खोज

बुटवल,११ कात्तिक । उद्योग ब्यापार संघ बुटवलको सचिवालय भवन शिलान्याश भएको छ । बुटवल–११ देवीनगरमा वडा कार्यालय भवनको पछाडि बुटवल उपमहानगरले दिएको २ कठ्ठा जग्गामा बुटवल उपमहानगरका नगर प्रमुख खेलराज पाण्डेयले सचिवालय भवन शिलान्याश गरेका हुन् ।
सो अवसरमा बोल्दै नगर प्रमुख पाण्डेयले उपमहानगरले बुटवलमा क्रियाशील सबै व्यवसायिक संघसंस्थालाई समान दृष्टिले हरेको र सबै संस्थाहरुसंग सहकार्य गरेर बुटवलको आर्थिक विकास र बजार चलायमान बनाउन चाहेको बताए । उद्योगी व्यवसायीका संस्थाहरु स्थापित र बलियो भए मात्र बुटवल बजार गुल्जार हुने र बुटवलको विकासमा योगदान पुग्ने भएकाले उपमहानगरले यस्ता संस्थाहरुसंग सदैव हातेमालो गरेर अघि बढ्ने बताए ।
संघका अध्यक्ष गोबिन्दराज गैरेले सचिवालय भवनका लागि जग्गा उपलब्ध गराएकामा उपमहानगरपालिका र वडा कार्यालयलाई धन्यवाद ज्ञापन गर्दै एक वर्षभित्र दुईतले भवन तयार गर्ने बताए । तल्लो तला सभा हल र माथिल्लो तलामा कार्यालय रहने गरी बन्ने भवनको लागत डेढ करोडदेखि २ करोड हुने जानकारी गराउंदै गैरेले भवन बनाउन सबैसंग आर्थिक,भौतिक र नैतिक सहयोगको अपेक्षा गरेको बताए । अध्यक्ष गैरेले आगामी २०८२ सालमा बुटवल मण्डपमा औद्योगिक ब्यापार मेला सञ्चालनको पालो रहेको समेत जानकारी गराए ।

कार्यक्रममा नेपाल उद्योग ब्यापार महासंघका केन्द्रीय महासचिव खेम पराजुलीले बुटवलका मुख्य ४ व्यवसायिक संस्था मध्ये कान्छो भएपनि संघले अन्य पुराना संस्था सरह सामाजिक योगदान गरेको बताउंदै संघको भवन निर्माणमा महासंघबाट आर्थिक सहयोगको पहल गर्ने बताए ।

वडा अध्यक्ष रामचन्द्र क्षेत्रीले बुटवलका अन्य ३ व्यवसायिक संस्थाका भवन बनिसकेका तर यो संस्थाको भवन बन्ने क्रममा रहेकाले सबैको सहयोग आवश्यक रहेको बताए । कार्यक्रममा नेपाल पत्रकार महासंघका अध्यक्ष रामराज पोखरेल, रुपन्देही उद्योग संघका वरिष्ठ उपाध्यक्ष कृष्ण पराजुली, संघका उद्योग उपाध्यक्ष विष्णु पाण्डे, महासचिव पदम जीसी लगायतले आआफ्ना भनाई राखेका थिए ।