खोज

बुटवल, २४ असोज । बुटवल पश्चिम क्षेत्र जाने र बुटवल आउने मानिसहरूको लागि अहिले सबैभन्दा उत्तम विकल्प हो ‘बुटवल देवीनगर–बुद्धनगर हुँदै झोलुंगेपुल’ बेलबास सडक । यो सडकमा अहिले सयौंको संख्यामा सवारी साधन ओहोर दोहोर गर्छन् ।
बर्षौंदेखि तिनाउ नदीमा बनेको मुख्य पुल (महेन्द्र राजमार्ग) को बिकल्पमा अहिले तिनाउमा बुटवलै २ वटा पुल निर्माण भएका छन् । बुटवल–४ पुलचोकको पुल र अर्को देबीनगर बुद्धनर जोड्ने पुल । यी पुलले तिनाउको पुरानो पुलको लोड आधा घटाएको छ भन्दा पनि हुन्छ । मुख्य पुल भन्दा पनि शाखा पुलबाट गन्तव्यमा पुग्ने मानिसहरू बिहान साँझको समयमा भिडभाड नै हुन्छ ।

सबैभन्दा बढि जनसंख्या भएको बुटवलको वडा नम्बर ११ का अधिकांस मानिसहरू देवीनगर–बुद्धनगर पुल निर्माण भएपछि बढि लाभांवित भएका छन् । यसको अलवा बुटवलदेखि सेमलार, मोतिपुर, रानीगञ्ज सहित बेलबास, नयाँगाउँ, तामनगर र सैनामैना पश्चिम तिरका मानिसहरूले पनि बुद्ध नगरको पुल प्रयोग गरेर गन्तव्यमा जाने र आउने गर्दछन् । पुल निर्माण भएपनि सडक निर्माण नभएको कारण सास्ती पाएका सडक प्रयोगकर्ताहरूले अहिले बुद्धनगरमा फराकीलो सडक पाएका छन् ।

वि.सं. २०७९ माघ १६ गते बुद्धनर (तिनाउ पुल) देखि नहरपुर झोलुङ्गे पुल(दानव नदी) सम्म आंशिक फुटपाथ तथा नाली सहितको सडक पिच निर्माण काम सुरुवात गरिएको थियो । बुटवल उपमहानगरपालिका प्रमुख खेलराज पाण्डेले शुभारम्भ गरेको निर्माण काम पुरा भएपनि केही मिटर सडक निर्माण अलपत्र हुँदा अधिकांस मानिसहरूले सास्ती पाएका छन् । २ करोड ६० लाख ६५ हजार लागतमा ठेक्का सम्झौता पाएको थापा दास जेभी बुटवलले २०८० जेठ १५ भित्र सम्पन्न गर्ने गरी ठेक्का लिएको थियो । सम्झौता भन्दा ढिला गरी गत असार महिनामा सडक निर्माणको अधिकांस पुरा गरेपनि बुद्धनगर देखि नहरपुर बेलबास बेथरी जोड्ने सकक सम्मको मुल सडक जोडीने स्थानमा करिब ६० मिटर सडक अहिले अलपत्र छ ।

बुद्धनगर तर्फको सडक फराकीलो र चिल्लो हुँदा यो बेलबास बेथरी जोड्न सडकको मुख्य बिन्दुमा बाटो साँघुरो, कच्ची, हिलाम्मे र धुलाम्मे हुँदा उक्त स्थानमा व्यवसायी तथा यात्रा गर्ने यात्रुले जो कोहीले पनि सास्ती व्यहोर्नुपरेको हो । स्थानीय गोविन्द रेग्मीले अन्य सडक पुरा हुँदा केहीमिटर मात्रै बाटो अलपत्र पार्नुले सिंगो बुद्धनगर लाई नै गिज्जाएको बताउँछन् । उनी भन्छन्–‘यत्रो सडक बनाउँदा धेरै छैन, केही मिटर मात्रै बाटो अलपत्र छ, जसस्ले गर्दा उताको बाटो पनि पिच गरे नगरे जस्तै छ ।’

