खोज

बुटवल, ६ कात्तिक ।

घर चाँडो पुगेर दसंै मनाउन आतुर प्यूठानका सुचन खड्का शुक्रबार दिउँसो सडक दुर्घटनामा परे । वर्ष दिनमा परिवार, साथीभाईसंग एक हप्ताको रमाईलो गर्ने सपना अधुरो भयो । बाईकमा धादिङबाट आउँदै गरेका उनी बर्दघाट नजिक चिसापानीको खाल्टोमा परे । धादिङ आँखुखोला हाईड्रो पावर कम्पनीमा संगै काम गर्ने रुपन्देहीका हिरन्जन चौधरीले चलाएको मोटरसाईकल खाल्टोमा परेर दुबै जना घाईते भए । छिटो घर पुग्ने आशामा हिंडेका प्यूठानका सुचन खड्का तिलोत्तमा नगरपालिकास्थित क्रिमशन अस्पतालको बेडमा छन् । चालक निरन्जनको खुट्टा र शरीरका विभिन्न भागमा सामान्य चोट छ ।

उता सुचनको भने दाहिने खुट्टाको घुडाभन्दा मुनी ३ ठाउँमा भाँचिएको छ । शुक्रबार साँझ अस्पताल भर्ना भएका उनको आइतबार अपरेसन भएको छ । दुईदुई पटक समय थप गरेर पनि कामले तीब्रता लिन नसकेको बुटवल–नारायणगढ सडकको काम समयमा पूरा नहँुदा यहाँ दिनहुँजसो दुर्घटना हुने गरेको छ । कतिपय ठाउँमा सडकमा पानी जम्ने र ठुला खाल्टोहरु परेको छ । नयाँ चालकहरुलाई यस्तो खाल्टाहरुले झुक्काउने गरेको छ । शुक्रबार उनीहरु दुबैजना यस्तै भयो । धादिङबाट आएको उनीहरुले बिग्रिएको बाटोका सही मापन गर्न नसक्दा दुर्घटनामा परेका हुन् । एनएन पल्सर चलाएर आएका उनीहरुको चिसापानीमा दुर्घटना पछि उद्दार गरी अस्पतालसम्म ल्याईएका थिए । दसैको मुखमा आएर अस्पताल बस्नुपर्दा निक्कै दुख भएको खड्का बताउँछन् । गाउँबाट आफन्तहरुलाई दुर्घटनाको जानकारी दिएर दसै अस्पतालमा मनाउने भएका छन् । दुर्घटनामा परेका अर्का साथी भने प्राथमिक उपचारपछि साथीको उपचारमा सहयोग गरिरहेका छन् ।

चाइना स्टेट कन्स्ट्रक्सन कम्पनीले पूर्व–पश्चिम राजमार्गको स्तरोन्नतीको ठेक्का लिएर समयमा सडक निर्माण गर्न नसक्दा बुटवल—नारायणगढ सडक खण्डमा धुलो र खाल्टा खुल्टी मात्रै छ । यहाँ यात्रा गर्ने यात्रु र राजमार्ग आसपासका स्थानीयले सास्ती खेपिरहेका छन । राजमार्ग स्तरोन्नतीको काम सुरु हुनुपूर्व बुटवल—बर्दघाट ३८ किलोमिटर यात्रा गर्न निजी सवारीलाई करिव ४५ मिनेट समय खर्च हुनेमा अहिले कम्तीमा साढे १ घण्टा छुट्याउनुपर्छ । बुटवल–बर्दघाट सडक करिव १ घण्टामा पुग्ने सवारी २ घण्टामा पनि पुग्न मुश्किल हुने गरेको छ । कल्भर्ट, पुल निर्माण भन्दै बनाइएका डाइभर्सनहरु पुल कल्भर्ट निर्माण पश्चात पनि खाल्डो पुरिएका छैनन् । कतिपय ठाउँमा डाइभर्सन नै कायम छ । पछिल्लो समय सडकका कारण यात्रुको चाप समेत घटेको सवारी धनी बताउँछन् । सडक निर्माण सुरु हुनु भन्दा अघि यात्रुहरु सामान्यतः बसमै यात्रा गर्ने गर्दथे तर अहिले मध्यम वर्गीय यात्रुहरु धुलो र खाल्डा सडकबाट राहत पाउन केही बढी रकम खर्चेर साना गाडी भाडामै लिएर भएपनि बैकल्पिक बाटो प्रयोग गर्ने गर्छन् । ठेकेदार कम्पनीले समयमै सडक विस्तारको काम सम्पन्न नगर्दा सवारी मात्र होइन राजमार्ग दायाँवायाँका स्थानीय पनि आजित भएका छ ।

पश्चिम नेपाल बस ब्यवसायी प्रालिका अध्यक्ष दधिराम खरेल दैनिकजसो बुटवल–नारायणगढ सडक खण्डमा चल्ने सवारी साधनहरुमा ईन्धन खपत बढी, पाटपुर्जा विग्रने समस्या धेरै हुने गरेको बताए ।
समयमा बाटो निर्माण नहँुदा साढे २ घण्टामा पुग्ने धेरैजसो सवारी साधनहरु ६ घण्टा लाग्ने अवस्थाकै कारण ईन्धन दोब्बर खपत हुने अवस्था आईपरेको बताउँछन् । अर्कोतर्फ बाटोमा भएका खाल्टाखुल्टीको कारण सवारीका पाटपुर्जा बढी भाँचिने, टायरहरु पड्किने जस्ता समस्या ब्यवसायीहरुको रहेको उनले बताए । सवारी बनाउन बढी खर्च आउने अझ खुला सीमाका कारण नक्कली पाटपुर्जा भित्रिने र यसले ठुलो धनजनको क्षति भैरहेको उनले गुनासो गरे । ‘बाटो बनाउन जति बजेट लागेको छ त्यो भन्दा बढी ब्यवसायीहरुको सवारी बनाउन पार्टपुर्जा र तेलमा खर्च भएको छ’—उनले भने ।

नेपाल सरकारको यस कुरामा बेलैमा ध्यान जानुपर्ने र विकास निर्माणको काममा जनतालाई झन सास्ती र दुख खेप्नुपर्ने परिस्थिति अन्त्य गर्न उनले आग्रह गरे । दुई महिनाअघि बाटोको खाल्टाखुल्टीमा परेर बुटवल–बर्दघाट चल्ने गाउँनगर माइक्रो सवारी समेत दुर्घटना हुन पुगेको उनले बताए । ‘आर्थिक र मानवीय क्षति हुनु भनेको दुखद हो’—उनले भने । सार्वजनिक सवारी साधन प्रयोग गर्ने मध्यम र न्यून वर्गका मानिसहरुलाई बाध्यकारी परिथितिले हवाईजहाजबाट यात्रा गर्नुपर्ने अवस्था आएको उनले बताए ।

वि.सं. २०७५ चैत्र ८ गते तत्कालीन प्रधानमन्त्री केपी शर्मा ओलीले ३ वर्ष भित्रमा निर्माण सम्पन्न गर्ने गरी बुटवलमा सडकको शिलान्यास गरेका थिए । निर्धारित समय सिमा सकिएर थप गरिएको एक वर्ष समेत सकिन आँट्दा दाउन्ने पश्चिम खण्डमा कार्य प्रगति मात्र २८ प्रतिशत रहेको थियो । ठूला, मझौला पुल र कल्भर्ट निर्माणको कामसँगै माटो भर्ने, विद्युत, टेलिफोन पोल स्थानान्तरण गर्ने र खानेपानी पाइपलाई ब्यवस्थापन गर्ने काम सँगसँगै भइरहेको छ ।