खोज

बुटवल,२ कात्तिक । बुटवलका नाम चलेका सहित अधिकांश मिठाई पसल ( मिष्ठान्न भण्डार) हरुले मानव स्वास्थ्यमा प्रतिकूल असर पर्ने खान अयोग्य भइसकेका वस्तु प्रयोग गरेर विभिन्न परिकार बनाउने गरेको पाइएको छ । बुटवल उपमहानगरपालिकाले गरेको मिठाई पसलको अनुगमनका क्रममा नाम चलेको र चेन बिजनेस गरिरहेको गणपति मिष्ठान भण्डार,सिद्धबाबा मिष्ठान भण्डार सहितका मिठाई पसलहरुले जनताको स्वास्थ्यमाथि खेलवाड गरेको पाइएको हो ।

शिद्धबाबा मिष्ठान भण्डारको शाखा गोलपार्कमा प्रयोग गर्न नमिल्ने अवस्थामा पुगेको तेल र उपभोग मिति सकिएको पेय पदार्थ भेटिएको हो । चाडपर्वको बेलामा बढी विक्रि वितरण हुने मिठाई सहितका परिकार तयार गर्ने क्रममा अधिकाशं मिष्ठान भण्डारमा प्रयोग गर्न नमिल्ने अवस्थामा पुगेको तेल प्रयोग गरेको पाइएको हो ।

कराईमा तारेको तेललाई पटक पटक प्रयोग गरेर अखाद्य अवस्थामा पुग्दा पनि प्रयोग गर्ने गरेको पाइएको हो । अनुगमनका क्रममा बुटवल ट्राफिकचोकको गणपति मिष्ठान भण्डारमा प्रिmजमा राखिएको खाद्य सामग्रीमा ढुसी लागेको र खान नमिल्ने अवस्थामा पुगेको तेल प्रयोग गरेको भेटिएको हो । तारेको तेलमा टिपिएम मापन गर्दा ५० भेटिएको खाद्य गुण तथा नियन्त्रण कार्यालय भैरहवाका प्रविधिक निरिक्षक दिपक कुमार यादबले जानकारी दिए । यस्तो तेलमा २५ भन्दा कम टिपिएम हुनुपर्नेमा ५० टिपिएम भेटिएको हो ।यसरी तारेको तेलमा खानेकुरा पकाए खाए क्यान्सर रोगको जोखिम हुने गरेको खाद्य निरिक्षक यादबले बताए ।

उपमहानगरपालिकाका उपप्रमुख सावित्रादेवी अर्यालको नेतृत्वमा उपभोक्ता हित संरक्षण मंच बुटवलका अध्यक्ष समुन्द्र जिसी सहितको टोलीले गरेको अनुगमनमा बुटवल १७ मोतिपुरमा रहेको दुर्गा मिष्ठान भण्डारमा ढुसी लागेको १० किलो पेडा फेला पारेको छ । फ्रिज भित्र राखिएको १० केजी पेडामा ढुसी लागेको फेला पारेपछि अनुगमन टोलीले तत्काल नष्ट गरेको छ । खाद्य पदार्थको भण्डारण , भान्सा , फ्रिजको सरसफाईको मापदण्डको पालना गरेर मात्र मिठाई र अन्य खानेकुरा तयार गर्न बजार अनुगमन समितिको संयोजक उपप्रमुख सावित्रादेवी अर्यालले निर्देशन दिएकी छन् ।
यस्तै आर्दश नगरमा रहेको महालक्ष्मी मिल्क सेन्टरमा अनुगमन गर्दा १३ पोका लेबल नभएको पनिर भेटेपछि तत्काल जफत गरेर नष्ट गरिएको छ । त्यस्तै ट्राफिक चोकमा रहेको कस्तुरी मिष्ठान भण्डारमा कराईमा तारेको तेल चेक गर्दा प्रयोग गर्न नमिल्ने र २ किलो रसबरीमा अखाद्य बस्तु भेटिएपछि नष्ट गरिएको उपभोक्ता हित संरक्षण मञ्च बुटवलका अध्यक्ष समुन्द्र जिसीले बताए । उनले अधिकांश मिठाई पसलले जनताको स्वास्थ्यमा खेलवाड गरेको पाइएकाले बुटवलमा निरन्तर रुपमा अनुगमनको आवश्यकता रहेको बताए ।