खोज

बर्दघाट, २५ असोज ।

इरान विरुद्धको पहिलो यु–१९ एसीसी क्रिकेट प्रतियोगितामा नेपालले २ सय ७४ रनको शानदार जित हात पारेको छ । नेपालको जितमा कप्तान देव खनालले शतकीय पारीको योगदान गरे । विस्फोटक ब्याटिङ्ग गरेका खनालले मात्र ६० बलमा ४ छक्का र १२ चौकाको मद्दतमा १ सय रन प्रहार गरे ।

यो सँगै खनालले यु १९ खेलमा २ शतक समेत प्रहार गरेका छन । पहिलो ओभरमै ओपनर अर्जुन कुमाललाई शुन्य रनमा र पाँचौ ओभरमा आकाश त्रिपाठीलाई टिम स्कोर १० हुँदा गुमाएको नेपालको ब्याटिङ्ग दिपक बोहोरा र कप्तान खनालले सम्हालेका थिए । बोहोरा ६५ रनमा आउट भए । नेपालको लागि दिपक डुम्रेले ६९ रनको अर्धशतकीय पारी खेलेका थिए ।

नेपालको लागि दिपेश कंडेलले २९ रन बनाउँदा हेमन्त धामी २३, आकाश चन्द १९ र सुवास भण्डारीले अविजित १८ रनको पारी खेलेका थिए । नेपाल ४१ दशमलव १ ओभर खेल्दै इरान सामु ३ सय ५३ रनको विशाल स्कोर खडा गरेको थियो ।

नेपाललाई अलआउट गराउने क्रममा दरहमान र सलमानले समान ३–३ विकेट लिएका थिए । यस्तै समान साखी जेइद रेइसीले समान २–२ विकेट लिएका थिए । ३ सय ५४ रनको लक्ष्य पच्छाएको इरान ३० दशमलव ५ ओभर खेल्दै मात्र ७९ रनमा समेटिएको थियो । इरानलाई सस्तैमा धराशायी बनाउने क्रममा दिपेश कण्डेल र सुवास भण्डारीले समान ३–३ तथा हेमन्त धामी र आकाश चन्दले समान २–२ विकेट लिएका थिए । इरानको लागि अमिर खोरसन्दले ३७ र सविरले अविजित ११ बाहेक अन्य कुनै पनि ब्याटरले दोहोरो अँक जोडन सकेनन् । नेपालले दोश्रो खेल आइतबार बहराइनसँग खेल्ने छ ।