खोज

सुनवल, ४ कार्तिक । पश्चिम नवलपरासीको रामग्राम नगरपालिकाले चालु आर्थिक वर्ष २०८०/०८१ को तिन महिनामै झन्डै साढे दुई करोड राजश्व संकलन गरेको छ । गत आर्थिक वर्ष भरिमा ५ करोड ७३ लाख राजश्व संकलन गरेको नगरपालिकाले चालु आर्थिक वर्षको तिन महिनामै २ करोड ४५ लाख ७३ हजार राजश्व संकलन गर्न सफल भएको हो । रामग्राम भित्र रहेका अधिकांश ठुला उद्योगलाई करको दायरमा ल्याएपछि राजश्व संकलन बढेको राजश्व उपशाखा प्रमुख निर्मला प्रजापतीले जानकारी दिईन् । करको दायरामा ल्याउनु र समयमै हाटबजार लगाएतका ठेक्का लाग्नु छोटो अवधिमै राजश्व धेरै संकलन हुनुको मुख्य कारण रहेको प्रजापतीले बताइन् । व्यवसाय रजिष्ट्रशन दस्तुर बापत तिन महिनामै नगरपालिकाले ३२ लाख ४६ हजार राजश्व उठाएको हो ।

नगरपालिकाले नगर क्षेत्र भित्र रहेका ठुला उद्योगलाई पनि करको दायरामा ल्याउन गत वर्ष उद्योगिहरू संगनै छलफल गरेको थियो । नगरको आन्तरिक आम्दानी बढाउन सके मात्रै जनअपेक्षा अनुसारका योजना कार्यान्व्यन गर्न सकिने भएकाले ठुला उद्योगलाई पनि करको दायरमा ल्याएर राजश्व संकलनमा वृद्धि गरिएको नगर प्रमुख धनपत यादवले बताए । जनताले तिर्ने करको दर वृद्धि नगरी अन्य क्षेत्रबाट कर चुहावट हुन नदिने निति अनुरूप नगरपालिकाले काम गरिरहेको यादवको भनाई छ । ‘ठूला उद्योगले स्थानिय तहलाई महत्व नदिने प्रवृत्ति थियो, जसले गर्दा राजश्व संकलनमा पनि असर परिरहेको बुझेर नगरपालिकाले उद्योगि व्यवसायि संग छलफल गरी उद्योग पनि स्थानीय तह मातहतको करको दायरमा आउनुपर्छ भन्ने कुरा बुझाएका छौ जसको सकारात्मक असर राजश्व संकलनमा परेको छ, नगर प्रमुख यादवले भने ।’ व्यवसाय रिजष्ट्रेशन दस्तुर मार्फत गत आर्थिक वर्षभरीमा जम्मा ३५ लाख २१ हजार राजश्व उठेकोमा यस वर्ष तिन महिनामै झन्डै साढे ३२ लाख राजश्व संकलन भएको छ ।

नगरपालिकाले तिन महिनाको अवधिमा सरकारी सम्पत्ति बहालबाट ९५ लाख ६२ हजार, भुमिकर/मालपोट बाट ३३ लाख ७० हजार, सम्पत्ति कर मार्फत ३० लाख ७२ हजार राजश्व संकलन गरेको छ । यसैगरी सिफारीस दस्तुरबाट १५ लाख ५३ हजार, घर बहाल करबाट १२ लाख ८२ हजार, नक्सापासबाट ५ लाख ४ हजार, अन्य दस्तुर मार्फत १२ लाख ६७ हजार राजश्व संकलन भएको छ ।

नगरपालिकाको लेखा शाखा प्रमुख कुन्दन चौधरीले नगरपालिकाले ठुला उद्योगलाई करमा छुट दिदै राजश्व वृद्धि गर्ने योजना बनाए अनुरूप काम भईरहेको बताए । ‘हामिले ठुलो उद्योगीलाई पनि पछिल्लो दुई वर्ष सहित चालु आर्थिक वर्षको कर एकैपटक तिरेमा त्यो भन्दा अगाडीको बाँकि कर भएमा पनि मिनाहा गर्ने निति लिएर काम गर्यौँ, जसका कारण उद्योगीले कर तिरिरहेका छन् यो क्रम अझै बढ्ने छ, चौधरीले भने। ’ व्यवसाय केन्द्रमा दर्ता गरेपनि स्थानिय तहमा गर्नुपर्देन भन्ने थियो त्यो कुरा हामिले चिर्न सफल भएका छौ चौधरीले भने ।