खोज

बुटवल, २५ असोज ।

लियो क्लव अफ बुटवल मणिमुकुन्द युथ र केरवानी स्वास्थ्य चौकीको सहकार्य, सिक्टहन स्वास्थ्य चौकीको आयोजना र नेशनल बाथरोग सेन्टर बुटवल शाखा र ग्लोरियस हेल्थ केयर प्रालिको प्राविधिक सहयोगमा देवदह १२ स्थित सिक्टहन स्वास्थ्य चौकीमा वृहत बाथरोग तथा सुगर परिक्षण शिविर सम्पन्न भएको छ ।

सो शिविरमा १२७ जना सेवाग्राहीलाई रगत मार्फत निःशुल्क युरिक एसिड, आर.ए. फ्याक्टर, सि.आर.पि., ई.एस.आर., ब्लड सुगर लगायतका जाँचहरु गर्नुका साथै उपस्थित सेवाग्राहीलाई बाथरोग सम्बन्धी जानकारीहरू सहितको सचेतना कार्यक्रम पनि सम्पन्न गरिएको छ ।

कार्यक्रममा देवदह नगरपालिका वडा नं. २ स्थित केरवानी स्वास्थ्य चौकीका प्रमुख एवं लियो क्लव अफ बुटवल मणिमुकुन्द युथका अध्यक्ष काशीराम रेग्मी, नेशनल बाथरोग सेन्टर बुटवल शाखाका व्यवस्थापक अभिनाश पल्लो मगर लगायतले बाथरोग सम्बन्धी सचेतना गराउने उद्देश्यले आफ्नो धारणा राखेका थिए ।

कार्यक्रममा बोल्दै स्वास्थ्य शाखा प्रमुख काशीनाथ बन्जाडेले बाथरोग दिवसको अवसरमा सिक्टहन स्वास्थ्य चौकीमा वृहत कार्यक्रम लिएर आएकोमा सम्पूर्ण सहयोगी संस्थाहरुलाई धन्यवाद दिएका थिए । उनले शरीरमा विभिन्न अंगमा बाथरोग लाग्न सक्ने भएतापनि पहिचानमा आउन नसक्दा र रोग पत्ता लाग्न नसक्दा विभिन्न किसिमका समस्या झेल्न नागरिकहरु वाध्य भएको अवस्थामा केरवानी स्वास्थ्य चौकी र लियो क्लव अफ बुटवल मणिमुकुन्द युथले महत्वपूर्ण कार्यहरु गर्दै अगाडि बढिरहेकोमा अझ उत्कृष्ट कार्यहरु गर्न शुभकामना दिए ।

समुदाय स्तरमा विभिन्न किसिमका नसर्ने रोगहरु फैलिइरहेको अवस्थामा उच्च रक्तचाप, मधुमेह लगायतका जाँचहरुको सुविधा जताततै भइरहेको तर अत्यधिक समस्या भएर पनि समुदायस्तरमा स्क्रिनिङको रुपमा अभियानहरु सन्चालन हुन नसकेको एउटा अटो इम्युन डिजिज जुन नदेखिने तरिकाले समुदायमा फैलिइरहेको र जाँच पनि केही महंगो रहेको बाथरोगको पहिचान गरेर उपचारको दायरामा ल्याउन र बिरामीहरुलाई जटिलताबाट जोगाउन उक्त शिविर सञ्चालन गरिएको केरवानी स्वास्थ्य चौकी प्रमुख एवं लियो क्लव अफ बुटवल मणिमुकुन्द युथका अध्यक्ष काशीराम रेग्मीले जानकारी दिए ।

कार्यक्रमका अध्यक्ष एवम् सिक्टहन स्वास्थ्य चौकी संचालन तथा व्यवस्थापन समितिका अध्यक्ष एवम् देवदह नगरपालिका वडा नं १२ का वडाध्यक्ष डेग बहादुर सारुले छोटो तयारीका बाबजुद पनि निशुल्क बाथरोग तथा सुगर परीक्षण शिविर सम्पन्न गर्न सफल भएको जानकारी दिए ।

वडाध्यक्ष सारुले आफुहरुको प्राथमिकतामा पहिलो स्वास्थ्य रहेको हुँदा आगामी आर्थिक वर्षमा स्वास्थ्यलाई विशेष प्राथमिकताका साथ बजेट बिनियोजन गर्ने र माथिल्ला निकायमा पनि समन्वय गर्ने जानकारी दिए ।

त्यस अवसरमा सिक्टहन स्वास्थ्य चौकी प्रमुख रेशम बहादुर सुनार, सोही स्वास्थ्य चौकीकी सिनियर अनमि देवि बिश्वकर्मा लगायतले पनि बोलेका थिए । कार्यक्रममा वडाका जनप्रतिनिधि, स्वास्थ्य चौकी संचालन तथा व्यवस्थापन समितिका पदाधिकारीहरु, स्वास्थ्य स्वयंसेविका, स्वास्थ्यकर्मी, लियो क्लवका पदाधिकारीहरु, सेवाग्राही लगायतको सहभागिता थियो ।