खोज

बुटवल, २८ असोज ।

‘समृद्ध नेपाल निर्माणको आधार, स्वदेशी उद्यमशिलताको बिस्तार’ नारा बोकेर चुनावी मैदानमा छन् फर्निचर उद्योगी सुरेन्द्र ज्ञवाली । दुई कार्यकाल कार्यसमिति सदस्य हुँदै वर्तमान सहकोषाध्यक्षको जिम्मेवारीमा रहेका उनी अहिले कोषाध्यक्ष पदमा उम्मेदवारी दिएका छन् । ज्ञवाली २०६८ सालमा वस्तुगत समितिको सचिव र २०७० सालमा संयोजकको रुपमा काम गरिसकेका छन् । देविनगरमा त्रिशक्ति फर्निचर उद्योग संचालन गरेका उनी स्वदेशमा युवाहरुलाई रोजगारमार्फत देशको आर्थिक अवस्था सबल गराउन सकिन्छ भन्ने योजना अनुसार काम गरिहेका छन् । फर्निचर उद्योगमा दर्जन बढी युवालाई रोजगार दिएका उनी फर्निचर ब्यवसायीहरुको साझा संस्था बुटवल फर्निचर उद्योग संघको नेतृत्व समेत सम्हालिसकेका छन् । उमेरमा सानो देखिने ज्ञवाली ब्यवहारमा भने पाका छन् । लक्ष्य किटान गरेर उनी मैदानमा उत्रेका छन् । धेरै मेहनत र लगनकै कारण ब्यवसायी संघसंस्था र सामाजिक संस्थाहरुमा सफल नेतृत्व गरेका उनी देशमा आर्थिक सवलीकरण ल्याउन युवाहरु एकजुट हुनुपर्ने बताउँछन् ।

उद्योग संघलाई राजनीतिक हस्तक्षेपबाट मुक्त गराउन आफ्नो टिमको उम्मेदवारी दिएको उनको दाबी छ । युवा पलायन रोक्ने, उनीहरुलाई स्वदेशमा सीपयुक्त तालिम दिएर जनशक्ति तयार गर्ने र रोजगारमार्फत देशमा आर्थिक समृद्धि ल्याउन सकिने उनी बताउँछन् । अहिले पनि आधाभन्दा बढी उद्योगीहरु विदेशी कामदारमा भर पर्नुपर्ने अवस्था रहेको उनी औल्याउँछन् । नेपाल वनजन्य वस्तुको उत्पादनमा धनी देश भएपनि नीतिगत कारण यसको सदुपयोगमा चुकेको भन्दै यसमा राजनीतिक नेतृत्वको ध्यान जानुपर्ने सुझाव दिन्छन् । ‘वन जंगलमा फर्निचरजन्य काठहरु सडेर खेर गईरहेको बेला वर्षेनी अरबौका काठ विदेशबाट भित्रिरहेको छ’— उनले भने ।

स्वदेशी कच्चा पदार्थको समुचित प्रयोगका लागि पटकपटक आवाज उठाउँदै आएको भएपनि आवश्यक पहल नभएको उनको गुनासो छ । उनी फर्निचर संघको नेतृत्वमा रहँदा नेपाल सरकारबाट सालको काठ कटानी र ढुवानी बन्द गर्दा, टेण्डर बमोजिम उद्योगीले जम्मा गरेका करोडौ धरौटी रकम सरकारी खातामा जम्मा भएपनि आवश्यक प्रक्रिया अघि नबढाउँदा, तत्काल सालको काठ कटानी र बिक्री वितरण, ढुवानी सुचारु हुने वातावरण तयार गर्न, बिना दर्ता काम गर्ने प्रवृत्ति निरुत्साहित गर्न र उद्योगहरुलाई उचित संरक्षण अघि बढाउने पटकपटक ज्ञापनपत्र बुझाउने र समाधानको बाटो खोज्ने काममा सरकारसंग लबिङ गरेको स्मरण गर्छन् । देशको आर्थिक अवस्था सबल बनाउन युवाको काँधमा नेतृत्व जरुरी छ भन्ने सोंच बोकेका उनी यसकै लागि आफु अहिले उम्मेदवारी दिएको बताउँछन् ।