बुद्धनगरको विकासका लागि नरपालिकाले सडक निर्माण गरेको भने पनि कच्ची बाटो र कमसल पिचको कारण निर्माण सम्पन्न भएको सडकको पनि प्याल पर्न सुरु भएको उनको भनाई रहेको छ । ठेकेदार कम्पनीको लापरवाहीको कारण सडक निर्माण गर्दा गुणस्तरको काम नगर्दा पुरा भएको सडकमा पनि अहिले खाल्डा खुल्डी देखिन थालेको स्थानीयहरूको गुनासो रहेको छ ।

सडक विस्तारको क्रममा सडक किनारामा घर निर्माण गरेका केही घरधनीले सडक विस्तारको लागि अटेरी गरेको कारण सडक विस्तार तथा कालोपत्र हुन नसकेको बताइएको छ । दुई जना घर धनी मध्ये एक जना घरधनीको कारण सडक विस्तार अलपत्र परेको हो । स्थानीय जनप्रतिनिधी मार्फ अहिले जे जस्तो अवस्थामा रहेको छ, सोही अनुसार नै कालोपत्रे गरेर जाने र सडक विस्तार नाली निर्माण पछि गर्ने गरी सहमती गर्ने कुरा भएपनि यसमा पनि सहमती हुन सकेको छैन ।जसको कारण सयौं सडक यात्रीहरूले सास्ती पाएका छन् भने ठुला सवारी साधानहरू समेत बाटो साँघुरो भएको कारण पास हुन समस्या हुने गरेको छ ।
यता बुटवल उपमहानरपालिका वडा नम्बर ११ का वडा सदस्य युवराज रानाले  सडक विस्तारको विषयमा सहमती नभएको कारण केही मिटर सडक अलपत्र परेको बताए । उनले यो विषयमा सहमती गर्ने र सडक निर्माण गर्ने कुरा भएको र छिट्टै हुने बताए ।

एमालेको ध्यानार्कष्ण

यसैबीच बुटवल उप–महानरपालिका वडा नम्बर ११ को वडा कार्यालयमा सडक पुर्वाधार अन्य विषयमा नेकपा एमाले वडा नम्बर ११ समितिले ध्यानार्कषण पत्र बुझाएको छ । वडा अध्यक्ष राम चन्द्र क्षेत्री मार्फत वडाका विभिन्न सडक, पुर्वाधार, अलपत्र परेको, निर्माण अधुरोध रहेको लगायतका विषयमा ध्यानार्कषण पत्र बुझाएको एमाले वडा ११ अध्यक्ष दिननाथ भट्टराईले जानकारी दिए ।
उनका अनुसार १३ वटा बुँदा मा नगरपालिकाको ध्यानार्कण गराएको छ ।

अध्यक्ष भट्टराईका अनुसार तिनाउ नदी किनारका वस्तीको सुरक्षाका लागि नदीको दुवैतर्फ तटबन्ध निर्माणका लागि आवश्यक पहल गर्न माग गरिएको छ भने न्यू दुर्गानगर तथा युद्धनगर बस्ती जोखिममा परेका हुँदा उक्त दानव नदी क्षेत्रमा तटबन्द निर्माण गर्न, अव्यवस्थित बसोबासी, भूमिहिन तथा सुकुम्बासीहरूको समस्या समाधानका लागि जग्गा नापजाचको कामलाई तिव्रता प्रदान गर्न, तिनाउ पश्चिम क्षेत्रमा अस्थायी प्रहरी चौकी स्थापनाका लागि आवश्यक पहल गर्न जोडदार माग गरिएको छ । सडक किनारा, बुद्धनर पुल लगायतका स्थानमा हाईम्याक लाईट जडान गर्न माग गरिएको छ भने मजुवा क्षेत्रमा रहेको फोहोरमैला डम्पिङ साइटको आधुनिक व्यवस्थापनका लागि आवश्यक पहल गर्न माग गरिएको छ । बेथरी सडकखण्डको बुटवल– ११ मा पर्ने सडक निर्माणको काममा अत्यन्तै ढिलासुस्ती भएको हुदा उक्त सड़क निर्माण कार्य तत्काल सम्पन्न गर्नका लागि आवश्यक पहल गर्न माग गरिएको अध्यक्ष भट्टराईले जानकारी दिए ।