खोज

बुटवल, २५ असोज ।

रुपन्देहीमा भित्रिने आन्तरिक तथा बाह्य पर्यटकहरुलाई भुलाउने गरी निर्माण भएका पार्कहरु विशिष्टिकरण पहिचान दिने गरी अघि बढ्न सरोकारवालाहरुले सुझाव दिएका छन् ।

शंकरनगर वनबिहार तथा अनुसन्धान केन्द्र (वनबाटिका) को १३ औ वार्षिक साधारण सभामा बोल्ने वक्ताहरुले जिल्लामा भएका पार्कहरुमा एउटै खालको पूर्वाधार बनाउनु भन्दा फरक पहिचान दिने गरी पर्यटकीय स्थलको विकास गर्नसके प्रभावकारी हुने उनीहरुले दाबी गरे । कार्यक्रमको प्रदेश सभा सदस्य भगवती घिमिरेले उद्घाटन गर्दै लुम्बिनी प्रदेशको आर्थिक विकासमा पर्यटन मुख्य पाटो भएको बताइन् । शान्तिका दुत भगवान गौतम बुद्धको जन्मस्थल लुम्बिनी, सामरिक महत्वको जितगढी किल्लासहित धेरै धार्मिक र ऐतिहासिक महत्वको क्षेत्रहरु रहेको भन्दै यसलाई पर्यटक गन्तव्यका रुपमा विकासमा जोड दिनुपर्ने बताईन् ।

कार्यक्रममा तिलोत्तमा नगरपालिकाका उपप्रमुख जगेश्वरदेवी चौधरीले पर्यटन क्षेत्रको विकास गर्न सरकारसंगै सरोकारवाला निकायहरुको सहकार्य जरुरी रहने बताईन् ।
कार्यक्रममा मणिमुकुन्द सेन उद्यानका अध्यक्ष माधव नेपालले पर्यटन क्षेत्र विशाल उद्योग भएको बताए ।

अन्य उद्योगमा वर्षदिनमा नै वस्तु उत्पादन हुने र प्रतिफल प्राप्त हुने भएपनि यो क्षेत्रमा भने लामो समय लाग्ने उनले बताए । आन्तरिक र बाह्य पर्यटक भित्रिने र प्रतिफल आउन समय लाग्ने भएपनि एकपटक राम्रो भएपछि लामो समय चल्ने उनले दाबी गरे । नेपालमा पर्यटन, जलश्रोत र उर्जा गरी ३ पक्षबाट देश समृद्ध हने सरकारको घोषणा अनुसार काम अघि बढ्न नसकेको उनले दुखेसो गरे ।

पर्यटक क्षेत्रको विकास गर्न धमाका मच्याउनुपर्छ भन्ने धारणालाई अघि बढाउनुपर्ने उनले सुझाव दिए । पहाडको भजन संस्कृति, तराईका थारू संस्कृति, सोरठी नृत्यहरुको प्रचार अगाडि बढ्नुपर्ने उनले बताए । नीति निर्माणको पाटो सरकारको हो भने संस्थागत विकास अर्को महत्वपूर्ण पाटो भएको उनले बताए । पार्कहरुको बिचमा एक आपसमा मिलेर विशिष्टिकृत पहिचान दिलाउने गरी विकास गर्न जरूरी रहेको बताए । नाम अनुसार कामलाई अघि बढाउन जरुरी रहेको उनले बताए ।

कार्यक्रममा राष्ट्रिय उद्यान महासंघका अध्यक्ष खेम लुईटेलले संस्थागत रुपमा सबैजसो पार्कहरुलाई समेटेर अघि बढ्ने गरी योजना बनेको बताए । हरेक जसो पार्कमा समस्याहरु छन् त्यसलाई सम्बोधन गर्दै अघि बढ्नुपर्ने उनले बताए ।

कार्यक्रममा केन्द्रका अध्यक्ष बेल प्रसाद शर्माले संस्थाको वार्षिक प्रगतिबारे जानकारी दिदै यहाँ रहेका पुष्पलाल, सहिद पार्कमा सभाहल, २९ वटा पिकनिक सेड लगायतका धेरै पूर्वाधार निर्माण भएको बताए । पार्क स्थापनामा महत्वपूर्ण योगदान दिएका संस्थापक अध्यक्ष स्व. बाबुराम अर्यालको स्मृतिमा पूर्वाधार बनाउने योजना भएको बताए ।

कार्यक्रममा केन्द्रका उपाध्यक्ष खिमलाल पाण्डेयले संस्थाको विकास, योजना निर्माण गर्ने र गहन छलफल राख्ने थलो साधारण सभा भएको भन्दै यसलाई सही ढंगबाट सदस्यहरुबाट सदुपयोग गर्न सुझाव दिए । केन्द्रमा तिलोत्तमा नगरपालिकाबाट ५० लाख पर्यटन पूर्वाधारका लागि बिनियोजन भएको तथा प्रदेश सरकारबाट १५ लाख रुपैयाँ बजेट उज्यालो विद्युतीकरणमा सहयोग भएको उनले बताए । केन्द्रमा हाल ४ सय ८३ जना आजीवन र १ सय ४४ जना साधारण सदस्य गरी कुल ६ सय २७ जना रहेको सचिव पर्शुुराम भण्डारीले बताए । हाल केन्द्रमा ३१ जना कर्मचारी कार्यरत छन् ।