषका सदस्यसचिव सानुराजा शाक्यका अनुसार महासचिवलाई लुम्बिनीमा रहेका विहार, बौद्धधर्मका गुरु, भिक्षु भिक्षुणीसहित लुम्बिनी सांस्कृतिक नगरपालिकाका स्थानीय आमा समूह, थारूलगायत विभिन्न जातीय समूहले शान्तिदीपबाट मायादेवी मन्दिरको दुवैतर्फ बसेर स्वागत गरेका थिए ।

यसैगरी महासचिव गुटेरेसले आगन्तुक पुस्तिकामा हस्ताक्षर गरे । महासचिवको लुम्बिनी भ्रमणले लुम्बिनी र गौतमबुद्धको शान्तिको सन्देश विश्वभर थप प्रचार–प्रसार हुने र लुम्बिनी क्षेत्रको पर्यटन प्रवद्र्धनमा मद्दत पुग्ने अपेक्षा गरिएको छ ।

बुद्ध जन्मस्थल लुम्बिनीमा पहिलो पटक भ्रमणमा आउनुभएका महासचिव गुटेरेसलाई प्रधानमन्त्री पुष्पकमल दाहाल प्रचण्डसँगै संस्कृति, पर्यटन तथा नागरिक उड्डयन मन्त्री सुदन किराँती, लुम्बिनीका मुख्यमन्त्री डिल्लीबहादुर चौधरी, संस्कृति, पर्यटन तथा नागरिक उड्यन राज्यमन्त्री सुशीला श्रीपाली, लुम्बिनी विकास कोषका उपाध्यक्ष ल्यारक्याल लामा लगायतले स्वागत गरेका थिए ।