खोज

भैरहवा, २९ असोज । भैरहवाको युनिभर्सल कलेज अफ मेडिकल साइन्स (युसिएमएस) एण्ड टिचिङ हस्पिटलमा विद्यार्थीको आन्दोलनले पठनपाठन र उपचार सेवा पूर्णरुपमा बन्द भएको छ । कलेज प्रशासनले आन्दोलनरत विद्यार्थीका माग सम्बोधन गर्नुको साटो प्रहरी प्रशासन लगाएर हस्तक्षेप गर्दा ‘असुरक्षित र मानसिकरुपमा विक्षिप्त’ भएको दावी गर्दै आवासीय चिकित्सकहरुले अस्पतालमा कुनै पनि उपचार सेवामा सहभागी नहुने जनाएका छन् । एमबीबएिस र बीडीएस अन्ययनरत तथा इन्टर्न डाक्टरहरु समेत करिब ६ सय विद्यार्थीको आन्दोलनमा आवासीय चिकित्सकले समेत समर्थन जनाएका हुन् ।
आइतबार आन्दोलनरत विद्यार्थी र कलेज प्रशासनबीच वार्ता भइरहेको समयमा माग सम्बोधन नगरी प्रिन्सिपल प्रा.डा. लक्ष्मी पाठकलाई भगाएर लगिएको र विद्यार्थीमाथि बल प्रयोग गरी केही विद्यार्थीलाई घाइते बनाएको विद्यार्थीको आरोप छ । रुपन्देहीका प्रमुख जिल्ला अधिकारी गणेश अर्यालको पहलमा चार घण्टा बढी समय भएको वार्ता विना निश्कर्ष टुंगिएपछि विद्यार्थीहरुले आन्दोलन थप चर्काउने र रिले अनसन बस्ने बताएका छन् । आवासीय चिकित्सकहरुले विद्यार्थीको आन्दोलनमा समर्थन जनाउंदै विरामीको उपचार नगर्ने घोषणा गरेका हुन् । विद्यार्थीहरुले माग पूरा गर्न दवावस्वरुप रिले अनसन बस्ने बताएका छन् । विद्यार्थी र चिकित्सकको आन्दोलनले विरामीहरु उपचार सेवाबाट बञ्चित भएका छन् ।

प्रिन्सिपलमा नियुक्त भएर आएपछि डा. पाठकले एमबीबीएस तेस्रो, चौथो र पाँचौँ वर्ष तथा इन्टर्नसिप गर्ने विद्यार्थीहरूका लागि नयाँ ड्रेसकोड लागू गरेकी थिइन् । विद्यार्थीहरूले उक्त ड्रेसकोड मान्य नहुने भन्दै विरोध जनाएका थिए । पाठकले सबै विद्यार्थीहरूका लागि पाइन्ट र सर्टको व्यवस्था गरेकी थिइन् । तर, महिला विद्यार्थीहरूले लामो समयसम्म पाइन्ट र सर्ट लगाएर इन्टर्न गर्न नसकिने भन्दै विरोध जनाएका थिए । त्यसरी विरोध जनाउने अन्तिम वर्षका विद्यार्थीहरूलाई परीक्षामा समेत रोक लगाएको विद्यार्थीहरूको भनाइ छ ।
चौथो वर्ष एमबीबीएसमा अध्ययनरत छात्र छात्राहरूलाई मात्र १ वर्षको लागि लागू हुने गरी नयाँ ड्रेसको नियम लागू भएको हो । शुरूमा सामान्य जस्तै देखिएको यो विषय पछि गएर विद्यार्थीहरूले पाठकको नै राजीनामा माग्न थालेका थिए ।
उनीहरूले प्रिन्सिपलले राजीनामा दिनुपर्ने, नयाँ ड्रेसकोड लागु नगरी पहिलेको जस्तै यथावत राख्नुपर्ने, इन्टर्नसीपको पारिश्रमिक बढाउनुपर्ने, परीक्षा दिन प्रतिबन्ध लगाएका विद्यार्थीहरूको प्रतिबन्ध फुकुवा गर्नुपर्ने लगायतका माग गर्दै एक सातादेखि आन्दोलनरत छन् ।
माग पूरा नभएसम्म कलेज र अस्पतालमा शैक्षिक गतिविधि र उपचार सेवामा सहभागी नहुने विद्यार्थीहरुको अडान छ । एमबीबएिस र बीडीएस अन्ययनरत करिब ६ सय विद्यार्थीको आन्दोलनमा आवासीय चिकित्सकले समेत समर्थन जनाएका हुन् ।

रुपन्देहीका प्रमुख जिल्ला अधिकारी गणेश अर्यालले आफूले समस्या समाधानका लागि सर्वदलीय,सर्वपक्षीय वैठक राखेर गरेको निर्णय अनुसार प्रिन्सिपल पाठकलाई ‘बन्धक’ अवस्थाबाट मुक्त गरेको बताए । आइतबार पनि विद्यार्थीहरुसंग ५ घण्टा वार्ता गर्दा पनि विद्यार्थीहरु प्रिन्सिपल पाठकलाई ‘बन्धक’ अवस्थाबाट मुक्त गर्न नमानेपछि मागका सम्बन्धमा वार्ता गर्दै जाने तर प्रिन्सिपललाई त्यो अवस्थामा राखिराख्न हुंदैन भनेर मुक्त गरिएको बताए । प्रिन्सिपल पाठकलाई कलेजको पाचौं तलाबाट विद्यार्थीहरुले नै वार्तास्थलमा ल्याएको उनले बताए । विद्यार्थीका मागहरु जायज भएकाले कलेज प्रशासनले माग सम्बोधन गरी पठनपाठन र उपचार सेवा सुचारु गर्नेतर्फ ढिला गर्न नहुने सुझाव आफूले दिएको अर्यालले बताए । विद्यार्थीहरुले आरोप लगाए जस्तो प्रशासनले बल प्रयोग र हस्तक्षेप नगरेको उनले दावी गरे ।