खोज

नेपालगञ्ज, ४ असोज ।

दसैंलाई लक्षित गरी मृगौला पीडित बिरामीलाई शनिबार नेपालगञ्जमा निःशुल्क परामर्श तालिम दिईएको छ । नियमित रुपमा डायलासिस गराईरहेका बिरामीले दसैंमा खानपानमा बिशेष ध्यान दिनुपर्ने कुरालाई मध्यनजर गर्दै नेपालगन्जस्थित लाइफलाइन जनरल हस्पिटलले परामर्श तालिम दिएको हो । कार्यक्रममा डाईटेसियन कुबेर गिरीले दसैंमा बनाईने मसलेदार र चिल्लो खानेकुराबाट सकेसम्म डायलासिस गराईरहेका मृगौलाका बिरामीलाई टाढै बस्न सुझाव दिए ।

उनले भने ‘हरेक स्वस्थ अथवा बिरामी मानिसको उमेर, शरिरको तौल र उचाई अनुसारको आवश्यक क्यालोरीको मात्रा फरक हुन्छ, चिकित्सकको सल्लाह अनुसार खाना खानुस् ।’ दैनिक आहारबिहारमा ध्यान दिने मृगौला पीडित विरामीहरु पनि लामो समय सम्म स्वस्थ मानिस सरह जीवन यापन गरिरहेको कैयौं उदाहरण दिएका थिए ।

यस्तै कार्यक्रममा लाइफलाइन जनरल हस्पिटलका प्रमुख डा.पारश श्रेष्ठले मृगौला पीडित बिरामीलाई खानपानसँगै निमोनिया, हेपाटाईटिस बी र फ्लू भ्याक्सिनका बारेमा जानकारी दिएका थिए । परामर्शको कमीका कारण कतिपय बिरामीहरु भ्याक्सिनको फाईदा र लगाउने समय थाहा नपाउँदा विभिन्न रोगको संक्रमणको जोखिम परिरहेको बताए । पछिल्लो समय विश्वमै मिर्गौलाका बिरामी अस्वाभाविक रुपमा बढ्दै गएको डाक्टर पारसले बताए । ‘खास गरी उच्च रक्तचाप र सुगरका कारण विश्वभरी मिर्गौलाका बिरामी बढ्दै गएका छन्’ उनले भने –‘दसैं तिहार पछि बाँकेका सबै वडामा उच्च रक्तचाप, सुगर र मृगौला परिक्षण अभियान पनि चलाउने योजनामा छौं ।’ भेरी अस्पताल नेपालगञ्ज, डायलासिस विभाग प्रमुख समेत रहेका डाक्टर पारशले बालबालिकादेखि युवा पुस्तासमेत मिर्गौला समस्यासंग जुधिरहेको जानकारी दिए । अस्वस्थ खानपिन र बदलिँदो जीवनशैलीका कारण मृगौला समस्या भयावह बन्दै गएको उनको भनाई छ ।

कार्यक्रममा चिकित्सकको परामर्श पछि मृगौलाका विरामीहरुले भेरी अस्पतालको सेवा सुविधाबारे गुनासो पोखेका थिए । करिब ६ बर्षदेखि डायलासिस सेवा लिइरहेका नेपालगञ्जका रबी श्रेष्ठले अस्पतालमा लिफ्टको ब्यवस्था नहुँदा मृगौलाका बिरामीहरुलाई डायलासिस कक्ष सम्म पुग्न अप्ठेरो भईरहेको बताए । उने भने –‘दैनिक रुपमा मृगौलाका बिरामी थपिदैछन्, डायलासिस मेसिन र जनशक्ति नहुँदा नयाँ बिरामीले पालो नपाएर तड्पिनुपर्ने अवस्था छ, तर हाम्रो गुनासोको सुनुवाई नै हुँदैन ।’ स्वाथ्य बिमा सेवा लिनलाई समेत झन्झट भएको बताउँदै उनले मृगौला पीडित विरामीलाई उपचार सेवा सहज बनाईदिन माग गरे ।

यस्तै अर्का बिरामी नरेश बहादुर माझीले नियमित डयलासिस गराईरहेका मृगौला पीडित विरामी मासिक रुपमा पाउँदै आएको भत्ता समयमा नपाउँदा उपचारमा समस्या भईरहेको गुनासो गरे ।

बिरामीहरुको गुनासो सम्बोधन गर्दै भेरी अस्पतालका बरिष्ठ फिजिसियन डाक्टर संकेत रिसालले अस्पतालको अवस्था पहिलेको भन्दा सुधारोन्मुख भएपनि प्रयाप्त नरहेको स्वीकार गरे । लुम्विनी, कर्णाली र सुदुरपश्चिम प्रदेशको रेफरल सेन्टरको रुपमा रहेको भेरी अस्पतलमा बिरामीको चाप पनि अत्यधिक रहेको बताए । डायलासिस मेसिन र जनशक्ति दुबै कमी रहेको स्वीकार गर्दै डाक्टर रिसालले भेरी अस्पतालको नयाँ भवन हस्तान्तरण भएमा धेरै कुरा सहज हुने बताए ।

हाल नेपालगञ्जको भेरी अस्पतालमा ६६ जना मृगौला पीडित विरामीले डायलासिस गराईरहेको अस्पतालले जनाएको छ । निशुल्क परामर्श तालिममा भेरी अस्पताल नेपालगञ्ज र मेडिकल कलेज, शिक्षण अस्पताल कोहलपुरको डायलासिस विभागमा कार्यरत नर्स तथा मृगौला पीडित बिरामीहरुको सहभागिता रहेको थियो ।