खोज

सुनवल, २५ असोज ।

पश्चिम नवलपरासीको सदरमुकाम परासीमा आज हुने भनिएको मंगोलनेशनल अर्गनाइजेशन पार्टीको लुम्बिनी प्रदेश अधिवेशन बिथोलिएको छ । झडपको स्थिति सृजना भएपछि अधिवेशननै स्थगित भएको हो । पार्टीले बिहीबार नवलपरासीको सदरमुकाम परासीमा ‘लुम्बिनी प्रान्तीय विशेष अधिवेशन’ राखेको थियो ।

अधिवेशनमा सहभागी हुन आएका प्रतिनिधि र कार्यकर्ताहरुले बाइपास रोडबाट जुलुस निकालेका थिए । जुलुसमा लेखिएका नाराहरुप्रति असन्तुष्ट जनाउँदै अकस्मात जम्मा भएका स्थानीयवासीको समुहबीच घण्टाघर चोकमा झडपको स्थिति सृजना भएको थियो । राष्ट्रिय झण्डा र राष्ट्रिय जनावरलगायत विभिन्न विषय र मागका बारेमा लेखिएका नाराप्रति स्थानीयको समुहले आपत्ति जनाउँदै भनाभन हुन थालेपछि दुई समुहबीच झडपको स्थिति सृजना भएको हो । स्थिति नियन्त्रणमा लिन ठूलो संख्यामा नेपाल प्रहरी र सशस्त्र प्रहरीलाई परिचालन गरिएको थियो । परासीमा अधिवेशन भए ठूलो घटना हुन सक्ने संभावनालाई मध्यनजर राख्दै सुरक्षा निकायले अधिवेशन सार्न भनेपछि अधिवेशन स्थगित गरिएको हो ।

शान्तिपूर्ण रुपमा जुलुस निकाल्दा अर्को समूहले बिथोल्ने प्रयास गरेको भन्दै सुरक्षा निकायको अनुरोध र केन्द्रीय समितिको निर्देशनअनुसार अधिवेशन स्थगित गरिएको पार्टीका जिल्ला सल्लाहकार इन्द्रबहादुर तामाङले जानकारी दिए । परासीका स्थानीयले भने हिन्दु धर्म प्रति आगाध पुग्ने गरी प्लेकार्ड सहितको र्याली निकालेपछि प्रतिरोधमा उत्रनुपरेको बताएका छन् । ११ ओटा बस रिर्जव गरेर मंगोल नेशनलका नेता कार्यकर्ता अधिवेशनका लागी परासी आएका थिए । स्थगित अधिवेशन कहाँ र कहिले भन्नेबारे छलफल गरेर तय गरिने तामाङले बताए । पार्टीको लुम्बिनी प्रदेश समितिको नेतृत्व चयन गर्न अधिवेशन राखिएको थियो ।