खोज

बर्दघाट, २६ असोज ।

जिल्ला प्रहरी कार्यालय पश्चिम नवलपरासीले चाडपर्व लक्षित यात्रु सहायता कक्ष सञ्चालन गरेको छ । जिल्लाको ५ स्थानमा सहायता कक्ष सञ्चालन गरिएको जिल्ला प्रहरी कार्यालय पश्चिम नवलपरासीका प्रमुख प्रहरी उपरिक्षक काजी कुमार आचार्यले जानकारी दिए ।

जिल्लाको बर्दघाट स्थित टि.सि.यन. चोक, भूमही चोक, सुनवल, परासी र महेशपुरमा कक्ष सञ्चालन गरिएको उनले बताए । चाडपर्वका बेला सवारीमा चाप बढने र बजार क्षेत्र सँगै चोक चौराहमा मानिसहरुको चहलपहल बढ्दा सहज ब्यवस्थापनको लागि कक्ष सञ्चालन गरिएको आचार्यले बताए ।

बर्दघाट स्थित टि सि यन चोकमा कक्षको उद्घाटन गर्दै पश्चिम नवलपरासीका प्रमुख जिल्ला अधिकारी विश्व प्रकाश अर्यालले समुदाय र प्रहरी मिलेर सामाजिक कार्यमा अघि बढ्नु पर्ने बताए । उनले सडक सुरक्षाको लागि प्रहरी मात्र नभइ यात्रु, सवारी चालक लगायत सबैको उत्तिकै दायित्व रहने बताए ।

विशेषगरी चाडपर्वको बेला यात्रुको चाप बढ्ने, बाहिरबाट आउनेहरु चोकमा अलमलिने लगायतका कार्यक्रहरुलाई सहज ब्यवस्थापनको लागि कक्षको स्थापना गरिएको प्रमुख जिल्ला अधिकारी अर्यालको भनाई थियो । चाडपर्वमा यात्रुहरु ठगिने समेत सम्भावना रहेको हुँदा सम्बन्धित बस ब्यवसायी समिति, चालक लगायत पनि सचेत हुनुपर्नेमा उनले जोड दिए ।

यात्रु सहायता कक्ष चौविसै घण्टा सञ्चालनमा रहने र समुदाय प्रहरीको सँयुक्त कार्यक्रम रहेको समेत उनले बताए । उद्घाटन कार्यक्रममा बोल्दै जिल्ला ट्राफिक प्रहरी कार्यालयका प्रहरी निरिक्षक राजु खत्रीले सहायता कक्षमा यात्रुलाई गन्तब्यमा पुग्नको लागि जानकारी दिने, चालक सहचालकलाई दुर्घटना जोखिमका बारेमा जानकारी गराइने र राजमार्गमा हुनसक्ने समस्याको तत्काल समाधान गरिने बताए ।