खोज

चन्द्रौटा (कपिलवस्तु), २७ असोज । कपिलवस्तु जिल्लाकै मुख्य बजार मानिने चन्द्रौटा बजार व्यापरिक केन्द्रको रूपमा रहेको छ । जहाँ किरानादेखि स्वास्थ्य संस्थाका अधिकांश पसलहरूमा म्याद गुज्रिएको सामग्रीहरू प्रयोग गरि आम नागरिकको स्वास्थ्यमाथि खेलवाड गरेको पाइएको छ । शिवराज नगरपालिकको चन्द्रौटामा रहेका बजारमा संयुक्त अनुगमन गर्दा जनता हेल्थ क्लिनिकमा ५ बट्टा सिरिंज, १९ थान औषधी लामो समयदेखि म्याद गुज्रिएको औषधीहरू प्रयोग गर्ने गरेको पाइएको नगरपालिकाले जनाएको छ ।

चाडपर्व नजिकिएसँगै कपिलवस्तुको चन्द्रौटा बजारमा शिवराज नगरपालिका र ईलाका प्रशासन कार्यालयको संयुक्त अनुगमन टोलीले बिहिबार बजार अनुगमन गरेको हो । सडक पेटीमा रहेका ठेला व्यावसायीलाई समेत नगरपालिकाको दायरा भित्र रहेर कानुनी प्रक्रिया अपनाएर व्यावस्थापन गरी व्यावसाय सञ्चालन गर्न नगर प्रमुख अजय थापाले आग्रह गरे । बजारमा रहेका किराना पसल, मिठाई पसल, होटेल, दूध डेरी, औषधी पसल हरूमा अनुगमन गरेको नगरप्रमुख अजय थापाले बताए । नियमित अनुगमन नहुँदा व्यापारीले आफूखुसी सामान बेच्ने गरेको र त्यसले मानव स्वास्थ्यमै नकारात्मक असर परेको गुनासो भइरहँदा बजार अनुगमन गरिएको थापाले बताए ।

शिवराज नगरपालिका उपप्रमुख तथा अनुगमन समितिकी संयोजक शिवकुमारी थारुले दुई दर्जन भन्दा बढि पसलमा अनुगमन गर्दा सबै पसलमा मूल्य सूची नराखेको पाइएको अनुगमन जानकारी दिइन्  । किराना पसल तथा औषधी पसलमा रहेका म्याद सकिएका सामग्री जफत गरिएको उनको भनाई छ । मिठाई पसल र होटलहरूमा सरसफाइ नभएकोले सरसफाइ गर्न निर्देशन दिइएको छ । सडक पेटीमा रहेका ठेला लगायत संरचनाहरू हटाइएको छ । अधिकांश होटलहरूमा सरसफाइ तथा व्यवस्थित नभएको पाइएको शिवराज नगरपालिका उपप्रमुख थारुले बताइन् ।

अनुगमन टोलीले मूल्य सूची, साइनबोर्ड, व्यवसाय दर्ता तथा नवीकरण, नापतौल सामग्रीको अवस्था, म्याद नाघेका सामग्री, स्थायी लेखा नम्बर, भ्याटमा दर्ता पत्र लगायतबारे जानकारी लिएको प्रमुख प्रशाासकीय अधिकृत बाबुराम पौडेलले जानकारी दिए । फिप्टीफिप्टी रेष्टुरेन्ट, न्यू गौरव स्वीट हाउसबाट करिब ५ लिटर तेल, राधाकृष्ण किरानाबाट ३ लिटर तेल, राप्ती स्टाफ होटेल लगायत सरसफाई नभएका कारण तालाबन्दी गरी नगरपालिका बोलाई सरसफाइ गर्न सम्झौता गरी चेतावनी दिँदै अर्को पटक जरिवाना गर्ने जनाइएको छ ।

ईलाका प्रशासन कार्यालय चन्द्रौटाका प्रमुख बाबुराम अर्यालले नागरिक माथि यसरी लापरवाही गर्न नहुने बताए । चन्द्रौटा उद्योग वाणिज्य संघका अध्यक्ष ईश्वरी पाण्डेले व्यापारीहरूले गरेका सानो लापरवाहीले मानिसहरूको जोखिममा रहेको बताउँदै आगामी दिनहरूमा यस्ता घटना नदोहरिने जिकिर गरे । समयमा नै सुधार गरी उपभोक्ताहरूलाई सर्वसुलभ सेवा प्रवाह गर्न आग्रह समेत उनले गरे ।
यस्तै व्यापार संघका जगत पौडेलले व्यावसायी मारमा रहेको बुझेको बताउँदै जटिलताको नाममा सेवाग्राहीलाई जोखिममा राख्न नमिल्ने तर्क गरे । यस्तै अनुगमनमा वडा अध्यक्ष नेत्र प्रसाद बेल्वासे, विक्रम केसी, प्रहरी, सञ्चारकर्मी लगायतको सहभागिता रहेको थियो । यसअघि श्यामलाल बन्जाडे किराना पसलबाट म्याद गुज्रिएको २८ किलो सुपारी, साईबाबा टेड्रर्सबाट २५ पोका दालमोट, लगायत बरामद गरी जफत चेतावनी समेत दिएको छ ।